لاس رسیدونکی لینک

Breaking News

افغان طالبان: د دوی په ضد "بغاوت" راپارونکی د هزاره ټولنې مولوي مهدي وژل شوی


د طالبانو د دفاع وزارت  د شورو/ چهارشنبې په ورځ [17 اګست] ويلي مهدي په هرات کې د ايران سره په سرحدي سیمه کې هغه وخت وژل شوی چې غوښتل يې ايران ته وتښتي

په افغانستان کې د طالبانو حکومت ویلي د دوی په ضد "بغاوت" راپارونکی د هزاره ټولنې مولوي مهدي يې د بلخاب په سرپل ولسوالۍ/ ضلع کې وژلی دی.

د طالبانو د دفاع وزارت د شورو/ چهارشنبې په ورځ [17 اګست] ويلي مهدي په هرات کې د ايران سره په سرحدي سیمه کې هغه وخت وژل شوی چې غوښتل يې ايران ته وتښتي.

د وي او ای اشنا څانګې د رپورټ ترمخه د طالبانو په اعلامیه کې ویل شوي: "د سرپل ولایت په بلخاب کې د اسلامي امارت په خلاف، مهدي نومی له بغاوت وروسته له څو تنو ملګرو سره غرونو ته تښتیدلی و او غوښتل يې چې ایران ته تېښته وکړي، د کشف او استخباراتو سرحدي ځواکونو له خوا د هرات او ایران ترمنځ په سرحدي سیمه کې په نښه او د خپلو اعمالو په سزا ورسېد."

د رپورټ ترمخه، د مهدي پلویانو لا په دې اړه څه نه دي ویلي.

د اشنا څانګې رپورټ وايي مولوي مهدي په قام هزاره او د طالبانو پخوانی قوماندانان و چې په وروستیو کې له هغوی څخه جلا شوی و او په وسله وال مخالفت یې لاس پوري کړی و.

د مولوی مهدي په اړه په نورو رپورټونو کې وېل شوي چې هغه په بامیان کې د طالبانو استخباراتي مشر هم وو او د ناڅرګنده علتونو له امله د خپلې څوکۍ څخه لرې کړی شو.

د جون په مياشت کې په ټولنيزو رسنيو يوه ويډيو مخې ته راغلې وه چې پکې مهدي په بلخاب کې د خپلو ملګرو سره لیدل شوی او د هغه يو ملګري پکې ګڼو خلکو ته وېنا کوله او په طالبانو يې تور لګولی وو چې د طالبانو حکومت هزاره افغانان د قومي سياست څخه لرې کوي.

د جون په وروستيو کې د ملګرو ملتونو او د بشري حقونو نورو ادارو [اېمسنټي انټرنيشل، هيومن رايټس واچ] ويلي وو، د سرپل په بلخاب ضلع/ ولسوالۍ کې د طالبانو د لاسه د بشري حقونو سرغړونې شوي او اندېښنه يې پرې څرګنده کړې وه.

په طالبانو د بشري حقونو د سرغړونو تورونه په داسې حال کې لګېدلي وو چې طالبانو د مهدي پرضد په بلخاب کې نظامي عمليات کړي وو.

هغه وخت د طالبانو د حکومت وياند ذبيح الله مجاهد په ټويټر ویلي وو،

"په بلخاب کې هيڅ مرګ ژوبلې نه لري او د ملګرو ملتونو د ادارې د نوم اخستو پرته يې ویلي، دغه راپور بې اثاثه دی او دوی نه پوهيږي چې دغه دعوې په کوم بنياد شوي دي".

په افغانستان کې د وحدت اسلامي ګوند مشر محمد محقق هغه وخت ويلي وو، چې طالبانو په بلخاب کې د شپنو او کرونده ګرو په ګډون 20 تنه ملکي وګړي وژلي دي.

هغه دعوه کړې وه چې د اسنادو په بنياد دغه خبره کوي او ملګري ملتونه کولی شي چې په دغه اړه پلټنې وکړي.

په 26 جون د طالبانو د دفاع وزارت ورځ ویلي وو د مهدي مجاهد پرضد عملیات شوي او د هغه جنګيالي د بلخاب د مرکز څخه ويستل شوي او هغوی تښتېدلي او ياغيان په نزدې علاقه کې پټ شوي او پرضد یې عمليات دوام لري.

XS
SM
MD
LG