د اختر تیارۍ او د پیښوربازارونو کې گڼه گوڼه

پېښور —  د نړۍ مسلمانان درمضان دمياشتې سرته رسيدو سره سم د دوړوکي اختر تيارۍ شورو کړي. هم دغه رنگ خيبرپښتونخوا صوبه کې هم خلک داختر دپاره په تيارو بوخت دي اؤ په بازارونو کې رش جوړ شوى دى.
دخيبرپښتونخوا حکومت اؤ پوليس دوړاندې څخه داختر په موقع دامنيت ټينګولو اؤ درش کنټرول کولو دپاره ځانګړي پلانونه جوړ کړي دي.
داختر دپاره خريداري عمل خو درمضان دمياشتې سره سم پيل شوى، خو دروژې دپنځلسمې څخه وروستو په پاکستان کې دخلکو د خريدارۍ په جوش وجذبه کې زيات شدت ليدل کيږي، روزانه ډلې ډلې ميرمنې، مشران، ځلمي اؤ ماشومان بازارونو ته اوځي اؤ داختر دپاره سوداګانې اخلي.
درمضان په وروستو ورځو کې دپيښور اؤ دصوبې دنورو برخو لويې بازارونه تر نيمو شپو يا هم دپيشمني پورې پرانستي پراتۀ وي اؤ په بازارونو کې د بلپونو په رڼاگانو سينگار شوي دوکانونه له ورايه ځليږي.
ددوکانونو ترڅنګ په بازارونو اؤ لارو کوڅو کې هم دخلکو دلچسپۍ ته په کتلو سره کاروباريانو دبنګړو، نکريزو اؤ دډول سينګار دنورو سامانونوواړۀ واړۀ سټالونه لګولي دي چې په دغه سټالونو زياتره وخت دپيغلو اؤ ميرمنو رش ښکاريږي.
دوړوکي اختر دپاره دنوؤ جامو اؤ پيزار کولو رواج دپخوا راهسې په پښتنه ټولنه کې راروان دى، له دغه امله تر ټولو زيات رش دڅپلو ، جامو اؤ درزيانو په دوکانونو ليدل کيږي.
داختر په سحر ميلمنو ته دچائيو سره د مټایانواو نورو خوږو سوغاتو وړاندې کولو دپاره هم ډلې ډلې خلک دبيکرۍ اؤ مټايانو دوکانونو ته ورځي اؤ دخپل ضرورت خواږۀ ترې اخلي.
سږکال په پيښور اؤ دصوبې په نورو برخو کې که هر څو دکپړې نرخونه سيوا شوي اؤ درزيانو هم دجامو ګنډلو نرخونه ددريوؤ سوؤ څخه شپږو سوؤ روپو ته سيوا کړي، خو بيا هم ددرزيانو په دوکانونو دومره رش جوړ دى چې زياتره درزيانو داختر څخه ١٥ ورځې دمخه دجامو اخستل بند کړي دي.
په پيښور کې داختر په موقع دامنيت يقيني کولو دپاره لويو بازارونو اؤ حساسو سيمو ته غځيدلي سړکونه دپاټکونو په اچولو سره بند کړل شوي اؤ دپوليسو اؤ استخباراتو اهلکار په ګڼ شمير کې په ساده جامو اؤ وردۍ کې په څارنه ګمارل شوي دي.