د پاکستان د صدر انتخابات نن د خالي/ شنبې په ورځ ټاکل شوي، د ملک د 14م صدر انتخاب کيږي، خو د سني اتحاد کونسل (تحريک انصاف حمايت يافته) صدارتي امېدوار محمود خان اڅکزي الېکشن کمېشن ته خط استولی او خواست یې کړی چې د نهم مارچ صدارتي انتخابات دې وځنډول شي.
د صدر د څوکۍ دپاره محمود خان اڅکزی د سني اتحاد کونسل او د پيپلز پارټۍ او اتحادي ګوندونو امېدوار اصف علي زرداري په مېدان کې دي د دواړو مقابله ده. محمود خان اڅکزي په خط کې الېکشن کمشنر سکندر سلطان راجه ته ویلي، چې د قامي او صوبايي اسمبليانو مخصوص څوکۍ اوس هم خالي دي.
هغه زياته کړې، که په ټاکلې نېټه (نهم مارچ) صدارتي انتخابات کيږي، نو دا په مخصوصو څوکو د منتخب کېدونکو اسمبلۍ د غړو د بنيادي اييني حقونو سرغړونه ده. هغه ويلي، په نيمګړي الېکټورل کالج کې صدارتي انتخابات کېدل غېر قانونه او د پاکستان د روح خلاف دي.
نوموړي زياته کړې، سني اتحاد کونسل په دغه حواله پېښور هايکورټ ته خواست کړی دی، او هيله لري چې د عدالت څخه به د مخصوصو څوکو په حواله فېصله د سني اتحاد کونسل په حق کې راځي.
د پاکستان پيپلز ګوند د سیند صوبې مشر نثار کهوړو ويلي، د محمود خان اڅکزي د انتخاباتو ځنډولو غوښتنه غېر جمهوري ده.
او د پاکستان ځايي مطبوعاتو د الېکشن کمېشن له قوله ويلي، صدارتي انتخابات به په ټاکلې نېټه کيږي.
د پاکستان الېکشن کمېشن په څلورم مارچ سني اتحاد کونسل ته د ښځو او لږکيو د مخصوصو څوکو ورکولو خواست رد کړی او په پينځم مارچ مخصوص څوکۍ په نورو ګوندونو وېشل شوي او سني اتحاد کونسل دغه پرېکړه په لاهور هايکورټ کې چېلنج کړې ده.
د جمعې په ورځ په قامي اسمبلۍ کې په مخصوص څوکو منتخب شوو غړو سوګند پورته کړی او د پاکستان تحریک انصاف ګوند يو مشر عمر ايوب ویلي، په اسمبلۍ کې دغه پورته کړل شوی سوګند غېر اييني دی هیڅ ارزښت نه لري.
د صدر انتخاب د الېکټورل کالج د لارې کيږي، او د هغې ترمخه د قامي اسمبلۍ، سېنېټ او بلوچستان اسمبلۍ د هر ووټر رای یو ووټ شمارل کيږي، خو د پنجاب، خېبرپښتونخوا او سيند اسمبلۍ څخه صدر ته ترلاسه کېدونکو ووټونو ته به د ملک تر ټولو وړې (بلوچستان اسمبلۍ) د ټولو ووټرانو په حساب وېش کيږي او ووټ به شمارل کيږي يا حسابيږي.
Forum