د ماشومانو لپاره د متحده قامونو ادارې يونيسف په خپل تازه رپورټ کې ويلي چې پاکستان د نوو زيږيدونکو ماشومانو د مرګونو په لحاظ د نړۍ خطرناک هېواد دی چرته چې په هر ٢٢ کې يو ماشوم د زيږيدو په وړمبۍ مياشت کې مري.
د نهې، سه شنبې، په ورځ جاري شوي بیان کې یونیسیف وویل پاکستان، افغانستان او سنټرل افريقين ریپبلېک د نړې هغه درې هېوادونه دي چرته چې د نوې زيږيدونکو ماشومانو د ژوندي پاتې کيدو امکانات تر ټولو کم دي.
رپورټ کې ويل شوي چې پاکستان کې د کال ٢٠١٦ د شميرو ترمخه په ١٠٠٠ ؤ کې ٤٦ يا په هر ٢٢ ماشومانو کې يو زيږنې په اولنۍ مياشت کې مري. په افغانستان کې دا شرح په ٢٥ کې يوه ده.
دغه رپورټ د کال ٢٠١٤ د شمار شميرو په بنسټ ليکي چې پاکستان کې د لس زره ماشومانو لپاره يواځې ١٤ صحي ماهرين موجود دي او په افغانستان کې د لس زره ماشومانو په سر د طبي ماهرينو دغه شمير اووه دی.
د متحده قامونو دا رپورټ ليکي چې کال ٢٠١٦ کې د پاکستان دننه د يو کال دوران دوه لکه او ٤٨ زره نوي زيږدلې ماشومان مړه شويدي چې په ګرده نړۍ کې د مړو ماشومانو ١٠ فيصدي جوړيږي.
ډاکټر شوکت علي د ماشومانو ډاکټر دې وي او ای ډيوه ته وايي که په اميد مياندې د ماهر ډاکټر نه د وويني ټيسټونه وکړي او متوازن خوراک واخلي او ورسته د ماشوم د زيږدنې نه پس ضروري ټيکې ماشوم ته ولګوي نو د ماشومانو د بې وخته مرګونو شميره راکميدلې شي.
پيښور کې د ماشومانو د حقونو فعال عمران ټکر واي د جينکو په کم عمرۍ کې ودونه، د اميدوارې مور د صحت په بابله د پوهې کمی او په ورستو پاتو سيمو کې د مور او ماشوم صحي اسانتياو ته نه رساي هغه علتونه دي چې له امله یې ماشومان د زيږيدنې په ړومبۍ مياشت کې مري.
