لاس رسیدونکی لینک

Breaking News

پېښور کې د ماشومانو لپاره ځانګړی عدالت پرانستل شوی


د خېبر پښتونخوا په سرښار پېښور کې د ماشومانو د خونديتوب یا تحفظ لپاره ځانګړی عدالت پرانستل شوی چرته چې به یواځې د ماشومانو په اړه قضیې یا کېسونه اوریدل کیږي.

د پېښور په جوډیشل کمپلکس یا عدالتي ودانۍ کې دغه عدالت د ماشومانو لپاره لومړی ځانګړی عدالت دی او پرانسته يې د پېښور هايي کورټ مشر قاضي یا چیف جسټس وقار احمد کړې.

د پېښور هايي کورټ رجسټرار وجیح الدین د یاد عدالت په اړه وي او ای ډیوه ته ویلي، د پېښور وروسته به د صوبې په نورو برخو کې هم دغه شان عدالتونه پرانستل کیږي.

وجیح الدین وايي:٫٫ د پېښور وروسته به په مردان، اېبټ اباد او بیا په نورو ضلعو او قبایلي ضلعو کې هم دغه شان عدالتونه پرانستل کیږي. مونږ د صوبايي حکومت نه خواست کړی چې په ۳۴ ضلعو کې د دغه شان عدالتونو پرانستلو منظوري ورکړي، او امکان دی د روان کال اخیره پورې دغه کار سر ته ورسيږي.٬٬

په لومړۍ ورځ د دغه ځانګړي عدالت ته د نورو عدالتونو نه د ماشومانو په اړه ۶۲ قضیي یا کېسونه راوړل شوي او قاضي يې اورونه هم پېل کړې.

د ماشومانو په دې عدالتونو کې به د بې کوره ماشومانو د ساتنې، د یتیمانو ماشومانو د وراثت، د بې درکه یا ورکو ماشومانو او د ماشومانو د خوندیتوب قانون (چاېلډ پروټېکشن اېکټ) لاندې درج شوي قضیو اوریدنه کیږی.

په خېبر پښتونخوا کې د ماشومانو د خوندیتوب یا تحفظ لپاره کار کونکی مدني فعال عمران ټکر د ماشومانو لپاره د ځانګړي عدالت پرانسته ستاېي خو زیاتوي په صوبه کې د ماشومانو سره کیدونکي زیاتۍ نه رپورټ کیدل تر ټولو لویه ستونزه ده.

عمران ټکر د وي او ای ډیوه سره په خبرو کې وايي ٫٫ دا د پاکستان حکومت د نړیوالې ټولنې سره د کړوو ژمنو پوره کولو یوه برخه ده او د موجوده حکومت لخوا د قانونو جوړولو یا اصلاحاتو کولو اړخ ته یو ښه ګام دی.٬٬

ښاغلی عمران ټکر وايي د ماشومانو ځانګړي عدالتونو د نشتوالي له کبله دا مهال د صوبې په جیلونو یا بندی خانو کې تر ۵۰۰ پورې ماشومان بند دي.

په پېښور کې د ماشومانو په دې ځانګړي عدالت کې دووه کوټې یا کمرې دي، که چرې یو ماشوم قاضي یا جج ته نېغ په نېغه وړاندې کیدل نه غواړي نو د بلې کوټې نه په ویډیو لنک هم خپل بیان ریکارډ کولی شي.

د ماشومانود قضیو په وخت به د ماشومانو د خوندیتوب یا چاېلډ پروټکشن یونت ۲ افسران او یو نفسیاتي ماهر هم په عدالت کې موجود وي.

XS
SM
MD
LG