لاس رسیدونکی لینک

تازه خبر

پاکستان

 که پاکستان شیش محل دی نو قانوندان لطيف افریدی ولې ورته ښېرې کوي؟

وتلي قانوندان او سیاستدان لطيف افريدي ويلي دي چې په پاکستان کې څوک خپل حقونه غواړي نو ځورول کیږي او، ورته غدار ویل کیږي.

هغه د ډیوه سره په خبرو کې وویل په پاکستان کې دپوځیانو او سیاست دانانو سره د دروغو بوجۍ ډکې پرتې دي. هغه وویل که څوک رښتیا اوواي بیا ورباندې د بغاوت تور پورې کیږي.

د لطيف افريدي په خیال د پښتون ژغورنې غورځنگ مشران چې څه واي ټول رښتیا دي. هغه وویل د لکونو په شمېره کې کورونه ړنگ دي او نر ښځې ورک دي.

د پي ټي ایم مشران د پاکستان نه د حقیقتونو ښکاره کولو د یو قامي کمیشن د جوړولو او د بې درکه کړل شوي خلقو محکمو ته وړاندې کولو اود پښتنو په ناحقه د وژنو ودرولو غوښتنه کوي.

د پاکستان د پوځ ځواب

د پاکستان پوځ دعوا کوي چې په شمالي وزیرستان او پخوانۍ فاټا کې یې دترهگرو په ضد عملیاتو کې گټې کړي دي. د هیواد پوله یې خوندي کړی ده او په کور دننه د اولس د تحفظ لپاره یې سترې قربانۍ ورکړي دي.

پوځ وايي د بل په لمسه په هیواد کې اړی گړی جوړیږي. تیر کال د دسمبر په میاشت کې پوځي مشر جنرال قمر جاوید باجوه ویلي وو پاکستان اوس د برېښنایي جگړې د گواښونو سره مخ دی. هغه ويلي وو:

"د دښمن په چالونو ځان پوهه کول او هر وخت دهغې دجواب ورکولو دپاره بیدار اوسیدل پکار دي، په میډیا، فکري محاذ او د انټرنیټ په نړۍ کې به ټولو خبرو ته دځواب ورکولو دپاره تیار پاتې کیدل پکار دي" هغه دکومې ډلې یا فرد له نوم اخستلو پرته ویلي وو:

"دنوو گواښونو مرکزي کردارونه زمونږ خپل خلک دي،دا خلک کرکې،خواهشاتو،ژبې،مذهب او دټولنیزو رسینو بریدونو بې لارې کړی دي،زمونږ خپل زلمي او پېغلې ددغسې گواښونو او تندو بیانیو ښکار کیږي، ددې مقابله کې به مونږ ته زیاته غوره بیانیه وړاندې کول وي"

پاکستان د پوځ ویاند مېجر جنرل اصف غفور د تېرې میاشتې په سر کې ويلي وو، پي ټي ایم د عدم تشدد په لار روان تحریک دی او دوي خواهش لري چې د پي ټي اېم مشرتابه د خپلو خلکو د گټې دپاره د حکومت سره خبرې وکړي.

خو هغه پي ټي اېم ته خبرداری ورکړی وو چې که له سرې کرښې او خپله حده واوختل نو ریاست به مجبوره شي چې له خپل واک څخه کار واخلي.

please wait

No media source currently available

0:00 0:12:26 0:00

لطیف افريدي وویل په پاکستان کې پوځیان تر ټولو زیات دروغ واي، د افريدي مطابق دوي د ځان نه د پېغمبر اولاد جوړ کړي دی.

د بشري حقونو د سر غړونې په حقله د یو تپوس په ځواب کې هغه تور پورې کړو چې په پاکستان کې تل د بشري حقونو سر غړونه شوی ده خو څوک خپله غلطي نه مني.

په خپرونه کې د ټليفون په ليکه یو اوریدونکي وویل چې د پي ټي ایم د لاسه په پاکستان کې خانه جنگي شورو کیدی شي.

اوریدونکي ته په ځواب کې لطيف افريدي وویل که دا پاکستان دغسې شیش محل وي نو خداي دې وکړي چې سبا له پکې خانه جنگي شورو شي.

لطيف افريدي وویل چې وس هم د خلقو حقونه ځکه تروړل کیږي چې وسنی حکومت پوځ په زور راوستی دی. د لطيف افريدي په خیال دعمران حکومت جمهوري نه دی. د عمران خان گوند او پوځ دغه تور ردوي چې وسنی حکومت پوځ جوړ کړی دی.

د فرورۍ په شږمه دپاکستان سپریم کورټ پخپله یوه پرېکړه کې ويلي وو دپاکستان دستور پوځ دسیاسي فعالیتونو دبرخې جوړیدلو څخه منعې کوي او پوځ دیو سیاسي گوند یا شخصیت ملاتړ هم نه شي کولی.

سترې محکمې پخپله پرېکړه کې ویلي وو سیاسي گوند جوړول او احتجاج کول دهر چا ایني حق دی خو داحتجاج په حق باید دنورو خلکو اساسي حقونه د پښو لاندې نه کړل شي.

لطيف افريدی د ملتپال عوامي نیشنل گوند مهم مشر هم دی. په ای این پي تور دی چې د پوځ په لمسه د پي ټي ایم مخالفت کوي او خپل دوه غړي افراسیاب خټک او بشرا گوهر یې هم د پي ټي ایم د ملاتړ په تور له گونده گوښه کړي دي.

افريدي دغه تور رد کړو چې گني د عوامي نیشنل گوند مشران د پي ټي ایم په ضد دي.

هغه وویل د ارمان لوڼي په وژنه دوي په بلوچستان صوبه کې هړتال وکړو او د پښتونخوا بار کونسل هم هړتال وکړو.

د لطيف افريدي تر مخه د اسفندیار خان نه تر وړوکي لیډر پورې د گوند ټولو مشرانو د ارمان لوڼي د وژلو مذمت کړی دی.

See all News Updates of the Day

باجوړ کې امن جرګه شوې او د امن پاڅون اعلان شوی

فائل تصویر: باجوړ کې پخوا هم د امن دپاره مظاهرې شوې دي
فائل تصویر: باجوړ کې پخوا هم د امن دپاره مظاهرې شوې دي

د افغانستان سره په پوله د خېبرپښتونخوا قبايلي ضلعه باجوړ کې امن جرګه شوې او جرګې اعلان کړی د روانې مياشتې جولايۍ په 30مه نېټه به باجوړ کې امن پاڅون کيږي، بشپړکاربنديز به وي.
باجوړ کې امن جرګه پرون د جولايۍ په 18مه نېټه شوې ده.

د جرګې وروسته يو ځايي مشر ملک ګل کريم خان مطبوعاتو سره خبرو کې ويلي، جرګه کې د امن پاڅون پريکړه شوې، د پاڅون دپاره کميټي جوړه کړل شوه، سياسي او قامي مشران به پکې وي، او پاڅون دپاره به تګلاره جوړوي.

هغه زياته کړې، په 30مه جولايۍ به باجوړ کې امن پاڅون وي، ټول باجوړ کې به کاربنديز وي، ټول ګاډي به خار ته راټوليږي، د باجوړ ټول ولس، سياسي او قامي مشران او ټول خلک به د اتحاد څرګندونه کيږي.

هغه ویلي، پاڅون به یې د دوی سره کېدونکي ظلم، قتل عام، چاودنو او هدفي وژنو خلاف وي.

د جرګې په اړه د عوامي نېشنل ګوند ځايي مشر مولانا خانزېب ويلي، جرګې چې د کوم امن پاڅون اعلان وکړو، د باجوړ ټول ولس به د پاڅون دپاره راووځي ځکه چې بدامني د ټول ولس مسله ده.

هغه زياته کړې، دوی د دې خاورې او ولس دپاره امن غواړي، د دوی پاڅون د چا پرضد نه دی، امن د رياست هم ضرورت او ولس هم ضرورت دی ځکه دوی رياست ته وير کوي چې په ټوله پښتونخوا کې دې امن په ځای کړي.

باجوړ کې د امن پاڅون اعلان په داسې وخت کې شوی، چې په 15مه جولايۍ د خېبرپښتونخوا په جنوبي ضلعې بنو کې په پوځي چاوڼۍ د وسله والو په برید کې اته پوځيان او10 ترهګر وژل شوي وو. بنو کې نن د ناامنۍ ضد او امن دپاره کاربنديز اعلان شوی دی.

په 16مه جولايۍ د پاکستان پوځ ويلي وو، وسله والو د ډېره اسماعیل خان په کلیواله سیمه کې د صحت په یو مرکز حمله کې پينځه ملکي کسان وژلي او د وسله والو په نښته کې دوه عسکر هم وژل شوي وو.

په نهمه جولايي پوځ ويلي وو په وزيرستان کې يې د يو کېپټن په ګډون څلور پوځيان وژل شوي او په لسمه جولايۍ د پېښور حسن خېلو کې د لټون د عملياتو په وخت انښته کې دوه پوليس او دوه پوځيان وژل شوي وو.

په پينځمه جولايۍ د خېبرپښتونخوا په مردان ضلعه کې يوه چاودنه کې لږ تر لږه درې کسان وژل شوي او اووه نور ژوبل شوي وو، له دغې وړاندې په درېمه جولايۍ باجوړ کې د پخواني سېنېټر هدايت الله خان ګاډی د ريموټ کنټرول د لارې بم چاودنه کې په نخښه کړل شوی، هدايت الله خان او هغه ‏سره څلور نور کسان پکې وژل شوي وو.‏

په 22م جون د پاکستان د وزيراعظم شهباز شریف په مشرۍ د اېپکس کمېټۍ په غونډه کې په ملک کې د ترهګرۍ او توندروۍ پرضد د [عزمِ استحکام] په نوو عملياتو منظوري ورکړې وه.

په پينځمه جولايۍ د پاکستان د پوځ د کور کمانډرانو غونډه شوې او ويل شوي وو، "فورم د ملکي امنيت د مجموعي صورت حال جايزه اخستې او عزمِ استحکام په مختلفو اړخونو پکې تفصیلي بحث" شوی وو.

د پاکستان پوځ ويلي وو، د کور کمانډرانو په غونډه کې په ملک کې د تلپاتې ثبات او اقتصادي خوشالۍ دپاره عزمِ استحکام د ترهګرۍ او غېر قانونه هلوځلو ختمولو دپاره د وخت تقاضا ګرځول شوې وه".

خواجه اصف: ملک کې "آييني کړکېچ په راتلو دی، که ژر وي او که وروستو"

Pakistan FM Khwaja Asif USIP
Pakistan FM Khwaja Asif USIP

د پاکستان د دفاع وزير خواجه اصف ويلي، په ملک کې "آييني کړکېچ په راتلو دی، که ژر وي او که وروستو". هغه ويلي، "د آيين ماتېدل په نظر راځي"، خو نوموړي ويلي، د "مارشل لا" لګېدو خبره نه کوي.

د پاکستان د (جيو ټي وي) په يو پروګرام کې خواجه اصف په تحریک انصاف ګوند د بنديز لګولو او د ملک د عدليې د سياسي کردار په اړه څرګندونې کړي دي.

هغه ويلي، د ملک ټولې ادارې سياسي شوي، او عدليه پکې په اول نمبر ده.

پاکستان کې آييني کړکېچ

د خواجه اصف په خبره، "زه محسوسوم، کوم معلومات نشته، او نه د دې په شا زما کوم دليل نشته، خو آييني کړکېچ په راتلو دی، که ژر وي او که وروستو".

د هغه نوموړي نه پوښتنه شوې، مارشل لا به لګي؟ په جواب کې نوموړي وويل، "زه د مارشل لا خبره نه کوم، خو د آيين ماتېدل په نظر راځي". هغه زياته کړه، "زه په دغې حواله نور تفصيل نه وايم په دوه، څلور او د لسو ورځو پورې به هر څه په خپله په ډاګه شي".

د نوموړي نه پوښتنه شوې، د معاشي درجه بندۍ نړیوالې ادارې "فیچ په خپل رپورټ کې ستاسو د حکومت 18 مياشتې موده ياده کړې چې 18 میاشتې به وچلیږي او د هغې وروسته به انتخابات نه وي یو ټېکنوکرېټ نظام به راځي، او تاسو د ايين ماتېدو خبره کوئ".

خواجه اصف ويلي، "کوم ډول حالات چې روان دي د منلو وړ نه دي، اوسني حالات د تېر نه زيات سخت دي، فيچ چې 18 مياشتې موده یاده کړې دا اوږد وخت دی، خو زمونږ د سياسي ورورولۍ خلک هم تيار ناست دي چې څه ډول پېښه وشي او هغو د فيچ رپورټ ليدلی دی هغوی پکې خپل راتلونکی ګوري".

د فيچ رپورټ

فیچ د پاکستان په اړه خپل تازه رپورټ کې اټکل کړی چې د دې هیواد موجوده حکومت تر یو نیم کال پځای پاتې کیدای شي او که حکومت بدل شي نو بیا د سره به ټولټاکنې نه کیږي بلکې د ټیکنوکریټانو حکومت به جوړیږي.

په رپورټ کې ویل شوي د تحریک انصاف ګوند باني عمران خان به په نزدې راتلونکي کې له بنده نه خلاصیږي او دا چې د پاکستان په ښارونو کې احتجاجي مظاهرې د هیواد معاشي فعالیتونه اغېزمنولی شي.

د فیچ په رپورټ کې ویل شوي چې د پاکستان معاشي بحالي د نازک صورتحال سره مخ ده او سیاسي صورتحال د معیشت مخې ته ډب کیدای شي.

تحریک انصاف باندې بنديز

خواجه اصف ويلي، په تحریک انصاف ګوند د بنديز فيصله د وخت نه مخکې شوې او په دې لړ کې د اتحاديانو سره مشوره ضروري ده او چې څه اتفاق رای جوړه شي د هغې مطابق به ګام اخستلی شي.

په 15مه جولايۍ د پاکستان د اطلاعاتو وزير عطا تارړ ویلي وو، حکومت په تحريک انصاف ګوند د بنديز لګولو فيصله کړې او حکومت به د مخصوصو څوکيو د فيصلې په اړه د نظرثانۍ خواست کوي، د پخواني صدر عارف علوي، د پخواني وزيراعظم عمران خان او پخواني ډپټي سپيکر قاسم سوري پرضد به د آيين د شپږمې مادې لاندې د غدارۍ مقدمه کوي.

امریکې د پاکستان د حکومت له لوري په تحریک انصاف ګوند د بندیز لګولو په پرېکړه اندېښنه ښکاره کړې او ویلي یې وو، چې د بندېز لګولو دا پرېکړه د یو پېچلي سیاسي عمل پیل ښکاري.

په تحريک انصاف نيوکې او ترهګري

خواجه اصف په پاکستان تحریک انصاف ګوند هم نيوکې کړي، چې نه يواځې يې د (عزم استحکام) عملياتو مخالفت کړی، بلکې د ترهګرۍ پرضد جګړه کې د وژل شوو فاتحې او پوښتنې له هم نه ورځي.

هغه ويلي، د ترهګرۍ پرضد سياسي اتفاق رای ضرور جوړېدل پکار دي، خو د تحریک انصاف رويه داسې رويه ده چې د ترهګرۍ په پېښو کې د اغېزمنو کورنيو سره افسوس نه کوي او نه د ترهګرو پرضد بيان ورکوي.

خواجه اصف ويلي، "دا وخت د خېبرپښتونخوا په جنوب کې د شپې په مهال د ترهګرو حکومت وي، او ترهګر په چونګي ماليه ټولوي، په ډېرو ځايونو کې د خېبرپښتونخوا حکومت عملداري نه وي، مونږ یې مرستې ته حاضر يو، خو دوی دې خپله خو وګوري، دا حالات ولې داسې جوړ شوي دي، دوی يې په وړاندې مبارزه ولې نه کوي، دوی ولې مصالحانه او معافي غوښتونکي جوړ شوي دي د هغوی په وړاندې".

پښتونخوا کې ترهګري او د صوبايي حکومت غبرګون

د دفاع وزیر خواجه اصف دغه څرګندونې په داسې وخت کې کړي، چې د پاکستان د پوځ په وينا، په 15مه جولايۍ په بنو پوځي چاوڼۍ د وسله والو په برید کې اته پوځيان او10 ترهګر وژل شوي وو.

له دغې وروسته په 16مه جولايۍ پوځ ويلي وو، وسله والو د ډېره اسماعیل خان په کلیواله سیمه کې د صحت په یو مرکز حمله کې پينځه ملکي کسان وژلي او د وسله والو په نښته کې دوه عسکر هم وژل شوي وو.

د خېبرپښتونخوا صوبې وزيراعلا علي امین ګنډاپور ويلي وو، "زمونږ صوبې ته د ترهګرۍ غټ چېلنج ورپېښ دی، پوليس، ادارې، پوځ او ولس يې پرضد جنګيږي، قربانۍ د ټولو په وړاندې دي د روانو حالاتو څارنه کوو".

هغه ويلي وو، هغه وويل، "مونږ د ترهګرۍ مقابله کوو او روانه به وي، او کومې پېښې چې روانې دي او کوم خلک یې کوي، د وخت سره به د هغو هم مخه ونيول شي، په دې د هیڅ جوړ جاړي خبره نشته، په امنيت او ترهګرۍ په ختمولو هيڅ جوړ جاړی نه کوو، زمونږ اصل چېلج او اصل کار هم دغه دی".

"له جنت سواته د بلوچستان د کولې دوزخ ته ځو": په پاکستان کې سږ کال 111 کارګر مړه شوي

په پاکستان کې روان کال د کولې په درنګونو یا کانونو کې په بېلابېلو پېښو کې د مړه شوو مزدورانو شمېر 111 ته رسېدلی، په مړو کې زيات شمېر د خيبر پښتونخوا په خاصه د سوات د شانګلې سیمې د مزدورانو دی.

روان کال د جولای مياشتې په اتلسو ورځو کې په ټول پاکستان کې 19 د کولې مزدوران مړه شوي دي، په بلوچستان او پښتونخوا کې په تيره يوه اونۍ کې نهه مزدوران مړه شوي دي.

د چارشنبې- شورو په ورځ د هرنايي ضلعې په لعل خان کول ماينز کمپنۍ نومي سيمه کې څلوېښت کلن نعمت اللہ سنزرخیل په کوله کان کې مړه شوی دی.

د چارواکو په وينا نعمت الله د هرنايي اوسېدونکی دی او هغه د کولې په کان کې د زهرجن ګېس د جمع کېدو له کبله مړ شوی دی.

له همدې پېښې سره په تېره شاوخوا يوه اوونۍ کې په بلوچستان کې د کولې په کانونو کې د مړو شوو مزدورانو شمېر درې شوی، خو د پښتونخوا او سيند صوبې په ګډون د مړه شوو ټولو مزدورانو شمېر 11 ته رسېدلی او دا ټول پښتانه مزدوران دي. په مړه شوو کې 10 تنه د پښتونخوا صوبې دي.

په کوټه کې د پښتونخوا صوبې یو د کولې کارکوونکی خورشيد وایي، د دوی سیمې بحرين، مينګوره، شانګله او کالام د جنت غوندې دي، خو وایي هلته مزدورۍ او کارونه نشته نو ځکه بلوچستان ته "د کولې کانونو دوزخ" ته راځي:

"درې زره، څلور زره فيټه لاندې ځو د کولې په کانونو کې، دلته هم موږ ته سهولتونه نه شته، چې ملګړی مو خوږ شي نو په شا يې تر ډاکټر پورې وړو، ايمبولنس نه شته او مرګونه خو هره ورځ وي، په مياشت کې مرګونه تر شل اوړي".

د پاکستان سنټرل ماينز لېبر فېډريشن رپورټ دی چې په ټول پاکستان کې روان کال په جلا جلا پېښو کې 111 تنه مړه شوي چې په سيند صوبه کې پينځه، په پنجاب کې 10، په پښتونخوا کې 29 او د تېرو کلو په څېر تر ټولو زيات په بلوچستان کې 67 د کولې مزدوران مړه شوي دي، چې زياتره د سوات او شانګلې دي.

د پاکستان سېنټرل ماينز لېبر فېډريشن صدر لالا سلطان وایي، د کارګرو خوارانو پر مخ او سر باندې يو څادر او ګونۍ [بوجۍ] واچوي چې که په کان کې دننه چاودنه کېږي او دوی پکې مري نو د دوی شناخت به بيا په اسانه کېږي:

"دا ظلم او بربريت دی، د ملک د غريبانو او اميرانو په ګډه ملک دی، بايد دې ته توجه وشي، ما و چيف سيکرېټري ته ليکلي دي چې نوره دې دا د ماينز انسپېکټريټ زړه عمله بدله کړه".

د سوات او په خاصه د شانګلې خلک له حکومته د کار او دوی ته پر کلي وطن د روزګار نه برابرولو ګیلې کوي.

د همدې جواب لپاره مو د مسلم ليګ ن د پښتونخوا صوبې صدر او له شانګلې څخه د پاکستان قامي اسمبلۍ ته کاميابه شوي او وفاقي وزير امير مقام سره د ټيليفون له لارې تماس ونيو.

اول د هغه ټيليفون اوچت کړل شو، له تعارف وروسته وي او اې ډیوه ته وويل شو چې" نيم ساعت پس ټيليفون وکړئ، صاب به له تاسو سره خبرې وکړي" خو وروسته د ډېر زيار ايستلو باوجود له وفاقي وزير سره په دې اړه سوال جواب ونه شول.

لالا سلطان د کولې په کانونو کې د مرګونو پېښو ذمه واري پر حکومت او اړوند ادارو اچوي.

په دې اړه مو د بلوچستان د ماينونو د محکمې له سېکرټري سيدال خان لوڼي سره د ټيليفون له لارې تماس ونيو خو هغه هم ځواب ونه وايه.

تر دې وړاندې حکومتي چارواکو او ياد سيکرېټري په بيا بيا د مرګونو پېښو ذمه واري د کولې کانونو پر ټيکه دارانو او مزدورانو اچوي او وايي هغه احتياط نه کوي نو ځکه داسې پېښې کېږي.

د پوهانو په وينا په کوله کانونو کې زياتره مرګونې پېښې د زهرجن ګېس د جمع کېدو، چاودنې، اور لګېدو، د هوايي لارې د نشتوالي، کانونو ته د باران په وخت د اوبو ننوتلو، د اوسپنيزې رسۍ د پرې کېدو او ځينو نورو وجوهاتو له کبله کېږي.

د مزدورانو لپاره کارکوونکو تنظيمونو د مشرانو په وينا دا ځکه چې په شته قوانينو باندې عمل شته او اړوندې ادارې یې څارنه نه کوي.

د بلوچستان د ماينونو محکمې چارواکي د کال په اربونو روپو ټېکس تر لاسه کوي خو پر دې برسيره هم دا مني چې دوی په صوبه کې د انتظامي عملې او وسايلو له کمۍ سره مخ دي.

د پاکستان سېنټرل ماينز لېبر فېډريشن رپورټ دی چې په بلوچستان کې د بېلابېلو قدرتي معدنياتو تر يو لک زيات قانوني او ناقانونه ماينونه يا درنګونه دي چې پکې تر يو نيم لک زيات مزدوران کار کوي.

وايي په دې کې تر يو لک زيات مزدوران د کولې په کانونو کې کار کوي، د تنظيم د مشرانو په وينا په يو نيم لک کې يوازې 6,500 مزدوران له حکومت سره رجسټرډ دي.

د رپورټ له مخې په کال 2023م کې په ټول پاکستان کې په نورو صوبو کې 148 خو يواځې په بلوچستان کې د سکرو په کانونو کې 122 مزدوران په بېلابېلو پېښو کې مړه شوي وو.

د بلوچستان صوبې د سکرو په کانونو کې زياتره د پښتونخوا د شانګلې او سوات، افغانستان او د بلوچستان ځايي مزدوران کار کوي چې هغه هم زیاتره پښتانه دي.

اقتصاد پوهان: د پاکستان د ونډو بازار د آی اېم اېف سره د موافقې له امله په بره روان دی

د سټاک اېکسچېنج ترمخه، د ونډو بازار د کاروباري ورځې پيل د 81,155 پواينټونو نه پيل شوی او نزدې درې بجې پکې 663 پواينټونه سېوا شوي وو.
د سټاک اېکسچېنج ترمخه، د ونډو بازار د کاروباري ورځې پيل د 81,155 پواينټونو نه پيل شوی او نزدې درې بجې پکې 663 پواينټونه سېوا شوي وو.

اقتصاد پوهان وايي، د پاکستان د ونډو بازار (پاکستان سټاک اېکسچېنج) بره تلو علت د نړيوالې مالياتي ادارې (آی اېم اېف) سره د پور لومړۍ موافقه کېدل دي، خو د دې عام ولس ته نېغ په نېغه ګټه نه رسي.

د پاکستان د ونډو بازار د وېب پاڼې ترمخه، نن په 18مه جولايۍ د ونډو بازار کې د سر د سلو کمپنو کاروبار د 670 پواينټونو نه زيات بره تللی دی.

د سټاک اېکسچېنج ترمخه، د ونډو بازار د کاروباري ورځې پيل د 81,155 پواينټونو نه پيل شوی او نزدې درې بجې پکې 663 پواينټونه سېوا شوي وو.

اقتصاد پوه جبران سرفراز وايي، د کله نه چې د نړيوالې مالياتي ادارې (آی اېم اېف) سره د پاکستان د سټاف لېول يا عملې په کچه د پور په پروګرام اتفاق شوی دی، د هغې وروسته د ونډو بازار په بره روان شوی دی.

آی اېم اېف په 12مه جولايۍ پاکستان ته د درېو کلونو دپاره د اووه بيلينه ډالرو قرض په ورکولو په ابتدايي کچه د اتفاق کولو اعلان کړی وو.

مطبوعاتو ته په لېږلي پيغام کې آی اېم اېف ويلي وو، پاکستان ته د نوي قرض ورکولو فېصله د سټاف یا د عملې په کچه شوې او د آی اېم اېف اېګېزکټیو بورډ منظورۍ ته به ضرورت لري.

د بورډ د منظورۍ وروسته به پاکستان ته د 37 میاشتو دپاره اووه بيلينه ډالره ورکول کيږي.

آی اېم اېف ويلي، دغه پور به د پاکستاني چارواکو لخوا د اقتصاد او ثبات او پرمختيا په لړ کې د ګامونو پورته کولو په سر ورکوي.

ايي اېم اېف وویل په دغو ګامونو کې د پاکستان مالیاتي پاليسي ښه کول، د ټېکس جال د پراخولو په لړ کې اصلاحات، د ریاستي تجارتي ادارو انتظام ښه کول، سرمایه کارۍ دپاره هوار مېدان جوړول، انساني صلاحیت ښه کول او د بېنظیر انکم سپورټ پروګرام د لاندې سماجي تحفظ او په دې کې د زیات سخاوت نه کار اخیستل شامل دي.

وي او اې ډيوه سره خبرو کې جبران سرفراز وويل، د ونډو بازار په بره تلل د مارکيټ دپاره ښه اشاره ده، بهرنۍ پانګونې به راشي، کاروباري مسلې به ورسره کمې شي.

اقتصاد پوه جرنلسټ وکیل الرحمان هم وايي، د ونډو بازار د آی اېم اېف سره د تړون له امله په بره روان دی.

خو نوموړی وايي، د ونډو بازار په بره تلو په عامه کچه ولس ته خېر نه رسي.

وي او اې ډيوه سره خبرو کې هغه وويل، پاکستان کې د پانګونو نورې لارې بندې دي، پانګه وال ټولې پانګونې د ونډو په بازار کې کوي، ځکه چې د بېنکونو په کاروبار کې زیاته ګټه نشته او د ځمکو کاروبارونه په ټپه ولاړ دي، خلک ځکه د ونډو بازار ته را روان دي.

هغه زياته کړه، عام ولس ته هغه وخت خېر رسي چې نوي کاروبارونه، صنعتونه روان شي، د روزګار موقعې په لاس ورشي، د ملک نه بهر تجارت سېوا شي، نو د ونډو بازار نېغ په نېغه په دغو شعبو کې کومه برخه نه لري.

ایا پښتونخوا کې د ترهګرۍ وروستۍ پېښې "عزمِ استحکام " عملیاتو ته د ترهګرو ډلو غبرګون دی؟

د پاکستان په خېبر پښتونخوا صوبه کې په دوؤ ورځو کې دننه د ترهګرئ په بیلابیلو پېښو کې د ۱۰ امنیتي عسکرو په ګډون د ۲۸ؤ کسانو وژنې د صوبې په امنیتي وضعه پوښتنې راولاړې کړې دي.

څېړونکي وایي په پاکستان کې د امنیتي ځواکونو له لوري د ترهګرو په ضد عملیاتو کې چټکتیا راوستل شوې چې له هغې وروسته اوس ترهګرې ډلې هم د سترو بریدونو هڅه کوي.

څېړونکي په دې اند دي چې له هر پوځي اپرېشن وروسته تندلاري په نور زیات قوت سره مخې ته راغلي دي.

د ګل- دوشنبې په ورځ د پښتونخوا په بنو چاوڼې یو ترهګریز برید شوی ؤ چې پوځ په دې برید کې د اتوؤ عسکرو وژنه تایید کړې اؤ دعوه یې کړې ده چې ۱۰ ترهګر یې هم وژلي.

پوځ پخپل بیان کې ددې برید پړه نیغ په نیغه د پاکستاني طالبانو په حافظ ګل بهادر ډله ور اړولې ده.

پاکستان په دې پېښه په افغانستان د واکمنو طالبانو حکومت ته احتجاج کړی اؤ په اسلام اباد کې د طالبانو د حکومت مرستیال چار سمبالی یا ناظم الامور خارجه دفتر ته غوښتل شوی اؤ په دې پېښه ورته احتجاجي چیټۍ یا مراسله سپارل شوې ده.

د طالبانو حکومت لا د بنو په پېښه د پاکستان احتجاج ته څه غبرګون نه دی ښودلی.

په یوه بله پېښه کې اوړمه ورځ د ډيره اسماعیل خان سره نزدې په یو کلیوال روغتیایي مرکز شوي برید کې د دوؤ ماشومانو اؤ دوؤ مېرمنو په ګډون پینځه کسان وژل شوي وؤ.

د پوځ د دعوې له مخې په ځوابي کارروایۍ کې دوه پوځیان اؤ درې ترهګر هم وژل شوي وؤ.

دا پېښې په داسې مهال مخې ته راغلي چې په دې وروستیو کې د پاکستان حکومت د ترهګرۍ د مخنیوي لپاره د عزم استحکام په نوم د نوؤ پوځي عملیاتو د پېل کولو منطوري ورکړې ده خو په خېبر پښتونخوا کې سیاسي ګوندونو اؤ مدني ټولنو ددې عملیاتو په کلکه مخالفت کړی اؤ د دې په ضد احتجاجونه هم شوي دي.

د امنیت په چارو ژور نظر لرونکی خبریال اؤ څېړونکی داؤد خټک وایي ، دا حقیقت دی چې معاملې په مذاکراتو نه حل کیږي نو بیا پوځي عملیات یوازینۍ لاره پاتې کیږي .

خو هغه وایي چې د طاقت په استعمال سره بیا هم سل په سله پایلې نه شي ترلاسه کیدای.

امریکا غږ اردو سره خبرو کې هغه ویلي چې تر دې وړاندې هم پوځ د ترهګرو په ضد یو شمیر عملیات کړي اؤ په دغو عملیاتو کې د کامیابۍ دعوې هم شوي خو د دغو دعوؤ سر بېره هم ترهګرې ډلې سر راپورته کوي.

هغه وایي پاکستان څخه د ترهګرۍ د نوغي ویستلو لپاره یوه کوټلې اؤ ګټوره تګلاره وجود نه لري.

د داؤد خټک په خبره، که وکتل شي نو په تېرو دوؤ لسیزو کې په باجوړ، مومند، خېبر، اورکزو، کورمه ، جنوبي اؤ شمالي وزیرستان کې ګڼ شمیر عملیات شوي اؤ په دې عملیاتو کې د سیمې خلک ډير زیات اغېرمن شوي هم دي.

نوموړی وایي ددې عملیاتو په نتیجه کې ځایي خلک د خپلو کورونو ، مالونو، څارویو، د بچو د تعلیم اؤ حتی له هر څه محروم شوي همدا لامل دی چې نن د پوځي عملیاتو په ضد غږ پورته کیږي.

داؤد خټک وایي که تېرو وختونو ته نظر واچول شي نو تندروه مشران نیک محمد، بیت الله مسید،حکیم الله مسید، ملا فضل الله، خالد سجنا اؤ داسې نور په امریکایي ډرون بریدونو کې وژل شوي اؤ دا خلک د پاکستان د پوځي عملیاتو نه خوندي وتلي وؤ.

د داؤد خټک په خبره ، همدا لامل دی چې خلک په پوځي عملیاتو پوښتنې راولاړوي.

د حافظ ګل بهادر ډله څومره پیاوړې ده؟

د داؤد خټک په وینا د ضرب عضب عملیاتو نه مخکې د حافظ ګل بهادر ډله هم د پاکستان د سیکیورټي اسټیبلشمنټ لپاره ګواښ نه ؤ دا ډله هم په غوره طالبانو کې شمیرل کېده.

هغه وایي حافظ ګل بهارد پخپله سیمه کې زیات اثر رسوخ لرلو اؤ هغه د القاعده اؤ د سیمې نورو تندروه ډلو سره اړیکې درلودې خو وایي کله چې د ضرب عضب عملیاتو نه وروسته د هغه د ډلې وسله وال هم افغانستان ته لاړل نو هلته یې د ټي ټي پي سره نزدیکت سیوا شو اؤ د دواړو ډلو اهداف هم شریک شول.

هغه زیاتوي چې د حافظ ګل بهادر ډله د القاعده په طرز عملیات کوي یعني په یو ځای کې د کارروایۍ په مهال وړومبی ځانمرګي برید وکړي اؤ بیا خپل وسله وال دننه کړي چې مقصد یې مخالف فریق ته زیات نه زیات زیان رسول وي.

د پاکستان د دفاع پخوانی سکتر لیفټننټ جنرال(ر) اصف یاسین وایي دهغه په دوره کې چې څومره پوځي عملیات شوي وؤ هغې ته ولسي ملاتړ ترلاسه ؤ همدا لامل دی چې نتیجې یې هم ورکړې وې.

جنرال اصف یاسین د پېښور کور کمانډر هم پاتې شوی ؤ اؤ د افغانستان د پولې سره د لګیدلو ټولو قبایلي سیمو څارنه د هغه په ماموریت کې شامله وه.

امریکا غږ سره خبرو کې هغه وایي د پوځ کار یوازې جنګیدل وي ځکه نو په هره سیمه کې له پوځي عملیاتو وړاندې د هغه ځای خلک په اعتماد کې اخستل د حکومت ذمه واري وي.

نور کتل

بي بي شیرینه

بي بي شیرینه – په ټیلې ویژن
please wait

No media source currently available

0:00 2:29:59 0:00
XS
SM
MD
LG