څیړونکي وايي، د پاکستان موجوده ايتلافي [د پي ډي اېم] حکومت په تېر وزيراعظم عمران خان تور لګوي چې د هغه په حکومت کې ترهګر بیرته پښتونخوا او پاکستان ته راوستل شوي خو دا حکومت چې نزدې کال یې پوره کيږي، دې حکومت هم د ترهګرۍ د مخنيوي دپاره کوم خاص څه نه دي کړي او د ترهګرۍ په اړوند بدلون د پوځ د منظورۍ نه بغېر نه شي راتلی.

د پاکستان د موجوده حکومت د وزيراعظم شهباز شریف نه تر بهرنيو چارو وزير بلاول بټو زرداري او نورو وزيرانو پورې ټول د عمران خان په حکومت د وسله والو سره د خبرو په تړاو تور لګول کیږي چې په هغو خبرو کې یې ترهګر بیرته راوستي دي.

خو عمران خان د دغو تورونو په اړوند تل دريځ خپل کړی چې هغه د تحریک طالبان پاکستان د وسله والو سره خبرې پېل کړې وې ځکه چې د هغه په وينا د زرګونو په شمېره کې وسله وال په افغانستان کې دېره وو بيرته به راتلل دوی وژلی نه شو.

خو دغه خبرې چې د کال 2021 په اکتوبر کې یې عمران خان د ټي ار ټي سره په يوه مرکه کې تاييد کړی وو، د تېر کال د نومبر پورې پکې ډز بندي روانه وه د پاکسان نه کابل ته پلاوي هم لېږل شوي په افغانستان کې د واکمنو طالبانو په مينځګړيتوب یې د تحریک طالبان پاکستان د مشرانو سره خبرې شوي، ډز بندۍ شوي، او د پاکستان نه کابل ته تللو جرګو ويلي چې د هغه وخت د استخباراتي ادارې د مشر او بيا په پېښور کې کور کمانډر جنرل فېض حميد په وينا دغه مذاکرات کېدل.

خو تحريک طالبان پاکستان د دغو مذاکراتو په لړ کې روانه ډز بندي تېر کال د نومبر په مياشت کې ختمه کړې او د بريدونو پېل کولو یې ويلي وو، او د دغې وروسته یې بيا پرله پسې د بريدونو زمه وارۍ اخستل منل پېل کړي دي.

موجوده حکومت بيا بیا دعوې کوي چې د ترهګرۍ نوغی به اوباسي خو څیړونکي وايي دې اوسني حکومت هم د ترهګرۍ د مخنيوي دپاره کوم خاص څه نه دي کړي او ښايي چې د دې حکومت په وړاندې دومره ډېر بحرانونه يا چېلنجونه دي چې لومړيتوب کوم ته ورکړي ځکه چې په خپله نښتی دی.

د پېښور پوهنتون د ايريا سټډي سنټر پخوانی مشر ډاکټر سرفراز خان خان وايي، پاکستان کې ترهګري د انتهاپسندۍ نه زېږېدلې او دا په پښتنه سيمه کې په منظم ډول سېوا کړی شوې ده.

وي او اې ډیوه سره په خبرو کې هغه وويل، د"ا انتهاپسندي اوسنۍ نه ده د دې پېل په افغانستان کې د شوري اتحاد پرضد چې نړيوال اتحاد، امريکا او غرب او د پاکستان ډکټېټر ضياالحق جنګ شورو کړو د هغې وخت نه دا انتها پسندي پېل شوې او بيا د 9/11 نه وروسته ترهګري ډېره زیاته شوې ده".

هغه وويل "پاکستان کې د حميد ګل نه واخله تر فېض حميد پورې جرنېلانو که د وسله والو ملاتړ نه کولو خو نرمه رويه یې ورسره ساتله او عمران خان د طالبان خان په نوم ياد کړی شو او د پيپلز ګوند حکومت که د وسله والو مخالف وو خو په دغه لړ کې حکومتونو څه نه شو کولی".

د ډاکټر سرفرخان خان په خبره "موجوده حکومت دومره کړي چې عمران خان کومې خبرې شورو کړې وې دوی ورته ويلي که ټي ټي پي د ايين چوکاټ نه مني دوی ورسره خبرې نه کوي او نه یې مني دومره بدلون به راغلی وي نور بدلون د پوځ د منظورۍ نه بغېر نه شي راتلی".

د پاکستان د پوځ مشر جنرل عاصم منير روانه مياشت د خېبرپښتونخوا د جنوبي وزيرستان ضلعې سفر کړی د افغانستان سره په پوله جوړو مورچو ته ورغلی او ویلي يې وو چې د ترهګرۍ د خاتمې پورې به جګړه روانه وي.

او څيړونکی پروفېسر اعجاز خټک هم وايي، "دې اوسني حکومت هم د ترهګرۍ ضد ډېر څه نه دي کړي".

وي او اې ډیوه سره په خبرو کې هغه وويل، "د عمران خان په حکومت او جنرل فېض په وخت کې وسله وال په رضا راوستل شو په افغانستان کې د طالبانو په واک کې د راتلو وروسته ټي ټي پي ځان ډاډ محسوسول پېل کړه او دېخوا یې خپله کيسه شورو کړه، دې حکومت ته اوس خپله سياسي حالات ګډوډ دي او اقتصاد هم په داسې حالت کې دی چې نه ښکاري چې دا حکومت به څه وکړي او کولی شي".

هغه زياته کړه، "دا حکومت به غواړي او ترجيحاتو کې به یې هم وي، ترهګري ده، اقتصادي سياسي او عدالتي مسلې دې، د هر ځای خپلې مسلې دي په ملک کې يو ډول ثبات هم نشته نو هر اړخ ته بحران دی".

د پاکستان وزیراعظم شهباز شريف مشرۍ پېښور کې په 30م جنورۍ په پوليس لاين کې د ځانمرګي بريد وروسته د اېپکس کمېټۍ غونډه شوې او ويل شوي وو، "غونډې اتفاق کړی چې د ترهګرۍ د خاتمې دپاره به د مرکز او صوبو ترمنځ يو سوچ او تګلاره جوړولی شي په ملک کې دننه د ترهګرۍ د مالي مرستو ټولې سرچينې به ختمولی شي".

تېره شپه د خېبرپښتونخوا په لکي مروت سيمه کې په پوليسو په وسله وال بريد او چاودنه کې د يو ډي اېس پي افسر په ګډون څلور پوليس وژل شوي او شپږ نور ژوبل شوي دي. تحريک طالبان پاکستان یې زمه واري منلې ده.

د خېبرپښتونخوا نګران وزیراعلا اعظم خان د لکي مروت د پېښې غندنه کړې ده.

دپېښور هایکورټ تر ټولو سینیر ججه اغلې مسرت هلالي دپېښور هایکورټ په تاریخ کې د وړومبۍ ښځینه قاضڼې یا چیف جسټس په توګه ټاکل شوې ده اؤ دپاکستان دقانون اؤ انصاف وزارت دهغې دتقررۍ اعلامیه هم خپره کړې ده.

مېرمن مسرت هلالي دپښتو د وتلي شاعر اؤ ادیب ارواښاد خانمیر هلالي لور ده چې دکال2014 راهسې پېښور هایکورټ کې دججې په توګه خدمات ترسره کوي.

دمشرې قاضڼې په توګه دهغې دتقررۍ منظوري دهیواد صدر ډاکټر عارف علوي ورکړې ده اؤ دا به دپاکستان په تاریخ کې دویمه میرمن وي چې دیو هایکورټ مشري په لاس کې اخلي.

تر دې وړاندې دکال2018 نه اکتوبر کال2019 پورې ښځینه ججه طاهرہ صفدر دبلوچستان هایکورټ چیف جسټس پاتې شوې وه.

دقانون اؤ انصاف وزارت اعلامیه کې ویل شوي چې مسرت هلالي به دپاکستان دجوډیشل کمیشن له لوري دهایکورټ دچیف جسټس تر باقاعده تقررۍ د اپریل د وړومبۍ نیټې نه دپېښور هایکورټ دمشرې ججې یا چیف جسټس په توګه ذمه وارۍ سمبالې کړې.

د ډان ورڅپاڼې د رپورټ له مخې دپېښور اوسیدونکې 62 کلنې مسرت هلالي دپېښور پوهنتون دخېبر لاء کالج نه دقانون ډګري ترلاسه کړې ده.

هغې دکال 1983 څخه په ضلعي عدالتونو کې،بیا په کال 1988 کې پېښور هایکورټ کې اؤ کال 2006م کې دسپریم کورټ د وکیلې په توګه خدمات ترسره کړې دي.

هغه دپېښور هایکورټ بار اؤ دسپریم کورټ بار په بیلابیلو عهدو هم پاتې شوې ده.

ددې ترڅنګ هغه دنومبر کال 2001م نه تر مارچ 2004م پورې دخېبر پښتونخوا وړومبۍ ښځینه ایډیشنل ایډوکیټ جنرل یا مرستیاله سرکاري وکیله هم پاتې شوې ده.

میرمن هلالي په 26م مارچ کال 2013م کې دمرستیالې ججې په توګه دپېښور هایکورټ په ججانو کې شامله شوې وه اؤ بیا په 13م مارچ کال2014م کې دهایکورټ مستقله ججه ټاکل شوې وه

دمسرت هلالي پلار خانمیر هلالي دپښتو یو وتلی شاعر اؤ ادیب ؤ اؤ دباچا خان سره په خدایې خدمتګار تحریک کې هم تر څه مودې پاتې شوی ؤ چې ذکر یې باچاخان پخپل کتاب "زما ژوند اؤ جدوجهد" کې هم کړی دی.

خو ځینې تاریخ پوهان وایي چې وروسته بیا خانمیر هلالي دباچاخان دخدایې خدمتګار تحریک نه مرور شوی ؤ اؤ د "افغان جرګه " په نوم یې دڅو نورو شاعرانو لیکوالانو په ملتیا یو تنظیم جوړ کړی ؤ .

په دغه جرګه کې دخانمیر هلالي سره دنورو لیکوالانو اؤ شاعرانو ترڅنګ دخدایي خدمتګار تحریک غړي اؤ وتلي شاعران عبدالاکبر خان اکبر، میا احمد شاه اؤ میا جعفر شاه کاکا خېل هم ملګري وؤ

دپاکستان په خېبر پښتونخوا اؤ پنجاب صوبو کې دالیکشن دنیټې پسر دپیدا شوي سیاسي تاؤ تریخوالي په ترڅ کې الیکشن کمیشن ترپنجاب وروسته دخېبر پښتونخوا اسمبلۍ انتخاباتو لپاره هم د8م اکتوبر نیټه اعلان کړې ده.

د چهارشنبې په ورځ الیکشن کمیشن خېبر پښتونخوا اسمبلۍ لپاره په 8م اکتوبر دانتخاباتو نېټه په داسې حال کې اعلان کړې ده چې پنجاب کې دانتخاباتو ځنډولو معامله تحریک انصاف ګوند سپریم کورټ ته وړې ده اؤ په عدالت کې هم ددې قضیې پسر دججانو ترمنځ اختلافونه راولاړ شوي دي.

تر دې وړاندې الیکشن کمیشن پنجاب صوبه کې انتخاباتو لپاره داپریل 30نیټه اعلان کړې وه خو بیا یې په دې دریځ خپلولو سره دغه نیټه 8م اکتوبر ته وغځوله چې کمیشن ته نه خو حکومت انتخاباتو لپاره پیسو ورکولو ته تیار دی اؤ نه پوځ اؤ پولیس خپل ځواکونه ورکوي.

سپریم کورټ روانه میاشت پنجاب اؤ خېبر پښتونخوا صوبو کې انتخاباتو لپاره دنیټې په نه اعلانیدو له خپله انده نوټس اخستی ؤ اؤ حکم یې کړی ؤ چې داسمبلیو ماتېدو نه وروسته په 90 ورځو کې دننه انتخابات کول اییني ذمه واري ده.

دسپریم کورټ له دغې حکم وروسته په 24م مارچ دخېبر پښتونخوا ګورنر حاجي غلام علي الیکشن کمیشن ته په یو استول شوي لیک کې دصوبایي اسمبلۍ انتخاباتو لپاره داکتوبر8مه نیټه وړاندیز کړې وه چې الیکشن کمیشن ددغې نیټې سره اتفاق کړی دی .

خو بل لوري ته تحریک انصاف ګوند دانتخاباتو دنیټې وروسته کولو پرضد سپریم کورټ کې درخواست هم جمع کړی دی چې اوریدنه یې دمشر قاضي عمر عطاء بندیال په مشرۍ دسپریم کورټ پینځه کسیزه بینچ کوي.

دتحریک انصاف ګوند مشر اؤ پخواني وزیراعظم عمران خان واضحه کړې ده چې که انتخابات له خپلې اییني مودې نه یوه ورځ هم وروسته کیږي نو ددوي ګوند به یې خلاف مزاحمت کوي.

خو مرکز کې د واکمن سیاسي ایتلاف پي ډي‌ ایم ګوندونه په ګرد هیواد کې په یوه ورځ دانتخاباتو پلوي دي اؤ دریځ یې خپل کړی دی چې که په بیلابیلو وختونو کې دصوبو اؤ مرکز دننه انتخابات وشي نو دې سره بیا هیواد کې سیاسي تاو تریخوالی اؤ د الزامونو سیاست سر راپورته کولی شي.

دانتخاباتو دنیټې په سر سپریم کورټ کې د روانې قضیې د اوریدنې په مهال دسپریم کورټ دججانو ترمنځ هم اختلافونه رامنځته شوي دي اؤ دپاکستان حکومت تېره ورځ دقامي اسمبلۍ نه دعدلیې د واکونو محدودولو ترمیمي قانوني مسوده منظور کړې ده.

دپاکستاني طالبانو لخوا دچهارشنبې اؤ زیارت په منځ شپه په یو بمي برید کې وژل شوی دلکي مروت دپولیسو ډي ایس پي ښاغلی اقبال مومند دپښتو یو وتلی شاعر اؤ ادیب ؤ چې دنړۍ په ګوټ ګوټ کې اؤ خاصکر پښتنه ټولنه کې یې دخپلو خوږو شعرونو ګڼ شمیر پښتانه مینه وال لرل.

دهغه غزلونه،سندرې اؤ نظمونه نه یوازې وخت په وخت دپښتو وتلو سندروغاړو‌ په خپلو اوازونو کې ویلي بلکې زیاتره مهال به په ټولنیزو رسنیو هم ځوانانو اؤ د ادب مینه والو دهغه شعرونه یو بل سره شریکول.

اقبال مومند دوشعر وشاعرۍ ترڅنګ یوه اوږه موده د ریډيو پاکستان پېښور څانګې سره دنطاق یا براډکاسټر په توګه هم ذمه وارۍ ترسره کړې وې.

ارواښاد اقبال مومند دپېښور دادیزو سیمې اوسیدونکی ؤ اؤ دیوې اوږدې مودې نه یې په پولیس محکمه کې نوکري کوله خو دپولیس نوکرۍ ترڅنګ هغه دخپل ژوند زیاته برخه دپښتو ژبې اؤ ادب خدمت ته وقف کړې وه.

د نوموړي په ګاډی د چهارشنې ا‌ؤ زیارت په منځ شپه کې په لکي مروت سیمه کې هغه مهال یو بمي برید شوی چې هغه په یوه پولیس تاڼه دترهګرو لخوا دشوي برید په اطلاع کومک لپاره دغې تاڼې ته روان ؤ.

په دې برید کې داقبال مومند ترڅنګ درې نور پولیس عسکر هم وژل شوي اؤ یو تن ژوبل شوی دی.

تر دې وړاندې هم په نزدې وختونو کې په اقبال مومند ګڼ شمیر ترهګریز بریدونه اؤ بمي چاودنې شوې وې خو هغه له دغو بریدونو ژوندی وتلی ؤ.

د ادبي تنظیمونو سره تړاؤ:

نوموړي دپښتو د یوې ادبي ټولنې اهنګ پښتو ادبي جرګې دصدر اؤ داخلاص پښتو ادبي ټولنې دسرپرست په توګه ذمه وارۍ هم ترسره کولې.

ددې ترڅنګ هغه وخت په وخت دپښتو ادبي تنظیمونو په غونډو.مشاعرو اؤ تنقیدي نشستونو کې برخه اخسته اؤ په ادبي نړۍ کې یې دخپلې مترقي اؤ رومانوي شاعرۍ له امله یوه څلنده نامه پیدا کړې وه.

پخپل ژوند یوه مرکه کې ښاغلي اقبال مومند ویلي وؤ چې هغه شاعري دکال1976 راهسې پیل کړې وه .

دپښتو غزل بابا امیرحمزه خان شینواری یې خپل روښاني استاد اؤ لارښود ګڼلو خو ددې ترڅنګ هغه دپښتو دسترو شاعرانو ،ادیبانو اؤ دانشورانو لکه قلندر مومند، همیش خلیل،اجمل خټک، لطیف وهمي اؤ سیف الرحمان سیلم سره هم نزدې پاتې شوی ؤ اؤ دهغوئ په محفلونو کې به یې ګډون اؤ علمي بحثونه کول.

نوموړي پخپل ژوند دشاعري ګڼ شمیر کتابونه لیکلي وؤ خو په دې کتابونو کې یې چاپ کړی هم نه ؤ البته له مرګه لږه موده وړاندې یې ویلي وؤ چې دملګرو په مشوره یې دخپلو غزلونو یو ضخیم کتاب چاپ ته چمتو کړی دی .

دخپلې شاعرۍ دې کتاب لپاره هغه نوم خوښ کړی ؤ "ته زما په سیوري ودریږه چناره"

دخپلې شاعرۍ دکتاب نه چاپ کولو یوه وجه هغه دا هم ښودله چې پخپلو شعرونو کې ورته انتخاب ګران دی.

سر یې ورکړو، سنګر یې پرې نه ښود:

دهغه په وژنه دپښتو ګڼ شمیر شاعرانو،لیکوالانو ،فنکارانو اؤ دټولنیزو رسنیو فعالانو خفګان ښودلی اؤ دهغه مړینه یې دپښتو ژبې اؤ ادب لپاره هم یو ستر زیان بللی دی.

دپښتو تکړه شاعر اؤ ادیب اقبال حسین افکار په ټولنیزه رسنۍ فیس بک لیکلي اقبال مومند په ژبه ، ادب کلتور. خاوره او ولس ورک مئين و.

هغه وایي اقبال مومند که په ظاهر صورت هر څو غلی، خاموش طبعه او نرم انسان و خو ولې د هغه اندورون کښې يو ننګيال پښتون شتون لرلو ددغه ننګيال پښتون د خپل قام ، ولس په بابله د جذباتو احساساتو اظهار به هغه د شعر په ژبه کولو.

افکار زیاتوي دهغه شعر د پښتون جمال او جلال نه جوړ د لفظونو يو داسې انځور و چې په اوريدو به يې د هر پښتون حواس خمسه متاثر کول.

داقبال حسین افکار په وینا ځینو نزدې ملګرو ښاغلي مومند ته د ريټایر کيدو مشوره هم ورکړې وه" خو ښاغلي اقبال مومند لکه د ايمل خان مومند د وخت مغل ته سنګر پرېښودو ته جوړ نه وه اخر عقوبت د خپلې پښتنې خاورې او ولس په دفاع کښې يې سر ورکړو خو سنګر يې د وخت غليم ته پرې نه ښود"

سیاسي فعال مولانا خان زیب هم په فیس بک دهغه ادبي اړخ ستایلی اؤ وایي اقبال مومند د خپلې دندې سره ېو داسې شاعر هم و چې په هر شعر کښې به یې د خپلې خاورې رښتيوني احساسات ډېر په هنر پاشل.

مولانا خان زیب لیکلي "د خپلې خاورې یو حلالی بچی د اقتصاد د جنګ خشاک شو ، په ګور دې نور وي ! دا اولس او خاوره دې خدایې د ممکنه راتلونکې بربادیو وژغوري"

ښاغلی اقبال مومند په ټولنیزه رسنۍ فیس بک هم زیات فعال ؤ اؤ اکثره به یې دخپل فیس له لارې دخپل شعر مینه والو ته خپل شعرونه لیکل.

تر وژل کیدو یوازې اووه ساعته وړاندې هم هغه په فیس بک خپل داشعر لیکلی ؤ چې .

د حادثو سره استاذ شي سړی

کومه مېوه ده چې يې لمر نۀ وهي

اقبال مومند دشعر و شاعرۍ تر څنګ دپېښور دسرکاري ریډیو براډکاسټر هم پاتې شوی اؤ د ریډیو پاکستان نه یې ګڼ شمیر پروګرامونه وخت په وخت کړي وؤ.

دهغه د وژل کیدو دپېښې نه وروسته په په ټولنیزو رسنیو ګڼ شمیر فعالینو داقبال مومند شعرونه اؤ‌ انځورونه له یو بل سره شریک کړي‌ دي.

داقبال مومند دشعرونو نمونې:

دا ښار هسې په نوم د انسانانو دی لاليه !

ځنګل دی، پکښې راج د شرمخانو دے لاليه !

مونږ تل د پردو خلکو خوشحالو ته خوشحالېږو

دا يو خصلت زمونږه د ډمانو دی لاليه !

مونږ هسې زنده باد او مرده باد نعرې وهلې

وطن خو د وطن د بادارانو دی لاليه !

نه ښکاري او نه مخې له راځي چې سر په سر شو

يو جنګ دی راپه غاړه د پېريانو دی لاليه .

.............

هغه سر نه شو بې ځايه ټيټولی

دا دی مات يې کړو خپل سر پاڅېدو لاړو

...........

ما د خپل سر قاتل په پټو سترګو وپېژندو

چې مې په قبر سهرې هم غوړوي، سخات هم وېشي

دا خو اقباله ! ياران ښۀ دي وسله نۀ غورځوي

ګنې دا خلک پېښور هم وېشي، سوات هم وېشي

د خېبرپښتونخوا په جنوبي ضلع لکي مروت کې د شپې ناوخته د پوليسو په تاڼه وسله وال برید او بيا چاودنه کې د پوليسو يو افسر او درې سپاهيان وژل شوي او شپږ نور ژوبل شوي دي. تحریک طالبان پاکستان یې زمه واري منلې ده.

د لکي مروت ضلعې د پوليسو وياند شاهد حميد وي او اې ډيوه سره په شريک کړي خبر کې ويلي، د شپې په يوه بجه ترهګرو د لکي مروت په صدر تاڼه د جديدې او درنې وسله حمله کړې، د پوليسو د کلک ځواب سره ترهګر په تياره کې تښتېدلي دي.

د پوليس خبر ترمخه د ترهګرو په ډزو کې پينځه سپاهيان ژوبل شوي دي.

خو پوليس وياند ويلي، د بريد په خبر ترلاسه کېدو چې پوليس افسر [ډي اېس پي] اقبال مومند د نفرۍ سره موقعې ته روان وو، په لاره کې پرې د پېرو والا موړ سره چاودنه شوې، ډي اېس پي لکي اقبال مومند، سپاهي وقار، سپاهي علي مرجان او سپاهي کرامت الله پکې وژل شوي او د [اې پي سي] ګاډي ډرايور علي پکې ژوبل شوی دی.

د پوليس وياند په وینا ژوبل پوليس په سمدستي ډول د لکي سټي روغتون ته وړل شوي، علاقې ته اضافي نفري رسېدلې او د لټون عمليات یې پېل کړي دي.

تحريک طالبان پاکستان د لکي مروت پولیسو په تاڼه د بريد او ډي اېس پي اقبال مومند په ګاډي د چاودنې زمه واري منلې ده.

د عوامي نيشنل ګوند د خېبرپښتونخوا مشر اېمل ولي خان په ټويټر ویلي،

"د کرسۍ او واک شوقيان خلک په پاکستان کې د انتخاباتو ژړا کوي او زما پښتانه په قربانيانو ورکولو ستړي شو". هغه زياته کړې، "د پښتنو په قتل عام د پارلیمنټ، عدلیې او ميډيا خاموشي مجرمانه ده مونږ به تر څو لاشونه اوچتوو؟".

او د پښتون ژغورنې غورځنګ مشر منظور پشتين ويلي،

"د ډالري جنګ نتيجې وګورئ، د روژې په دې میاشت کې هم په لکې مروت کې حمله، د څو سپاهيانو سره د پښتو شاعر اقبال موند شهيد، چا چې دا جنګ راوړی د دې جنګ په ګټه د مزو ژوند کوي خو پښتون او پښتونخوا په دې جنګ کې سوځي".

لکي مروت د خېبرپښتونخوا په هغو ضلعو کې يوه ده چرته چې په وروستيو کې په پوليسو د بريدونو پېښې زياتې شوي دي.

په لکي مروت کې په 13م مارچ د سرشمېرنې او کور شمېرنې د مامورينو سره د امنیت په ډيوټۍ پولیسو باندې وسله وال بريد شوی يو پوليس سپاهي پکې وژل شوی وو.

هم په دغه ورځ په ټانک کې د سرشمېرنې د مامورينو سره ساتونکو پوليسو باندې بريد شوی يو سپاهي پکې وژل شوی او څلور نور ژوبل شوي وو، د دغو بريدونو زمه وارۍ تحریک طالبان پاکستان منلې وې.

د فرورۍ په میاشت کې امنیتي سرچينو دعوې کړې چې د پوليس او پوځ په عملياتو کې په ضلع کې لږ تر لږه 18 ترهګر وژل شوي وو.

په لکي مروت کې د جنورۍ په 26 د وسله والو ضد عمليات پېل شوي چې د شپږمې فرورۍ پورې دوامداره ساتل شوي د عملياتو په مهال سړکونه او موبايل سروس بند کړی شوی خو د یادو عملياتو کوم جزیات نه وو خپاره کړی شوي.

د يادو عملياتو په اړوند پوځ هم څه نه وو ويلي.

لکي مروت د خېبر پښتونخوا سویلي ضلع ده چې پولې یې د پنجاب صوبې د میانوالي، د خېبر پښتونخوا د کرک، ډېره اسماعیل خان او ټانک ترڅنګ قبایلي ضلعو شمالي او جنوبي وزیرستان سره لګېدلې دي د کال 2010 د جنورۍ په لومړۍ نېټه د لکي مروت شاه حسن خېل سیمه کې په ځانمرګي برید کې د 100 نه زیات کسان وژل شوي او په لسګونو نور ټپیان شوي وو.

‎د دغه برید زمه داري تحریک طالبان پاکستان منلې وه.