د افغانستان صدر اشرف غني حکم کړی چې د تورخم او سپين بولدک دلارې به افغانستان ته د پاکستان سامانونه وړونکي ټرکونه نه داخليږي.
دغه حکم ته د پاکستان د حکومت يا سوداګرو په سمدستي ډول کوم غبرګون مخې ته نه دی راغلی.
د افغانستان د ټرانسپورټ د وزارت وياند حکمت الله قوانچ ويلي، "د پاکستان او افغانستان د سوداګرۍ د تړون وخت سرته رسېدلی، او پاکستان دې افغان ټرکونو ته خپل ملک ته د داخلېدو اجازه ورکړي، دغه شان به بيا افغانستان وکړي په پوله به پاکستاني ټرکونه پرېږدي او افغان ټرکونه به سامانونه تر د حېراتان او شېرخان بندر پورې وړي".
د طلوع نيوز ترمخه د افغانستان د ټرانسپورټ وزارت پخلی کړی چې صدر اشرف غني د يکشنبې په ورځ حکم کړی چې پاکستاني سامان وړونکي ټرکونه به يواځې د پولې پورې ځي. سامانونه به ښکته کوي او د هلته نه به يې افغان ټرکونه مخکې وړي.
نزدې دوه اوونۍ وړاندې کابل د پاکستان او افغانستان د ټرانزټ همکارۍ کېدونکې غونډه هم ځنډولې وه، افغان سوداګر وايي ټرانزټ کې هر وخت د ستونزو سره مخ وي.
پاکستاني ټرکونه دا وخت نه يواځې افغانستان ته ځي بلکې د افغانستان د لارې منځني اسیايي هېوادونو ته هم ځي.
د افغانستان د ټرانسپورټ ځينې کمپنیانو ويلي حکومت دې په سمدستي ډول دغه حکم عملي کړي.
د افغانستان د ټرانسپورټ د کمپنيانو مالکانو ويلي، د دغه عمل سره به افغان وګړو ته د روزګار موقعې په لاس ورشي او د ټرانسپورټ کمپنيانو ته به کار ترلاسه شي، دا وخت ډرائيوران د کار د نشتوالي نه په کورونو کې ناست دي.
د يوې ټرانسپورټ کمپنۍ مشر ويلي، پاکستاني ټرکونه د افغانستان هرې برخې ته ځي دغه شان دې د افغانستان ټرکونو ته دې هم اجازه وي چې د پاکستان د لارې ګاونډي ملکونو ته ځي.
کابل ويلي ډېر زر د تاجکستان، ازبکستان او ترکمانستان سره د سوداګرۍ تړون کوي او افغان ټرکونو به دغو ملکونو ته ځي.
افغان سوداګر د پخوا راهسې دا شکايت کوي چې ټرانزټ يې د پاکستان د لاسه د ستونزو سره مخ دی، او بيا د پاکستان د طرفه وخت په وخت د تورخم او سپين بولدک پولې هم تړل کيږي د کوم نه چې د دواړو ملکونو ترمنځ سوداګرۍ باندې بدې اغېزې کيږي.
د تېرو څو کلونو راهسې د پاکستان او افغانستان سوداګري ۲۷ فيصده را کمه شوې هم ده.
د راپورونو ترمخه د پاکستان نه په کال ۲۰۱۰م ، ۲۰۱۱م کې د دوه اعشاريه څلور اربه ډالرو سوداګري شوې وه، کومه چې د هغې نه په وروستو کلونو کې راپه کمېدو شوې او د روان مالي کال پورې ختمېدو پورې به دا يو ارب ډالرو ته راټيټه شي.