د پاکستان ځایي رسنیو خبر ورکړی چې د خیبرپښتونخوا په صوابۍ ضلعه کې د پولیو د واکسین پر یو ټیم، د نامعلومو افرادو لخوا حمله شوې چې په کې یوه زنانه کارکوونکې وژل شوې او یوه زخمي شوې ده.
د صوابۍ پولیسو ویلي چې دغه برید نن د نامعلومو بریدگرو لخوا چې پر موټرسایکل سپاره و، ترسره شوی دی. پولیسو زیاته کړې چې ټپي شوې کارکوونکې، روغتون (هسپتال) ته منتقل کړی شوې ده.
په همدې حال کې د صوابۍ د پولیسو مشر ډیپټي کمېشنر شاه محمود رسنیو ته ویلي چې انتظامیې د پېښې د پلټنې چارې پیل کړي او د بریدکوونکو خلاف به سخته کاروایي کیږي.
ډیپټي کمېشنر شاه محمود دا هم ویلي چې د نننۍ پېښې باوجود به، په صوابۍ ضلعې کې د پولیو مهم جاري پاته وي.
دا برید په داسې حال کې مخې ته راغلی چې د خېبرپښتونخوا صوبې په پنځلسو ضلعو کې د پولیو خلاف یو ځانگړې تازه درې ورځېنی مهم پیل شوی، او په پام کې ده چې څه د پاسه څلور میلینه ماشومانو ته د پولیو قطرې ورکړل شي.
په دې کمپین کې به هغو ماشومانو ته چې عمرونه یې له پنځو کلونو کم وي، د پولیو د P2 ډوله وایرس ضد قطرې ورکړل شي.
د خیبر ضلعې د صحت د چارو ډایرکټر، ډاکټر طارق حیات وي او اې ډېوه ته ویلي چې په دې وروستیو کې د پولیو دوه کېسونه په خیبر کې پیدا شوي، او دوی کوشش کوي چې د ځانگړي مهم له طریقه د پولیو وایرس د خورېدو مخه ونیسي.