د امریکې په صدارتي انتخاب کې د ریپبلېکن پارټۍ د نامزدګۍ څلورو امیدوارانو اخېرې مناظره وشوه

اینده کال د امریکې صدر غورو کولو دپاره په انتخاب کې د ريپبلېکن پارټۍ د نامزدګۍ خواهشمندو څلورو امیدوارانو د سږ کال په اخېرۍ مباحثه کې شرکت وکړو او په خپلو وېناګانو کې یې په یو بل نیوکې وکړې. پخوانی صدر ډانلډ ټرمپ چې د ریپبلېکن پارټۍ د نامزدګۍ امیدوار دی، د دریو نورو مناظرو په شان په دې اخېرۍ مناظره کې هم نه و شریک.

د شورو، چهارشنبې، په ماښام د امریکې د اېلباما ریاست په ټسکولوسا ښار کې د مباحثې په مهال د امریکې د نیوجرزي ریاست پخواني ګورنر کرېس کرېسټي په ټرمپ تنقید وکړو او په نورو یې الزام ولګولو چې د ویرې له امله په ټرمپ نیوکې نه شي کولی.

که څه هم ټرمپ د یو شمېر الزاماتو او په عدالتونو کې د مقدمو سره مخامخ دی، د مقبولیت په لحاظ د ریپبلېکن پارټۍ د نامزدګۍ خواهشمندو نورو امیدوارانو نه مخکې دی.

د ریپبلېکن پارټۍ نامزدګي ترلاسه کوونکی به د اینده کال د نومبر په میاشت کې په صدارتي انتخاب کې د موجوده صدر جوبایډن سره مقابله کوي. بایډن د صدارت د دویمې دورې دپاره په انتخاب کې برخه اخیستلو اعلان کړی دی.

د اسرایل او د حماس د جګړې په اړه د ریپبلېکن پارټۍ په مباحثه کې برخه اخیستونکي په دې خبر متفق وو چې اسرایل ته دې اجازت ورکړی شي چې د امریکې د مداخلت نه بغیر دې د حماس خلاف خپل جنګ وکړي.

د فلورېډا ریاست ګورنر ران ډي سېنټس وویل د امریکې حکومت کوښښ کوي چې خپله دفاع کې اسرایل کمزوری کړي. هغه وویل حماس د یهودیانو دویم هالوکاسټ یا قتل عام غواړي.

ډي سېنټس دا هم وویل چې تېلو نه منافع ترلاسه کولو په لړ کې دې د ایران مخه ونیول شي ځکه چې د هغه په قول ایران حزب الله او حماس ته پېسې ورکوي او په منځني ختیځ کې "جهاد" راپاروي.

د ملګرو ملتونو دپاره د امریکې پخوانۍ سفیرې نيکې هېلي د روس صدر ولادېمیر پوټن خوشحاله دی چې د امریکې توجه د اوکراین نه اسرایل ته اوړېدلې ده.

کرېسټي وویل که کولی یې شول نو د حماس د ولکې نه امریکايي یرغمالان د ازادولو دپاره به یې امریکايي ځواکونه لېږلي وو.

په مباحثه کې برخه اخیستونکي هندي نژاد وېوېک راماسوامی وویل که د صدر بایډن په ځای هغه د چین صدر شي جېن پېنګ سره خبرې کولې نو چینايي صدر ته به يې وېل چې نه خو به په امریکا کې ځمکې اخلي او نه به د امریکې یونېورسټیانو ته پېسې ورکوي. هغه زیاته کړه چې چینايي صدر ته به یې وېل چې ترڅو چین د مېکسیکو د سمګلرانو دپاره د نشۍ توکې فېنټنایل جوړول نه وي بند کړی نو امریکا به د چین سره تجارت نه زیاتوي.

ډي سېنټس وویل د نشۍ توکو د سمګلرانو ډلې دې غېر ملکي ترهګر تنظیمونه وټاکل شي. هغه وویل د مېکسیکو سره د امریکې په جنوبي سرحد به دېوال جوړوي چې مېکسیکو ته به وايي چې خرچ یې پوره کړه. هېلي وویل د فېنټنایل د سرچینې په حېث به چین سره ټول رسمي تجارتي تعلقات ختم کړي.

د مېسېنجر هېرېس نومې ادارو د سروی ترمخه په نظر پوښتنه کې برخه اخیستونکي د ريپبلېکن پارټۍ 68 فیصد ووټران د ټرمپ حمایت کوي، نهه فیصد ریپبلېکن ووټران د ډي سېنټس، اووه فیصد د هېلې او څلور فیصد د راماسوامی ملاتړي دي. یو فیصد ریپبلېکن ووټران د کرېسټي پلویان دي.

د شورو، چهارشنبې، په ورځ د ریپبلېکن پارټۍ د مناظرې د ګډون والو کوښښ و چې ځان د ټرمپ نه د جدا امیدار په څېر پېښ کړي او وېل یې چې په عدالتونو کې د مقدمو په سبب دې ټرمپ په صدارتي انتخاب کې برخه نه اخلي.
د ډريم فار امېرېکا نومې ادارې سیاسي مبصر او ترجمان، کایون شروف وویل د کرېسټي نه علاوه نورو امیدوارانو په ټرمپ د تنقید نه ډډه وکړه.

راماسوامی په سټېج د هغه په څنګ کې په ولاړو نورو امیدوارانو او په پخوانیو صدرانو تنقید وکړو او ویې وېل چې نوی کول مشر ملک متحد کولی شی.

د ریپبلېکن پارټۍ دننه د پارټۍ صدارتي امیدوار غوره کولو وړمبي ووټونه یا ریپبلېکن کاکس به د جنورۍ په 15 نېټه په ایوا ریاست کې کېږي. څېړونکي وايي په دې پړاو راماسومای د ټولو نه کمزوری امیدوار دی. په مباحثه کې د په خپلو حریفانو د راماسوامی په شخصي حملو په تالار کې ناستو د مباحثې کتوونکو د ناوخوښۍ اظهار کولو.

کرېسټي ویلي هغه به د ریپبلېکن پارټۍ د نامزدګۍ دپاره مقابله دوامداره ساتي.

د خالي، شنبې، په ورځ ډي سېنټس د ایوا ریاست د ټولو 99 کاونټیانو دورې پوره کړې.
د سروی ترمخه، د شورو، د ورځې پورې په ایوا کې د ټرمپ د مقبولیت د 45.9 فیصد شرحې په مقابل کې ډي سېنټس 19.7 فیصد، هېلي 17.5 فیصد، راماسوامی 4.8 فیصد او کرېسټي 3.9 فیصد مقبولیت لرلو.