د پاکستان وزيراعظم شهباز شريف ويلي، د ترهګرۍ د ناسورتر ختمولو پورې به یې د ترهګرو په ضد جګړه روانه وي، وایي "قوم د ترهګرو ضد ولاړو پوځي ځوانانو ته سلام وړاندې کوي".
د پاکستان پوځ منلې پرون په نهمه جولايۍ شمالي وزيرستان کې د امنيتي ځواکونو او ترهګرو ترمنځ نښته شوې، 24 کلن کېپټن محمد اسامه پکې وژل شوی او په نښته کې دوه ترهګر هم وژل شوي دي.
پاکستاني رسنيو ویلي، د يادې پېښې زمه واري تحريک طالبان پاکستان منلې ده.
پوځ په جنوبي وزيرستان کې هم د پوځ او ترهګرو ترمنځ د نښتې ويلي دي. د پوځ د بیان ترمخه، د ترهګرو سره نښته کې درې تنه، 30 کلن سپاهي اسدالله، 28 کلن سپاهي محمد سفيان او 24 کلن غېر جنګي ساتونکی زېن علي وژل شوي دي.
پوځ ويلي، د وژل شوي کپتان جنازه په راولپنډۍ کې ادا کړل شوې، وزيراعظم شهباز شريف، د پوځ مشر جنرل عاصم منير، د دفاع او اطلاعاتو وزيرانو او نورو ګڼو چارواکو پکې ګډون کړی دی.
وزيراعظم شریف ويلي، دغه قربانۍ ترهګرۍ ته د ماتې ورکولو دپاره زمونږ حوصلې پياوړې کوي، قام د خارجي ترهګرو او د هغوی د سهولت کارو پرضد ولاړ دی او پاکستان به دغه دغو دښمنانو ته د څو اړخيزه سټراټيجۍ د لارې بشپړه ماتې ورکړي.
د پاکستان صدر اصف علي زرداري او د کورنيو چارو وزير محسن نقوي هم د پوځيانو په وژنه افسوس څرګند کړی دی.
هم پرون د خېبرپښتونخوا په لکي مروت سيمه کې په يو بل وسله وال بريد کې د يو پولیس اهلکار په ګاډي ډزې شوي، پوليس اهلکار او هغه سره ناست دوه ماشومانو په ګډون پکې څلور تنه وژل شوي وو.
تحریک طالبان پاکستان ويلي، د دغه پېښې سره یې هيڅ تعلق نشته.
او په ټانک ضلعه کې نامعلومه کسانو د اېف سي ځواک درې عسکر تښتولي دي.
پوليسو پېښه تاييد کړې او ويلي يې دي د تښتول شوو عسکرو معلومولو دپاره د لټون عملیات روان دي.
دا تازه پېښې په داسې وخت کې شوي چې په 22م جون اسلام آباد کې د وزيراعظم شهباز شریف په مشرۍ د نېشنل ايکشن پلان د اېپکس کمېټۍ په غونډه کې د ملک څخه د ترهګرۍ او توندروۍ د ختمولو دپاره د ترهګرۍ مخنيوي د قامي کمپياين د بیا فعالولو دپاره د "عزمِ استحکام" په نوم عملیاتو منظوري ورکړل شوې وه.
پاکستان کې د حکومت مخالفه ګوندونو پاکستان تحریک انصاف، عوامي نېشنل ګوند او جمعيت علمااسلام ف ګوند د وړاندې نه د حکومت د دغه پرېکړې مخالفت کړی او ويلي يې دي بايد د عزم استحکام په اړه پارلیمان په اعتماد کې اخستل شوی وی.
د پاکستان پوځ په پينځمه جولايۍ ويلي وو، د پوځ د مشر جنرل عاصم منير په مشرۍ د کور کمانډرانو غونډه شوې ده، او "فورم د ملکي امنيت د مجموعي صورت حال جايزه اخستې او عزمِ استحکام په مختلفو اړخونو پکې تفصیلي بحث شوی وو".
د پاکستان پوځ ويلي وو، د کور کمانډرانو په غونډه کې په ملک کې د تلپاتې ثبات او اقتصادي خوشالۍ دپاره عزمِ استحکام د ترهګرۍ او غېر قانونه هلوځلو ختمولو دپاره د وخت تقاضا ګرځول شوې وه.
او زياته کړل شوې،"فورم د ځينو خلکو لخوا د عزمِ استحکام په حواله بلاجوازه تنقيد او ځانګړو ګټو ترلاسه کولو دپاره په اوازو اندېښه څرګنده کړې وه".
Forum