د پاکستان صدر اؤ وزیراعظم وایي ضروري ده چې خبریالانو ته له ویرې پاک چاپېریال ورکړل شي

د صحافت د ازادۍ د نړیوالې ورځې په مناسبت د پاکستان صدر اصف علي زرداري او وزیر اعظم شهباز شريف په جلا جلا بيانونو کې ویلي چي ټوله نړۍ کې خبریالان په خپل کار کې د چېلنجونو سره مخ دي او ضروري ده چې مونږ خبريالانو ته د وېرې څخه پاک چاپیریال ورکړو.

خبريالان وايي پاکستان کې نه يوازې د اظهار د ازادۍ قانوني حق تروړل کېږي بلکې د خبریالانو ژوند هم د خطر او ګواښونو سره مخ دی.

د جمعې په ورځ پاکستان کې د صحافت د ازادۍ نړيواله ورځ په داسې حال کې نمانځل شوې چې هم په دغه ورځ د بلوچستان په خضدار سيمه کې وتلی خبريال او د خضدار پرېس کلب صدر محمد صديق مېنګل په یوه چاودنه کې وژل شوی دی.

خبريال مبارک زېب خان وايي په پاکستان کې د وژل شويو صحافيانو قاتلان نه معلومول کېږي او نه په دغو وژنو کې ککړو کسانو ته تر اوسه سزا ورکړی شوې ده.

ډيوه سره خبرو کې هغه وایي ،نن هم په دې ملک کې صحافيان وژل کېږي، اغوا کېږي، پرضد یې مقدمې درج کېږي .

د مبارک زېب په خبره " ايف آي ار کول خو ډېره معمولي خبره ده، دلته نېغ په نېغه د صحافیانو قتلونه روان دي او مونږ چې کله په دې تناظر کې ګورو نو پاکستان دا وخت د صحافت دپاره يو بدترين ځای دی"

د صحافت د نړیوالې ورځې په مناسبت د خبريالانو د حقونو نړیوال تنظیم رپورټرز ود اوټ بارډرز جارى کړي رپورټ کې پاکستان د صحافت د ازادۍ په نړيواله درجه بندۍ کې دوه درجې په ښکته راغلی او دا هېواد د 180 هېوادونو په فهرست کې په 152 نمبر اچول شوی دی.

رپورټ کې ویل شوي زياتره حکومتونه او سياسي مشران د داسې چاپيریال په باوري کولو کې په ناکامه کېدو دي چې د صحافت تحفظ په کې باوري وي.

په پاکستان کې د صحافت د ازادۍ او د ميډيا کارمندانو د تحفظ لپاره کار کوونکی غېر دولتي تنظيم فريډم نېټ ورک دعوه کوي چې د تېر يو کال په موده کې په پاکستان کې د اظهار ازادۍ ته په پېښو خطرو کې اضافه شوې ده .

فريډم نېټ ورک په خپل رپورټ کې ويلي چې د تېر يو کال په مهال پاکستان کې څلور خبريالان وژل شوي او هم دې موده کې د صحافيانو پرضد 104 مقدمې درج کړی شوي دي.

د فريډم نېټ ورک پروګرام منېجر عدنان رحمت وایي ،مونږ وينو چې د صحافيانو ژوند هم د خطر سره مخ دی او د ورپېښو بنديزونو له کبله هغوي نه شي کولی چې د رایې د اظهار د ازادۍ د اييني ضمانت لاندې خپله مسلکي دنده ترسره کړي.

د پاکستان وزير اعظم شهباز شريف او صدر اصف علي زرداري د صحافت د نړیوالې ورځې په مناسبت خپلو جدا جدا بيانونو کې ویلي چي حکومت د صحافيانو تحفظ باوري کولو ته ژمن دی او وايي د اظهار ازادي د جمهوریت بنياد دی.

وتلی خبريال عامر غوري وايي د پاکستان په دستور کې د اظهار د ازادۍ 19 مه ماده د نړیوالې مادې څخه ډېره بدله ده.

ډيوه سره خبرو کې هغه وایي "پاکستان کې د 19 مې مادې سره دومره شرطونه تړل شوي دي چې بنده د څه ویلو نه وړاندې د مذهب، اسټبلشمنټ، حکومت او ټولنيز فشار په اړه څلور ځله سوچ کوي، په دې کې ازادي چرته باقي پاتې کېږي"

پاکستان د نړۍ په هغو دريوو هېوادونو کې شامل دی چې په کې د پيکا د تور قانون لاندې په ان لاېن فورم د رائ په ورکول کېدو هم مقدمې درج کېږي خو په نوره نړۍ کې بيا د سپکاوي د قوانینو لاندې اقدام کېږي.