د پاکستان الېکشن کمېشن د راولپنډۍ د کمشنر لخوا په انتخاباتو کې د درغلیو د تورونو وروسته د لوړې کچې کمېټۍ جوړولو پرېکړه کړې ده. مسلم ليګ ن ګوند ويلي، د پېنډۍ د کمشنر د انتخاباتو سره هیڅ تعلق نه وو او تحریک انصاف ګوند غوښتنه کړې، د پېنډۍ کمشنر چې څه ويلي، د هغې ترمخه دې په ټول ملک کې پلټنې وشي.
د خالي/ شنبې په ورځ (17 فرورۍ) د پاکستان د پنجاب صوبې د راولپېنډۍ ډويژن کمشنر لیاقت علي چهټه منلې وه چې پېنډۍ کې په اتمه فرورۍ ترسره شوو انتخاباتو کې په پراخه کچه درغلۍ شوي دي او د ګټونکو کاندیدانو نتیجې بدلې کړل شوي دي.
د پېنډۍ کمشنر د پاکستان په الېکشن کمشنر او چيف جسټس د درغليو کولو تورونه لګولي وو.
خو د پاکستان چيف جسټس قاضي فايز عيسا د پېنډۍ د کمشنر د تورونو په ځواب کې ويلي، په انتخاباتو کې یې دومره کردار ادا کړی چې د انتخاباتو کولو حکم یې کړی او زياته کړې یې د انتخاباتو سره یې هیڅ تعلق نشته او په هغه د لګول شوو تورونه که کوم ثبوت وي هغه دې وړاندې کړل شي.
نوموړي ويلي، د انتخاباتو په اړه په سپريم کورټ کې قضيه لګېدلې په هغې کې به څه کيږي د وړاندې نه پرې څه نه شي ويلي.
او الېکشن کمېشن ويلي، د راولپنډۍ د DROs او ROs نه به په دغه اړه بيانونه ريکارډ کوي او په درېو ورځو کې به خپل رپورټ الېکشن کمېشن ته وړاندې کوي، او د کمېټۍ د رپورټ وروسته به د کمشنر راولپنډۍ ضد د الېکشن کمېشن د سپکاوي او نورې قانوني کارروايۍ په اړه هم فېصله کولی شي.
د پاکستان مسلم ليګ ن ګوند ملک احمد خان هم په يوه خبري غونډه کې ويلي، د کمشنر د انتخابي عمل سره هيڅ تعلق نه وي، او نوموړي دعوه کړې، داسې حالات جوړ کړل شوي څنګه چې د نهمې مې نه وړاندې جوړ کړل شوي وو.
پاکستان کې په اتمه فرورۍ د ترسره شوو انتخاباتو وروسته د پاکستان تحریک انصاف ګوند په ګډون نور سیاسي ګوندونه هم د درغلیو تورونه لګوي او بلوچستان کې د سیاسي ګوندونو لخوا د درغلیو د تورونو په سر د د تېرو څو ورځو راهسې احتجاجي پرلت او پرون په صوبه کې کاربنديز اعلان شوی وو.
امریکې، برتانیې او يورپي يونين هم په پاکستان کې په ترسره شوو انتخاباتو کې د ګډوډي او د ټولټاکنو په ورځ د موبایل فون او انټرنیټ د خدماتو په تړل کېدو اندېښنې ښودلي خو د پاکستان د خارجه وزارت په انتخاباتو د نړیوالو هیوادونو اندېښنې رد کړي او دعوه یې کړې ده چې پاکستان کې په اتمه فرورۍ ترسره شوې ټاکنې د هر رقم درغلۍ نه پاکې وې.
Forum