د پاکستان وزیراعظم شهباز شريف د جمعې په ورځ د کابينې د ځينو مهمو غړو سره راولپنډۍ کې پوځي مرکز (جي اېچ کيو) ته ورغلی، هغه او د کابينې غړو یې د پوځي مشرتابه سره د ملي امنیت، سيمې د ثبات او پوځي تیاريانو په حواله بحث کړی دی.
د پاکستان سرکاري خبري ادارې (اې پي پي) ويلي، وزيراعظم او د کابينې غړو ته په ملک کې روان امنيتي صورتحال، د ګواښونو، امنيتي ګواښونو ته د ځواب ويلو، او ترهګرۍ ضد روانو عملياتو په اړه احوال وړاندې کړل شوی دی.
وزیراعظم شهباز شريف باور ورکړی، حکومت به د عملياتو چمتو کولو يقيني کولو دپاره ټول اړين وسايل ورکوي.
هغه زیاته کړې، د پاکستان عروج د ملک مقدر دی او پاکستان پرامنه عروج يقيني کولو کې د پوځ کردار نه شي کمول کېدی.
او د پوځ مشر جنرل عاصم منير ويلي، پوځ به د قوم هيلي پوره کوي او پاکستان ته د ورپېښو امنيتي مسلو په مخنيوي کې به د حکومت پوره ملاتړ کوي.
د پاکستان وزيراعظم شهباز شريف پوځي مرکز ته په داسې وخت کې ورغلی چې د پاکستان په خېبرپښتونخوا، قبايلي ضلعو او بلوچستان صوبه کې وخت په وخت د ناامنۍ پېښې کيږي، په وسله والو ځواکونو او پوليس اهلکارو بريدونه دوام لري او د پاکستان پوځ هم بيا وخت په وخت د وسله والو ضد د عملياتو او وسله والو ته د مرګ ژوبلو اړولو دعوې کوي.
پاکستان کې د اتمې فرورۍ د انتخاباتو وروسته مرکزي او د صوبو حکومتونه جوړ شوي، او د خېبرپښتونخوا صوبې وزيراعلا علي امين ګنډاپور په اسمبلۍ کې خپله لومړۍ کې ويلي وو، صوبې ته تر ټولو لویه مسله د ترهګرۍ ورپېښه ده.
ګنډاپور دوه ورځې وړاندې د وزيراعظم د شهباز شريف سره ليدلي، د صوبې د امنيت او واجباتو په موضوعاتو یې ورسره خبرې شوې وې او نوموړي دغه ليدنې او خبرو ته مثبتې ويلې وې.
Forum