واشنګټن - د پاکستان د تجارت وزارت ويلي حکومت د يو خصوصي امر د لارې د افغانستان، ايران او روس سره د مال بدله کې د مال تجارت پيلوي چې د نورو توکو سره سره به پکې پيټرول او ګېس هم شامل وي.
پاکستان د بهر نه د مال اخستلو د پاره په مشکله د يوې مياشتې زرمبادله لري او حکومت سرګردانه دی څنګه وکړی شي د پيسو په ورکولو کې توازن پيدا کړي او ګراني څنګه قابو کړي. تېره مياشت ګراني نزدې 38 فیصده زياته شوې ده.
د حکومتي حکم ترمخه د مال په بدله کې د مال پاليسي د جون د وړومبۍ نېټې نه اعلان شوې او د روان کال د پاره د تجارتي توکيو فهرست تيار کړل شوی. رياستي او شخصي ادارې که تجارت کول غواړي نو به د پاليسۍ په رڼا کې د وړاندې نه اجازت نامه اخلي.
د روس نه د ارزانو تېلو د اخستلو د وړومبۍ پرېکړې وروستو د پيټروليم وزير مصدق ملک ويلي وو پاکستان به د لوظنامې سره سم د روس نه صفا شوي نه بلکې خام تېل اخلي.
په دې په اړه معلومات نشته چې تجارت به په کومه کرنسۍ کې کيږي خو ملک ويلي وو که هر څه د پلان سره سم لاړل پاکستان به د روس نه د ورځې نزدې 100,000 بيرله تېل واخلي.
تېر کال پاکستان 154,000 بيرله تېل درامد کړي وو. په مې کې د پاکستان د پيټرولو سوداګرو شکايت کړی وو پاکستان ته د 35 فیصده پورې ډيزل د ايران نه قاچاق کيږي.
پاکستاني حکومت افغانستان ته د اوړو، غنمو، چينۍ لا بورې او سرې په قاچاق بندېز لګولی دی.
یادونه:- د دې خبر معلومات له رویټرز خبري ایجنسۍ اخیستل شوي دي.
