د پاکستان وزیراعظم عمران خان امر کړی دی چې استخباراتي اداره ايي بي یا انټېلېجنس بیور او وفاقي تحقیقاتي اداره اېف ايي ای دې په هېواد کې د غنمو د کمي پلټنې وکړي او معلومه دې کړي چې په ورستۍ ورځو کې غنم او اوړې ولې کم شوي وو؟
د شورو، چهارشنبې، په ورځ د وزیراعظم د دغه گام اعلان په داسې حال کې وشو چې د خېبرپښتونخوا او بلوچستان په شمول د پاکستان په ځینو نورو برخو کې د اوړو د کمي رپورټونه راغلي دي او د ډوډۍ بیې زیاتې شوې دي.
د ډوډیو د قیمتونو د زیاتېدو په نتیجه کې د خېبرپښتونخوا په مرکزي ښار پېښور او نورو ښارونو کې نان بایانو په احتجاج کې تنورونه بند کړي وو. صوبايي حکومت په رعایتي نرخونو د اړو د خرڅون لړۍ پېل کړې خو یو شمېر صارفین وايي رعایتي اوړه طلب نه پوره کوي.
د اوړو او د نورو خوراکي شیانو تاجران د تېر کال راهسې وايي چې په هیواد کې د خوراکي شیایانو بېې زیاتې شوي دي.
د خېبرپښتونخوا د خوراک وزیر په نژدې ورځو کې په صوبه کې د اوړو د کمي خبره رد کړې ده.
خو د وزیراعظم دفتر په یو بیان کې وویل عمران خان د غنمو او د اوړو د کمي د تحقیقاتو دپاره د لوړې پای کمیټي وگمارله.
د بیان ترمخه، په کمېټۍ کې به د ايي بي، اېف ايي ای او د قومي احتساب ادارې چارواکي شامل وي. د کمیټۍ هدف به دا معلومول وي چې په پاکستان کې د غنمو او د اوړو د ورستي کمي اسباب څه دي؟ څوک یې ذمه وار دي؟ او د داسې ډول کمي په اینده کې څه رنگ مخه نیول کیدی شي؟
