لاس رسیدونکی لینک

Breaking News

د پاکستان نوم د اېف ای ټي اېف د خړفهرست نه د وتلو امکان کم دی، ماهرین وايي


ه پنجاب کې د ترهګرۍ ضد عدالت د کالعدم جماعت الدعوه يو شمېر غړو ته د ترهګرۍ د مالي مرستو په جرم کې سزاګانې هم ورکړې دي او د جماعت الدعوه مشر حافظ سعید هم نيول شوی او فرد جرم پرې لګول شوی دی

د ترهګرۍ د مالي مرستو او پېسو د غېر قانوني انتقال د مخنیوي نړیوالې ادارې اېف اې ټي اېف درې ورځنۍ غونډه د فرانس سرښار پېرس کې پېل شوې ده او مطبوعات وايي اداره به د ترهګرۍ د مالي سرچينو د وچولو او مني لانډرنګ د مخنوي په لړ کې د پاکستان د ګامونو جاج اخلي.

د پېرس د غونډې په اخیرۍ ورځ، د اکتوبر په ۲۳ نېټه به پاکستان د اقداماتو کتنه کیږي.

پاکستاني مطبوعات وايي د پاکستان چارواکي خوشبينه دي چې د دغه غونډې پایلې به د هېواد لپاره مثبتې وي ځکه چې پاکستان په ورستیو ورځو کې د ترهګرۍ د مالي سرچينو د وچوولو او د مني لانډرنګ د مخنیوي لپاره 15 نوي قوانینو هم جوړ کړي دي.

خو د اقتصادي چارو پوهان وايي کم امکان دی چې په دغه غونډه کې به د پاکستان نوم د خړفهرست نه وویستل شي.

ماهرين وايي د اېف اې ټي اېف غونډه په داسې حال کې کېږي چې د دې میاشت په 11 تاريخ د اېشيا پېسفک ګروپ په يو رپورت کې پاکستان د اوږد مهاله څارنې په فهرست کې شامل کړی او ویلي وو دا ځکه چې پاکستان د ترهګرۍ د مالي مرستو او مني لانډرنګ په مخنیوي کې کوم په زړه پورې پرمختګ نه دی کړی.

مطبوعات وايي چې د اېف اې ټي اېف په غونډه کې به د پاکستان په اړه د اېشيا پېسفک ګروپ د دغه رپورټ هم جاج اخیستل کیږي او ورسره به د پاکستان د هغه ګامونو هم جاج اخلي چې د ترهګرۍ د مالي مرستو په وچولو او مني لانډرنګ د مخنیوي لپاره یې اوسه پورې کړي دي.

اېشيا پېسفک ګروپ دا پخلې هم کړی و چې پاکستان د اېف اې ټي اېف په 27 سپارښتنو باندې په عمل کوولو کې بوخت دی او په دې لړ کې 15 قوانین هم جوړ کړې دي.

د اسلام اباد په نسټ يونيورسټۍ کې د سکول اف سوشل ساینسز ډين او اقتصاد پوه ډاکټر اشفاق حسن ډيوه ته وايي دا ېوه سياسي مسله ده او چې کله هم نړيوال اسټبلشمنټ وغوښتل نو د پاکستان نوم به د اېف اې ټي اېف د خړ فهرست نه ووځي. هغه وايي پاکستان د ترهګرۍ د مالي مرستو او مني لانډرنګ د مخنوي په لړ کې ډېر کار کړی دی او که پاکستان هرڅه وکړي خو تر څو چې انټرنېشنل استبلېشمنت وه نه غواړي نو د پاکستان نوم د خر فهرست نه شي وتلی.

د پاکستان چارواکي اکثر له تور لګوى چې ګني هندوستان د پاکستان نوم د اېف اې ټي اېف په تور فهرست کې د اچوولو هڅې کوي.

د خزانې پخوانی وزیر او د اقتصادي چارو څېړنکار حفيظ پاشا ډيوه سره خبرو کې وايي هغه ګمان نه کوي چې اېف ای ټي اېف به دا ځل د پاکستان نوم د خړ نوملړ څخـه وباسي. حفیظ پاشان وویل پاکستان د ترهګرۍ د مالي مرستو او مني لانډرنګ د مخنیوي لپاره هغه ډول اقدامات نه دي کړي څنګه چې اېف اې ټي اېف غواړي.

بلخوا د اېف ای ټي اېف په چارو او د پاکستان په اقتصاد نظر لرونکی خبريال مهتاب حېدر ډيوه ته خپله تجزیه کې وايي د پاکستان په تور فهرست کې د شاملېدو امکان نشته خو ښکاري داسې چې په خړ فهرست کې به لا شامل وي. هغه دا هم وايي د پاکستان د اېف ای ټي اېف د خړ فهرست نه وتل ضروري دي ولې چې اي ايم اېف هم پاکستان ته د قرض ورکوولو پروګرام د اېف اې ټي اېف د خړ نوملړ څخه وتلو سره تړلې دې. مهتاب حېدر وايي که څه هم پاکستان کې دا تاثر موجود دی چې د اېف ای ټي اېف په خړ فهرست کې د پاکستان نوم اچول د نړیوال اسټيبلشمنټ د سياست برخه ده خو وايي د اېف اې ټي اېف په سپارښتنو عمل کول او خپل اقتصاد اسنادي کول يا ډاکومنټډ کول د پاکستان په خپله ګټه کې هم دى ولې چې داسې به دا درک ولږې چې پاکستان ترهګر او لا قانونه ډلو ته رقمونه څنګه او د چرته نه ترسيلېږي.

پاکستان کال 2018 جون کې د اېف ای ټي اېف په خړ فهرست کې شامل کړې شوی و او د دغه فهرست نه د وتلو لپاره پاکستان د لا قانونه ډلو لکه جماعت الدعوه پرضد عملیات هم کړي وو او د هغوى د انتظام لاندې چلېدونکې مدرسې، سکولونه او هسپتالونه یې په سرکاري ولکه کې اخیستې وو او په پنجاب کې د ترهګرۍ ضد عدالت د کالعدم جماعت الدعوه يو شمېر غړو ته د ترهګرۍ د مالي مرستو په جرم کې سزاګانې هم ورکړې دي او د جماعت الدعوه مشر حافظ سعید هم نيول شوی او فرد جرم پرې لګول شوی دی.

XS
SM
MD
LG