د پاکستان وزيراعظم شهباز شريف د سعودي په سفر کې د وليعهد محمد بن سلمان سره ليدلي، په دوه اړخيزه چارو او اقتصادی مرستو یې ورسره خبرې اترې شوي دي.
د پاکستان د سرکاري مطبوعاتي خبري ادارې (اې پي پي) د خبر ترمخه، وليعهد محمد بن سلمان د پاکستان وزيراعظم شهباز شریف ته د روژه ماتي خصوصي بلنه ورکړې وه.
د پاکستان د بهرنيو چارو وزارت د ليدنې په اړه يو ګډ بيان کې ویلي، پرون په اووم اپرېل دغه ليدنه په مکه مکرمه کې په الصفا ماڼۍ کې شوې ده، په دوه اړخيزه اړیکو او اقتصادي مرستو پکې خبرې شوي دي.
په بيان کې ویل شوي، د خبرو مرکز د دواړو هيوادونو د اړيکو او بېلابيلو برخو کې په مرستو سېوا کولو وو، د پاکستان په اقتصاد کې د سعودي عرب په مرستندويه کردار، پانګونو او اړيکو پياوړي کولو باندې ټينګار شوی او د پينځه اربه ډالرو په پانګونه هم خبرې شوي په کوم چې وړاندې بحث شوی وو.
ویل شوي په خبرو کې د سيمې او نړيوالو پرمختګونو سره د غزې او کشمیر په موضوع هم بحث شوی دی.
په پينځم اپرېل د پاکستان د بهرنيو چارو وزارت ویلي وو، وزيراعظم شهباز شريف به د شپږم نه تر اتم اپرېل پورې د سعودي عرب دوره کوي او هغه سره په سفر کې به د بهرنیو چارو، دفاع، خزانې، اطلاعاتو او د اقتصادي چارو وزيران هم مل وي.
د بهرنيو چارو وزارت هيله څرګنده کړې وه، چې وزيراعظم به د سعودي عرب وليعهد محمد بن سلمان سره وويني، او دوه اړخيزه ګټو په مسلو به وغږيږي.
ویل شوي وو، دواړه مشران به د سيمه ييزو او نړیوالو پرمختګونو په اړه هم يو بل سره نظرونه شريک کړي.
د پاکستان وزيراعظم د سعودي عرب سفر په داسې وخت کې کوي چې تېره مياشت د سعودي عرب د دفاع وزیر شهزاده خالد بن سلمان بن عبدالعزیز د پاکستان په يوه ورځني سفر کې د وزیراعظم شهباز شریف او د پوځ د سرلښکر جنرال عاصم منیر سره لیدلي وو او ورسره یې خپلمنځي اړیکو ته د ودې ورکولو په ګډون د ګډې خوښۍ په یو لړ مهمو موضوعاتو خبرې اترې کړې وې.
Forum