لاس رسیدونکی لینک

تازه خبر

پاکستان

update

د پاکستان د سېنیټ نوی منتخب چيئرمېن د اسټېبلېشمېنټ سړی (ریاست پلوه) دی؟

د پاکستان د سېنېټ یا بانديني ایوان په انتخاباتو کې د چېرمین په څوکۍ د حکومت مخالفه گوندونو شريک اميدوار صادق سنجراني حکومتي امیدوار راجه طفرالحق ته ماتې ورکړې ده.

د بلوچستان نه په ازاده څوکۍ بریالي شوي صادق سنجراني ته د حکومت د مخالفه خو په په خپلو کې رقيبانو گوندونو پاکستان پیپلز پارټۍ او تحریک انصاف، د بلوچستان ازاد امیدوارانو او د قبایل سیمو د سینټرانو مرسته ترلاسه وه.

د واکمن گوند مهمې مشرې او د پخواني وزیراعظم لور مریم نواز شريف په ټویټر په خپل غبرگون کې ويلي دي چې "د زرداري او امپاير د گوتې بیوپاري چې ستا دربار ته ورسیدل نو یو شو"

اکثره پاکستاني څېړنکاران د "امپایر گوته" اصطلاح د پوځ لپاره کاروي.

د پاکستان یوه ملت پاله سیاسي فعاله بشرا گوهر د سېنېټ په انتخاباتو هم خپله رای په ټويټر ښکاره کړې ده. هغه پوځ ته په اشاره کې وايي "د پنډۍ هلکانو ښه لوبه وکړه، د سېنیټ پوره کنټرول یې تر لاسه کړو. سټېبلېشمېنټ وگټله او جمهوریت وبایلله"

سنجراني د سینټ ۱۰۳ رایو کې ٥٧ رای ترلاسه کړې. د سېنېټ د مشرۍ دپاره د ائین یا دستور لاندې د سېنېټ چیرمین ته د ایوان بالا د مشرۍ لپاره ۵۳ ووټونه ترلاسه کول ضروري وي.

د سنجراني تعلق د کړکېچ ځپلې صوبې بلوچستان سره دی. وتلي کالم ليکونکي ډاکټر تقي په خپل ټویټر ليکلي دي " ظفرالله جمالي وزیراعظم وو خو څه څه وشو؟ بلوڅانو ته عهدې نه حقونه ورکړئ"

بلې خواته د پيپلز گوند شریک مشر بلاول بټو زرداري په خپل ټویټر په مسلم ليگ گوند پورې طنز کړدی دی او ليکي " د ضیا وړومبي بېټسمین ماتې وخوړه. بلوچستان وگټله. وفاق وگټله. د سېینټ مشره امبارک شه"

د ایوان د نایب چیرمین منصب د پيپلز گوند سليم مانډوي واله وگټلو، هغه د ملت پال پښتونخوا ملي عوامي گوند او واکمنه مسلم ليگ نون شريک امیدوار عثمان کاکړ ته ماتې ورکړه. د سېنېټ د مشرانو ټاکنې د پټو رايو د لارې وشولې.

دا مهال په سېنېټ کې د واکمن مسلم لیگ (ن) ۳۳، د پاکستان پیپلز گوند ۲۰، د پاکستان تحریک انصاف ۱۲، د نیشنل پارټۍ، پښتونخوا ملي عوامي گوند او متحده قومي مومنټ پينځه پينځه، د جمیعت علما اسلام (ف) ډلې څلور، د عوامي نیشنل گوند، بلوچستان نیشنل پارټۍ مېنگل، جماعت اسلامي او پاکستان مسلم لیگ (ف) یو یو او ۱۶ ازاد غړي دي.

د پاکستان د ائين ترمخه هر درې کاله وروستو د سېنېټ نیمايي غړي د خپلې مودې شپږ کاله په پوره کولو خپلې څوکۍ خالي کوي.

See all News Updates of the Day

د پنجاب د اټک ضلعې په کچرۍ کې د پولیس افسر په ډزو دوه وکیلان وژل شوي

د پنجاب په اټک ښار کې د ضلعي عدالتونو په ودانۍ یا کچهرو کې دننه د یو پولیس افسر په ډزو دوه وکیلان وژل شوي اؤ پولیس وایي برید کوونکی پولیس افسر یې نیولی دی.

د پاکستان بیلابیلو رسنیو د خالي- شنبې په ورځ ویلي د اټک په ضلعي کچهرو کې د انتظار شاه په نوم یو اسسټننټ سب انسپکټر د خانداني تربګنۍ په اساس په یو وکیل پسې د هغه چیمبر ته ورننوتلی اؤ ناتاره ډزې یې پرې کړي دي.

رسنۍ وايي په دې ډزو کې د ملک اسرار اؤ ذوالفقار مرزا په نومونو دوه وکیلان وژل شوي دي.

د پنجاب پولیسو ویاند پخپل یو بیان کې ویلي چې له برید وروسته پولیس په وژنو کې ککړ پولیس افسر انتظار شاه نیولی اؤ د هغه په ضد یې مقدمه درج کړې ده چې د ترهګرۍ دفعې هم پکې شاملې دي.

مخې ته د راغلو معلوماتو له مخه ای ایس آي انتظار شاه په ایلیټ کمانډوز کې په وي آي پي امنیت مامور ؤ اؤ هغه په دې برید کې سرکاري وسله کارولې ده.

د پنجاب د وزیراعلا مریم نواز په لارښوونه د پنجاب صوبې د پولیسو مشر ددې پېښې په سخته نوټس اخستی اؤ د پولیسو ته یې د برید کوونکي پولیس افسر په ضد د سخت قانوني اقدام کولو امر کړی دی.

څېړونکي وایي ښځې اؤ ماشومان د موسمي بدلون د بدو اغېز ښکار کیږي

څېړونکي وايي د موسمي يا اقليمي بدلون اثرات په ټولنه او بيا د خلکو په ژوند هره ورځ کېږي او ښځې او ماشومان هم د دې د بدو اثراتو ښکار کېږي.

دوي وايي د موسمي بدلون له امله د واورې ګټان يا ګليشير په تېزۍ سره ویلي کېږي، د اوبو کچه لاندې غورځېږي، بارانونه بې وخته او کمېږي او د کر زمکې د يوې ورځې نه بلې ته زیاتې اغېزمنې کېږي.

د څېړونکو وینا ده چې د موسمي يا اقليمي بدلون د بدو اغېزو له امله ښځې او ماشومان د هجرت کولو په وخت، اوبو د کمي، خوراکي توکيو د خونديتوب، روغتيا او ځينو نورو ستونزو سره مخ کیږي.

دوي وايي د دې بدلون د اغېزمنو شوؤ خلکو په اړه له بده مرغه حکومتي ادارو سره هم کره شمېره نشته.

د پېښور پوهنتون د پلاننګ او پرمختيا د څانګې مشره ډاکټر بشره خان وایي،کله چې د اقليمي بدلون اثرات زيات شي نو په هغې کې دوه څېزونه ډېر مهم دي چې يو په کې د اوبو کمی راځي او اوبه هر يو انسان ته پکار دي .

ډیوه سره خبرو کې هغې وویل "اوس د اوبو کمی چې راځي نو هغې سره تړلې خبره دا هم ده چې هلته د خوراک د خوندي کولو مشکل هم بيا مخې ته راځي او کر کرونده اوبو سره تړلې ده نو د دې اثر بيا په ښځو هم کېږي".

کارپوهان وايي په موسم کې د بدلون په اړه به راتلونکو لسو کالو کې ځينې اساسي ګامونه اوچتول وي چې په هغې کې څېړنې کول، پوهاوی پيدا کول او داسې لارې چارې خپلول دي چې له امله یې د دې منفي اثرات کمېدای شي.

دوي وايي که د موسمی بدلون د بدو اغېزو د مخنيوي د پاره په وخت ګامونه اوچت نه کړی شول نو دا به ټولنې ته نور زيان ورسوي.

پېښور پوهنتون کې د چاپېريال د څانګې استاد ډاکټر حزب الله وایي ،مخکې به زمونږ خلکو نه منله خو اوس يې ومنله او مونږ ګورو چې د اوبو کمی راغلی دی، کر سم نه کېږي، تودوخه زياته شوې ده او د بارانونو ترتيب کډوډ شوی دی.

ډیوه سره خبرو کې هغه وایي "نو د دې غټ اثرات راغلي دي او هغه دا چې د اوبو کچه لاندې روانه ده اؤ د دې لويه وجه دا ده چې بارانونه هغه وخت کې ونه شي کوم وخت کې چې دغه کچه اوچتېږي او اوس لکه د پشکال بارانونه راروان دي نو که بارانونه وشي نو دې وخت دغه کچه په خپله بره ځي نو هيڅ ګټه نه کوي".

پېښور پوهنتون کې د جون په ۱۳مه د اقليمي بدلون د بدو اثراتو او ددې د مخنيوي په موضوع یو سیمینار راجوړې شوی ؤ اؤ دغه سیمینار ته حکومتي وزيرانو پخپلو ویناګانو کې ویلي د ټولنې ټول وګړي به د موسمي بدلون د بدو اغېزو نه د ټولنې په ژغورلو کې خپل کردار لوبوي او په خصوصي توګه د ځوانانو کردار په دې حواله زیات مهم دی.

د خېبرپښتونخوا د حکومت وياند بېرسټر محمد علي سیف وویل،په پاکستان کې د ماحولياتو د تحفظ قانون شته او د هغې لاندې ادارې هم جوړې شوې دي او زه دا ويلی شم چې په دې وخت کې په پاليسۍ عملي کولو کې مشکل شته.

هغه وویل "مونږ ته د قوانينو عملي کولو په لړ کې نور ګامونه اوچتول پکار دي خو دې د پاره ترڅو پورې چې خلک مرسته ونه کړې نو حکومت يوازې دا کار نه شي کولی او نه حکومت بيا په موثره توګه دا عملي کولی شي".

د حکومتي ادارو شمېرې ښيي په پاکستان کې د ۲۰۲۲ کال سختو بارانونو او سېلابونو څه ۳۳ملينه خلک اغېزمن کړي وو چې په کې لوی شمېر کې ښځې او ماشومان هم شامل وو.

د حج خطبه: د یو بل حقونو ته درناوی ولرئ، هیڅ یو انسان ناحقه مه وژنئ

د مسحد الحرام امام اؤ خطیب ډاکټر الشیخ ماهر بن حمد المعیقلي د حج په خطبه کې په خلکو غږ کړی چې د یو بل حقونو ته باید درناوی ولري اؤ هیڅ یو انسان ناحقه ونه وژني.

تر شلو لکو زیات مسلمان نن د خالي یا شنبې په ورځ د حج د تر ټولو ستر رکن وقوف عرفات ترسره کولو لپاره د عرفات میدان ته راټول شوي دي اؤ دغلته په مسجد نمره کې ډاکټر الشیخ ماهر بن حمد المعیقلي هغوي ته د حج خطبه کې ویلي چې باید د هغو خلکو لپاره دغاګانې وکړي چې په مصیبتونو کې راګیر دي.

د پاکستان د ډان ورځپاڼې د خبر له مخې ډاکټر الشیخ ماهر ویلي، څنګه چې فلسطین ته جګړه رسېدلې ده، "هلته هر څه تس نس شوي دي، د فلسطینیانو لپاره دعا وکړئ، هلته اوبه هم نشته، بجلي هم نشته، خوراک هم نشته، ځای پکې نشته، امن نشته، تر ټولو زیاته دعا د خپلو دغو فلسطینیانو وروڼو لپاره وکړئ ځکه چې هغوي د دعا زیات مستحق دي".

ډاکټر الشیخ ماهر بن حمد المعیقلي وویل عبادت یواځې د الله لپاره دی اؤ امر یوازې د الله دی اؤ همدا دین دی، څوک چې تقوا خپلوي هغوي به له هغه ځایه رزق مومي چې په وهم اؤ ګمان کې به یې هم نه وي.

د پاکستاني مطبوعاتو د خبر له مخې هغه د حج په خطبه کې وویل د هر شي مالک یواځې الله دی چې قران یې نازل کړی دی اؤ قران هغه کتاب دی چې ایاتونه یې له حکمت ډک دي، دا قران خلکو ته نېغه لاره ښیي.

هغه زیاته کړه الله تعالی متقي خلکو ته د فلاح یا ښېګړې سره نجات ورکوي اؤ د قیامت په ورځ به هغوي ته تکلیف نه رسیږي څوک چې د الله تقوا خپله کړي الله یې ګناهونه بخښي اؤ اجر یې سیوا کوي.

هغه په خلکو غږ وکړو چې له الله وویریږي اؤ وي ویل تقوا د ښېکړې لاره ده ، د دنیا ژوند چرته تاسو په دوکه کې وا نه چوي.

هغه وویل د شیطان له تېر ویستلو اؤ وسوسو ځانونه خوندي وساتئ، د الله خبره کوئ، د انصاف خبره کوئ، اؤ په الله توکل کوونکي په دنیا اؤ اخرت کې کامیابي مومي.

نن په نهمه ذي الهجه حاجیانو دعرفات میدان کې د ماسپښین اؤ ماذیګر نمونځونه یو ځائ کړي دي اؤ تر دې وروسته به بیا دغه حاجیان ترماښامه دعرفات په میدان کې وقوف کوي،

د نمر پریوتو سره سم به حاجیان مزدلفې ته روانیږي اؤ هلته به دماښام اؤ ماسخوتن نمونځونه یو ځائ کوي اؤ بیا به د شین اسمان لاندې تر سهاره په عبادتونو مشغول وي.

په ۱۰مه ذي الحجه به حاجیان د مزدلفې نه د رمي دپاره جمرات ته ځي اؤ هلته به شیطانان په کاڼو اوولي، ترهغې وروسته به قرباني کوي، سرونه به خروي اؤ بیا به احرامونه پرانزي اؤ دغسې به دحج ټول مناسک سرته رسیږي.

سږ کال د حج د فریضې ترسره کولو لپاره د ګردې نړۍ څخه قابو شل لکه حاجیان سعودي عرب ته رسېدلي چې په دې کې یو لک اؤ شپیته زره له پاکستان ورغلي اؤ ټاکل شوې ده نزدې څلور لکه ځایي خلک به هم سږکال د حج فریضه ترسره کوي.

موډیز: د پاکستان بجټ کې د 3.6 فیصده جي ډي پي هدف ټاکل د آي ایم ایف د خوشحالولو هڅه ده

د درجه بندۍ نړیوالې اېجنسۍ موډيز د کال 2025_24 لپاره د پاکستان د بجټ په حواله خپل رپورټ کې ويلي چې په بجټ کې د 3.6 فيصده جي ډي پي هدف ټاکل د آي اېم اېف د خوشحالولو کوشش دی او د بجټ د نيمې څخه امدن به په سود ادا کولو خرڅ کېږي.

موډیز وايي چې د ګرانۍ له کبله ټولنيز تناو بيا راپېدا کېدای شي او امکان شته چې ګراني ددې هېواد په اصلاحاتي پروګرام باندې هم اثر انداز شي.

اقتصادي ماهرين هم وايي که د پاکستان حکومت خپله اصلاحاتي اېجنډا په مخ بيايي او د تاوان سره مخ سرکاري ادارې شخصي څانګې ته سپاري نو ښکاره ده چې ددې بد اثر به په ولس پريوځي.

د پاکستان مرکزى حکومت د جون په 12 مه د 18 زره اربه روپو د حجم نه زيات بجټ پارليمان ته وړاندې کړی چې پکې د محصولاتو هدف د 12 زره اربه روپۍ تجويز کړی شوی دی.

د مالي کال 2024 - 25 په بجټ کې په قرضونو د سود ورکولو دپاره 9 زره او د 700 اربه روپیو اندازه لګول شوې ده.

اقتصادپوه ډاکټر عابد قيوم سلهري وایي، که حکومت په بجټ کې تجويز شوي ټېکسونه لګوي نو بيا د عوامو او حکومت ترمنځ تناو پېدا کېدای شي.

ډیوه سره خبرو کې هغه وویل "له بده مرغه حکومت دا وخت په يو مشکل حالت کې دی، چين، سعودي عرب، متحده عرب امارات او بل کوم ملک ترهغې د پاکستان مالي مرسته نه شي کولی تر څو چې د آي اېم اېف سره نوې د قرض لوظنامه ونه شي".

موډيز وايي حکومت ته په خپل اصلاحاتي هدف ترلاسه کولو ولاړ پاتې کېدل به خورا مهم وي خو ورسره دا اندېښنه هم څرګندوي چې د اتحادي حکومت سره د غټ منېډېټ نشتوالی د اصلاحاتو عملي کولو په لاره کې خنډان راولاړولی شي.

د پاکستان حکومت د اقتصادي سقوط څخه د بچ کېدو او مالي توازن پرځاې ساتلو لپاره د نړیوالې مالياتي ادارې آي اېم اېف سره د يو بل نوي اوږد مهاله قرض پروګرام په سر مذاکرات کوي.

آي اېم اېف د پاکستان په حکومت ټينګار کوي چې د تاوان سره مخ سرکاري ادارې باید شخصي څانګې ته حواله کړي، خپل لګښتونه کم کړي، د ټېکسونو داېره پراخه کړي او د تېلو، بجلۍ او ګېسو قيمتونه لوړ کړي.

ماهرين وايي د آي اېم اېف قرض پروګرام د عوامو لپاره نه وي بلکې يو هېواد ته يوازې اډانه ورکوي چې په خپلو قرضو بېرته ستنولو کې ناکامه نه شي.

د پاکستان د خزانې پخوانی وزیر اؤ اقتصادپوه ډاکټر سلمان شاه وایي بهرنۍ پور ورکوونکې ادارې او ملکونه خو غواړي چې د هغوى پورونه دې ورکول کېږي او کار دې روان وي ولې عوام غواړي چې هېواد د دېواليه کېدو نه هم بچ شي خو ورسره اقتصاد د ودې په لاره اچول هم پکار دي.

ډیوه سره خبرو کې هغه وایي "چې اقتصاد وده کوي نو روزګار به پېدا کېږي او چې روزګار وي نو خلک به له ګرانۍ خلاصيږي خو د پاکستان دا بجټ نه د سرمایه کارۍ ډاډګيرنه کوي نه د اقتصادي ودې حوصله افزاي کوي بلکې دا بجټ حکومت او ټېکسونو ته متوجه دی".

موډيز وېلي چي حکومت په وفاقي امدن کې د اضافې دپاره ځان ته د 17.8 کهربه روپو سخت هدف ايښودلی دی چې د تېر مالي کال په مقابله کې 46 فيصد زيات دی.

د شهباز شريف په مشرۍ کې د مسلم لیګ نون ګوند اتحادي حکومت د اقتصادي مشکلاتو، سياسي کړکېچ او بهرني چېلنجونو په ترڅ کي خپل لومړی بجټ په داسې حال کې وړاندې کړی چې پاکستان تېر مالي کال کې ټاکلي اقتصادي هدفونه نه دي ترلاسه کړی.

سرفراز بګټي: بلوچستان کې تلپاتی امنيت مو د حکومت د لومړيتوبونو په سر کې دی

د پاکستان د بلوچستان صوبې وزیراعلا سرفراز بګټي ويلي، د ترهګرۍ ضد جګړه کې د بلوچستان پولیسو قربانۍ ورکړي او زياته کړې یې ده، ترهګر به د ځالو نه راويستل کيږي او منطقي انجام ته به رسول کیږي.‏

د پاکستان د سرکاري خبري ادارې (اې پي پي) ترمخه نوموړي د بلوچستان پوليسو 100م پاسنګ اوټ پرېډ ته په وينا کې دغه خبره کړې ده.‏

بګټي ويلي، ترهګري چې په هر شکل کې وي د غندنې وړ ده، نوموړي د نوم اخستو پرته ويلي، ترهګرو ته د ګاونډي هيواد د ايجنسۍ (را) ملاتړ ترلاسه ‏دی. را د هند استخباراتي اداره ده.

پاکستان د اوږدې مودې نه تور لګوي د هند استخباراتي اداره په پاکستان کې د ناامنۍ او ترهګرۍ په پېښو کې لاس لري، خو هند وړاندې دغه ډول ‏تورونه رد کړي دي.‏

د بلوچستان صوبې وزیراعلا ويلي، د ترهګرۍ ضد جګړه يواځې د امنيتي ځواکونو نه ده بلکې دا د ټولو ده، صوبايي حکومت په ترهګرۍ او جرمونو کې ‏ککړو کسانو پرضد ګېره تنګوي او د قانون منګولو ته به یې راولي. هغه ويلي ترهګرۍ به ماتې ورکول کیږي.‏

د پاکستان بلوچستان صوبه کې د اوږدې مودې راهسې د ناامنۍ او ترهګرۍ پېښې دوام لري. په وروستيو څو مياشتو کې د ناامنۍ او ترهګرۍ زياتې ‏پېښې هم په پښتونخوا او بلوچستان صوبه کې شوي دي.‏

بلوچستان کې د بې درکه بلوڅو معلومولو دپاره مبارزه کوونکي تنظيمونه (وايس فار بلوڅ مسنګ پرسنز) او بلوڅ يکجهتي کمېټي تور لګوي، په صوبه کې ‏بلوڅ په زوره بې درکه کيږي، بيا یې مړي ترلاسه کیږي او ياد تنظيمونه په سي ټي ډي پوليسو تور لګوي چې په جعلي مقابلو کې د بې درکه کسانو ‏وژنې کوي.‏

د بلوچستان حکومت دغو دعوو ته تازه غبرګون نه دی ويلی او نه د بلوچستان وزيراعلا په خپله وينا کې د بې درکه بلوڅو په اړه څه ويلي دي.‏

خو حکومت او ادارې اکثره وايي، د بې درکه بلوڅو دپاره مبارزه کوونکي تنظيمونه چې کوم خلک بې درکه شمېرې يا ګڼي هغوی په بېلتون خوښو ډلو کې ‏شامل شوي، د رياست پرضد هلوځلو کې ککړ وي يا د ملک څخه بهر وتلي، او يا د امنيتي ادارو سره په عملياتو يا نښتو کې وژل کيږي

پاکستان کې د شخړو او امنيت د مطالعاتو څيړنيزې غېر حکومتي ادارې پاکستان انسټيتیوټ فار کنفلیکټ اېنډ سیکيورټي سټډیز (پيکس) ويلي، تېر د ‏مې په میاشت کې په ملک کې د ترهګرۍ پېښې ‏‎12‎‏ فيصده سېوا شوي او امنيتي ځواکونو ‏‎82‎‏ جنګيالي وژلي وو. ‏

د روانې مياشتې په درېمه نېټه خپور کړي رپورټ کې پيکس ويلي وو، د اپرېل د مياشتې په مقابله کې په مې کې ترهګري سېوا شوې او وژنو کې هم ‏‎29‎‏ ‏فيصده اضافه ليدل شوې وه.‏

په رپورټ کې د مې په مياشت کې په ملک کې د ‏‎86‎‏ ترهګرو پېښو ويل شوي، ‏‎90‎‏ کسان پکې وژل شوي چې پکې ‏‎48‎‏ ملکي وګړي، ‏‎22‎‏ امنيتي ساتونکي او ‏‎20‎‏ جنګیالي شامل وو.‏

پيکس ويلي وو، د مې په میاشت کې د پاکستاني پوځ، نورو امنیتي ادارو او پولیسو د کارروايانو په وخت ‏‎70‎‏ کسان وژل شوي، ‏‎62‎‏ پکې جنګيالي او اته ‏د امنيتي ځواکونو غړي شامل وو. د رپورټ ترمخه د مې په مياشت کې په مجموعي ډول ‏‎82‎‏ جنګيالي وژل شوي، ‏‎62‎‏ پکې د امنیتي ځواکونو په عملیاتو او ‏‎20‎‏ د حملو په وخت ځوابي عملياتو کې وژل شوي وو.‏

پيکس ویلي وو، په تيرو اووه کلونو کې د جنګیالو د وژنو دا شمېره په کومه يوه میاشت کې تر ټولو زياته شمېره وه.‏

په رپورټ کې ويل شوي د مې په مياشت کې په ‏‎86‎‏ پېښو کې ‏‎33‎‏ په پخوانۍ فاټا، ‏‎24‎‏ په خېبرپښتونخوا او ‏‎23‎‏ په بلوچستان کې شوې وې. ‏

پيکس ويلي وو، د روان کال (‏‎2024‎م) په لومړو پينځو مياشتو کې په ملک کې د ترهګرۍ ټولې ‏‎409‎‏ پېښې شوې، ‏‎414‎‏ کسان پکې وژل شوي او ‏‎474‎‏ ژوبل ‏شوي وو.‏

نور کتل

ځانګړې ویډیوګانې

د هندوستان کرکټ ټیم د مینه والو څو خبرې
please wait

No media source currently available

0:00 0:00:44 0:00

هېلو وي او اې په ټي وي

هېلو وي او اې په ټي وي
please wait

No media source currently available

0:00 0:59:56 0:00

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:59 0:00
XS
SM
MD
LG