پاکستان د ځمکې نه په ځمکه د وار کوونکي بیلسټک میزایل شاهین-۲ بریالۍ ازموینه کړې چې په دې ازموینه د هیواد صدر اؤ وزیراعظم ساینسدانانو اؤ انجنیرانو ته مبارکي ویلي ده.
د پاکستان د پوځ ویاندې ادارې اي ایس پي آر ویلي ددې تربیتي چمتووالي ښودلو مقصد د ځواکونو د تربیت، د بېلابېلو تیکنیکي اړخونو د توثیق اؤ د مختلفو ذیلي نظامونو د کارکردګۍ ارزونه کول وؤ.
د پوځ په بیان کې ویل شوي چې په دې تاریخي کامیابۍ کې ساینسدانانو خپله مهمه برخه اچولې ده.
اي ایس پي آر ویلي د تربیتي لانچ مشاهده د سټریټجک پلانونو ډویژن، د پوځ سټریټجک فورسز کمانډ، ساینسدانانو اؤ د سټریټجک تنظیمونو انجینیرانو اؤ اؤ لوړ پوړو افسرانو کړې ده اؤ د سټریټجک پلانونو د ډویژن مشر یا ډایریکټر جنرل د ساینسدانانو تکنیکي صلاحیت، جذبه اؤ عزم ستایلی دی.
د پوځ بیان زیاتوي چې د هیواد صدر، وزیراعظم، د ګډو ځواکونو د کمیټې مشر اؤ پوځي مشرانو په دې کامیابه ازموینه ساینسدانانو ته مبارکي ویلې اؤ د هغوي صلاحیتونه یې ستایلي دي.
تر دې وړاندې په ۲۶م مارچ کال ۲۰۲۱م کې پاکستان د ځمکې نه په ځمکه د وار کوونکي اټومي توغندي شاهین ۱ ای بریالۍ ازموینه کړې وه اؤ پوځ ویلي وؤ چې دا میزایل تر۹۰۰ کلو میټره خپل هدف په نخښه کولی شي.
همدا شان په جون کال ۲۰۲۱م کې هم پاکستان د شاهین ۳ په نوم دیو بل اټومي توغندي بریالۍ ازموینه کړې وه.
پاکستان د بلیسټک میزایل شاهین ۲ دا تازه ازموینه په داسې حال کې کړې ده چې د دې هیواد چارواکي پخپله مني چې اقتصاد یې په خراب حالت کې دی اؤ خپل ضرورتونه د نورو هیوادونو اؤ نړیوالو مالیاتي ادارو نه په سود د پورونو ترلاسه کولو د لارې پوره کوي.
تېره اوونۍ د پاکستان مرکزي بېنک وېلي وؤ په مالي کال ۲۰۲۳-۲۴م کې په پاکستان ورپورې بهرنۍ قرضې د ۸۵ ټريليونه روپو رېکارډ کچې ته رسېدلې دي.
څېړونکي اؤ تعلمي ماهر ډاکتر جميل احمد چترالي وي او اې ډيوه ته په دې وروستیو کې ویلي، اوس د وسلو په ځائ د ټيکنالوجۍ او عقل په بنیاد جګړې کیږي او ډېر داسې څيزونه دي چې اوس په هغې کې پاکستان ته اصلاحات کول پکاري دي.
د ښاغلي چترالي په وینا، که چيرې اقتصادي بدحالي، د تعليم اؤ صحت څانګو کې مشکلات او بې روزګاري ختمول وي نو دا هرڅه به هلته کېږي "چې کله مونږ په امنيت کیدونکو خرچو ته بيا کتنه وکړو".
Forum