په اسرایل د حملې سره د تړون په الزام ملګرو ملتونو د خپلې عملې یو شمېر غړي برطرف کړي

د فلسطیني کډوالو د مرستې دپاره د ملګرو ملتونو څانګې یو اېن ار ډبلیو ای، د جمعې په ورځ وویل د خپلې عملې ګڼ شمېر هغه غړي یې برطرف کړي چې په اړه یې اسرایل په اسرایل د حماس په حمله کې د ککړتیا معلومات شریک کړي دي.

د یو اېن ار ډبلیو ای کمېشنر یا مشر فلېپ لزاریني په یو بیان کې وویل د انساني امداد په رسوولو کې د ادارې صلاحیت محفوظ ساتلو دپاره یې د ادارې د ځینو کارکوونکو د کار معاهدې منسوخ کړې دي او د حقیقت معلومولو دپاره یې بغېر د څه ځنډه د تحقیقاتو امر وکړو.

هغه وویل که د یو ار ډبلیو ای کوم کارکوونکی هم په ترهګرۍ کې ککړ وموندل شو نو د عدالتي اقداماتو په شمول به د احتساب سره مخامخ کولی شي.

د فلسطيني کډوالو دپاره د متحده قومونو د امداد او د کار اداره په غزه کې د عملې 13000 فلسطیني غړي لري. د ادارې د 150 زیات غړي په غزه کې په اووم اکتوبر د حماس خلاف د اسرایل په جنګ کې وژل شوي هم دي.

په اسرایل د حماس په حمله کې 1200 کسان وژل شوي او تر 250 پورې نور کسان حماس یرغمال نیولي وو.
د ملګر ملتونو د مشر اېنټونیو ګوټېرېس ترجمان وویل لزاریني ګوټېرېس د "انتهايي سنجیده الزاماتو" نه خبر کړی دی.

د ګوټېرېس ترجمان سټیفن ډورېجېک په یو بیان کې وویل ګوټېرېس د متحده قومونو د عملې په دغه خبر خفګان څرګند کړو او لزاریني نه یې وغوښتل چې په دې اړه دې تحقیقات وکړي او د یو اېن ار ډبلیو ای کوم کارکوونکي هم د اووم اکتوبر په حمله کې ککړ و او یې په کې مرسته کړي وي نو د کار نه دې ګوښه کړی شي او مجرمانه اقدامات دې په ضد وکړی شي.

ډورېجېک وویل په بېړنۍ او په ازاده توګه به "جامع" د یو اېن ار ډبلیو د چارو کتنه کولی شي. هغه په دې اړه نور تفصیل وړاندې نه کړو.

اسرایل د کلونو راهسې په یو اېن ار ډبلیو تنقید کوي، الزام لګوي چې د ادارې په انتظام چلېدونکي سکولونه حماس د ترهګر فعالیتونو دپاره استعمالوي او اسرایل ضد نصاب ته وده ورکوي. د اووم اکتوبر نه پس اسرایلي چارواکو د یو اېن ار ډبلیو ای د عملې په ځینو غړو الزام لګولی چې په سوشل میډیا یې په اسرایل په حملو خوشحالي کړې وه.

د ملګرو ملتونو دپاره د اسرایل سفیر ګېلاد اردن د انټرنېشنل هالوکاسټ رېمېمبرېنس ډی یا د یهودیانو د قتل عام د یادولو د نړیوالې ورځ په مناسبت د متحده قومونو په دفتر کې یوې دستورې ته وویل د قتل عام د یادونې په ورځ دا معلومه شوه چې د یو اېن ار ډبلیو ای کارکوونکو په قتل عام کې برخه اخیستې وه.

هغه وویل د اسرایل قانوني وجود ختمولو دپاره د ملګرو ملتونو اداره نه یوازې د وسلې په توګه استعمالېږي بلکې "په جسماني توګه زمونږ د ختمولو" دپاره هم کارول کېږي.

لزاریني وویل یو اېن ار ډبلیو ای په سختو ټکو کې د اووم اکتوبر د حملې غندنه او اسرایلي یرغمالانو د ازادۍ غوښتنه کوي.

یو اېن ار ډبلیو ای په غزه کې قریباً دوه مېلین فلسطینیانو ته امداد رسوي. په غزه کې د حماس د انتظام لاندې د صحت وزارت وویل د حماس خلاف د اسرایل په جنګ کې په غزه کې وژل شویو فلسطینیانو شمېره د 26000 نه اوړېدلې ده.

امریکې، برطانیې، یورپين یونین او ځینو نورو ملکونو حماس ترهګر تنظیم ټاکلی دی.

که څه هم یو اېن ار ډبلیو ای د برطرف شویو کارکوونکو شمېره نه ده ښودلې فقط دا یې ویلي چې "یو شمېر" د عملې غړي يې لرې کړي دي، د امریکې خارجه وزارت وویل د یو اېن ار ډبلیو 12 کارکوونکي په اسرایل حمله کې ککړ موندل شوي دي.

امریکا یو اېن ار‌ډبلو ای ته د ټولو نه زیات امداد ورکوي او ویې وېل چې ادارې ته نورې په عارضي ډول ځنډوي او الزاماتو ته به کتنه کوي او د ملګرو ملتونو ګامونو ته به ګوري. په 2023 کې د اسرایل او حماس د جنګ شروع کېدو نه مخکې امریکې یو اېن ار ډبلیو ای ته 300 مېلین ډالر ورکړي وو.

سټېټ ډپارټمنټ وویل د امریکې خارجه وزیر اېنټني بلېنکن د زیارت، پنجشنبې، په ورځ د ګوټېرېس سره خبرې وکړو او ټینګار یې وکړو په دې معامله دې ژور او سمدستي تحقیقات وکړي.