لاس رسیدونکی لینک

Breaking News

د چمن پوله د تړل کېدو ، پر کونړ د پاکستان توغوندیز بریدونو او د پښتنو نورو مسلو په اړه انلاین احتجاجي غونډه


غونډه د چمن او سپین بودلک د پولې له تړلو، پر کونړ ولایت د پاکستان توغوندیز بریدونو، د دور بابا دروازې باندې چېک پوسټ جوړولو او پر فضل خان ایډوکیټ د برید پر ضد وشوه.

د جولایي په ۲۵ نیټه د پښتون کونسل امريکا/ کېنډا او پښتون ژغورنې غورځنګ له خوا په انلاین بڼه یوه نړیواله احتجاجي غونډه وشوه.

دغه غونډه د چمن او سپین بودلک د پولې له تړلو، پر کونړ ولایت د پاکستان توغوندیز بریدونو، د دور بابا دروازې باندې چېک پوسټ جوړولو او پر فضل خان ایډوکیټ د برید پر ضد وشوه.

د غونډې کوربانه شریف الله شرافت او سپوږمۍ مسید وو چې په امریکا کې د پښتون ژغورنې غورځنګ ملاتړي او د پښتون کونسل همکاران دي.

د پښتون کونسل امریکا مشر او صدر رسول محمد د دغې غونډې پرانسته وکړه او وویل: "زمونږ ننۍ لاریون د پښتنو د ډیورنډ کرښې د بندیز، د ازغن تار د لګیدو، په کونړ باندې د پاکستان توغوندیز بریدونه او د پي ټي‌ اېم په مشرانو د حملو او د دروغو مقدمې درج کولو لړۍ د غندنې لپاره کیږي."

ښاغلي رسول محمد زیاته کړه چې د پولو د بندیدو څخه زیات تاوان د پښتنو اقتصاد او کلتور ته رسیږي.

هغه زیاته کړه: "زمونږ غوښتنه په موجوده وخت کې دا ده چې ازغن تار دې بیرته هغه ځای ته یووړل شي کوم چې په ۱۹۷۹ کې وو".

غونډې ته د پښتون ژغورنې غورځنګ غړي او اې پي اېس شهدا فورم صدر فضل خان ایډوکیټ هم وینا وکړه. ښاغلي فضل خان وویل چې د ده د چا سره دښمني نشته خو ګناه یې دا ده چې دوی د خپلو وژل شوو ماشومانو د قاتلانو پر ضد ولاړ دي. هغه وویل دا حمله ورباندې ریاست کړې ده. هغه وویل ددې حملې مقصد د هغه ویرول نه بلکې وژل وو.

د بشري حقونو فعاله او د پي ټي اېم مخکښه ثنا اعجاز هم په دې غونډې کې ګډون درلود او وویل:

"کله چې ولس د بېدارۍ خبره کوي، د ترهګرۍ پرضد د سولې خبره کوي، د خپلو وسایلو او اختیار خبره کوي، د جبري ورکو خلکو خبره راپورته کوي او نړی ترې خبره وي ، د پښتنو یا د افغانانو د ټول وژنې خبره کوي نو هغوي خو یا په دې وطن کې جبري ورکیږي او یا یې هم ګواښي. "

مېرمن اعجاز وویل چې په هغېهم پاکستان کې مقدمې درج کړل شوۍ او نور ملګري یې هم چې د انصاف غوښتنه کوي پرې مقدمې درج کیږي.

په دې غونډه کې د کونړ ولایت د سرکاڼو ولسوالۍ او اسعداباد په ځینو سیمو کې د پاکستان له لوري توغندیز بریدونو په هکله هم خبرې وشوې.

د افغانستان د پارلمان غړو تیره اونۍ په دې اړه یوه غونډه هم کړې وه چې په کې ویل شوي چې په تېر یو کال کې د پاکستان پوځي ځواکونو له خوا د افغانستان په ختیځو سیمو په ځانګړي ډول نورستان او کونړ ولایتونو د هاوان ۱۳۰۰۰ بریدونه کړي چې په لسګونو ملکي وګړي پکې مړه او ټپیان شوي. په هم دې موضوع د افغانستان د کونړ ولایت نماینده جاوید فیصل هم خبرې وکړې.

ښاغلي وویل: "په افغانستان د تېرو ۱۳ کلونو راهسې د پاکستان له لورې دغه شان توغوندیز بریدونه کیږي په ځانګړي ډول په کونړ ولایت. نو مونږ په غونډه کې د دغې مسلې د حل لارو باندې خبرې وکړې او د افغان حکومت څخه مو وغوښتل چې د سیاسي او ډیپلوماټیکي لارې نه دغه ستونزه حل کړي ."

بشیر احمد بهرام خیل چې د کونړ د هغو سیمو اوسیدونکی دی او په تیرو بریدونو کې یې یو ملګری خلیل الرحمان هم وژل شوی وايی:

"کله چې د توغوندۍ برید کیږي‌ خلیل الرحمان له کوره راوځي چې د ټپیانو مرسته وکړي او روغتون ته یې بوزي نو دویمه توغندۍ راځي او په هغه کې شهید کیږي."

ښاغلی بهرام خېل وايي په وروستیو کې د دوی‌ پر سیمې دغه بریدونه ډیر زیات شوي او دغې سیلاني سیمو ته اوس خلک د توغوندیو له ډاره نه راځي.

که څه هم تر اوسه د پاکستان د پوځ او بهرنیو چارو وزارت له خوا په دې اړه کوم رسمي غبرګون مخې ته نه دی راغلی او خارجه وزارت د وي او اې ډیوه پوښتنې ته هم ځواب نه دی ویلی خو پاکستان زیاتره وخت وايي دغه ډول بریدونه د پاکستاني ترهګرو ډلو پرضد کوي چې د هغوي په وینا د افغانستان له خاورې فعالیت کوي.

په دې غونډې کې د چمن او سپین بولدک ور د موضوع په اړه هم خبرې وشوې چې د مارچ په پیل کې د خلکو د تګ راتګ لپاره تړل شوی دی خو چارواکو په اپرېل کې د محدودې سوداګرۍ لپاره پرانیستو.

مجاهد خان اڅکزي چې یو تن پرلت کوونکی دی وویل: "د چمن او سپین بولدک د پولې تړلو ټول زیان دواړو خواوو پښتنو ته دی خو د دې پرضد پرلت اوس هم دوام لري او ۵۳ ورځ مو ده."

ښاغلي اڅکزي زیاته کړه چې په وېش کې شاوخوا درې لکه دکانداران او ۱۴ لکه اوسیدونکي دي چې د سخت مالي زیان سره مخامخ دي.

د پاکستان حکومت تر لوی اختر پورې د چمن او سپین بولدک د پولې پرانیستو اعلان کړی دی.

دا په داسې حال کې ده چې له تېرو ۵۳ ورځو راهیسې په چمن کې د چمن او سپین بولدک ور بغیر د کوم شرط د پرانیستو لپاره احتجاجي پرلت روان دی.

د بلوچستان د داخله چارو وزیر ضیا لانګو په چمن سیمه کې د پولې د تړل کېدو په ضد احتجاج ته په اشارې ویلي وو چې د خلکو د روزګار د ستونځو د حل لپاره یې یوه کمېټۍ جوړه کړې خو هغه زیاته کړی وه چې نور به خلک پر پوله په اسانه او بې له قانوني‌ اسنادو تګ راتګ نه کوي.

XS
SM
MD
LG