د افریقایي هېواد جنوبي سوډان په یونیټي صوبه کې د تېلو د کمپنۍ یوه کوچنۍ الوتکه د چارشنبې- شورو په ورځ د تېلو د ذخیرې له هوایي ډګره د الوتو وخت لوېدلې ده، چې د ځایي چارواکو په وینا 20 کسان پکې مړه شوي دي.
د یونیټي صوبې د اطلاعاتو وزیر ګېتویچ بپل وایي، الوتکه سرښار جوبا ته روانه وه چې وغورځېده. هغه وایي په جهاز کې سپاره کسان د ګرېټر پاینېر آپرېټنګ کمپنۍ (جي پي او سي) د تېلو کارکوونکي وو.
ګرېټر پاینېر آپرېټنګ کمپنۍ په افریقایي هېوادونو خصوصاً په سوډان کې کارکوونکې د ګېسو او تېلو لویه کمپنۍ ده چې پکې د چین نېشنل پټرولیم کارپوریشن او د جنوبي سوډان سرکاري نیل پټرولیم کارپوریشن کمپنۍ هم پکې شاملې دي.
یونیټي صوبې د اطلاعاتو وزیر وایي، په الوتکه کې ټول 21کسان سپاره وو چې پکې 18 ځای پر ځای مړه شوي، دوو ټپیانو په روغتون کې ساه ورکړې او د یو تن حالت لا هم د اندېښنې وړ دی. وایي په مړو کې دوه چینایي وګړي او یو هندی هم شامل دي.
د هېواد د پټرولیم وزیر پوت کانګ چول وایي، الوتکه د چارشنبې- شورو په سهار په ځایي وخت شاوخوا لس بجې د یونیټي ریاست د تېلو زېرمو ته نیزدې له الوتلو درې منټه وروسته وغورځېده.
د جنوبي سوډان صدر سلوا کیر ویلي، په مړو شویو کسانو کې انجنېران او تکنیکي کارکوونکي هم شامل دي او ژمنه یې کړې چې د پیښې د سبب معلومولو لپاره به بشپړې او چټکې پلټنې کوي.
په وروستیو کلونو کې په جګړه ځپلي جنوبي سوډان کې څو هوايي پېښې شوې دي. د 2018م کال په ستمبر کې هم یوې کوچنۍ الوتکې له جوبا ښاره یرول ښار ته د مسافرو وړلو په وخت لوېدلې وه چې پکې لږ تر لږه 19 کسان مړه شوي وو.
په 2015 کال کې هم د روس جوړه یوه بار وړونکې الوتکه چې مسافر پکې سپاره وو د جوبا ښار له هوايي ډګره تر الوتلو وروسته لوېدلې وه چې پکې 36 کسان مړه شوي وو.
یادونه:- د رپوټ معلومات له رویټرز او اې پي خبري ایجنسیو اخیستل شوي دي.
Forum