لاس رسیدونکی لینک

Breaking News

کراچۍ: نرښځيانو په مورت مارچ کې د خپلو حقونو غوښتنه کړې


د سیند مورت مارچ راجوړوونکې مشرې د نرښځيانو د حقونو فعالې شهزادي رای ویلي، "دا په پاکستان کې د نرښځيانو لومړی مارچ يا لاريون دی"، او زیاته کړې يې ده دغه مارچ يې د 20 نومبر د هغه نړيوالې احتجاجي ورځې برخه ده کوم چې په تشدد د وژل شوو نرښځيانو په ياد کې کيږي

په کراچۍ کې نرښځيانو د سيند مورت مارچ په نوم لاريون غونډه راجوړه کړې او د خپلو حقونو غوښتنه يې کړې ده. نرښځيانو غوښتي چې د دوی پرضد "کرکه خورول دې جرم وګرځول شي"، د دوی "د شناخت ساتنه دې يقيني کړی شي" او د دوی د حقونو دپاره جوړ "قوانين دې په اصل حالت کې په ځای وساتل شي".

سيند مورت مارچ چې نرښځيانو ورته د خپلو حقونو دپاره د لومړي سياسي مارچ نوم ورکړی، پرون د اتوار/ يکشنبې په ورځ [20 نومبر] د کراچۍ په فريير هال کې راجوړ شوی وو. په ياده غونډه کې په لویه شمېره کې د نرښځیانو ګډون والو سره د بشري حقونو فعالو، وکيلانو، او عورت مارچ غړو هم ګډون کړی دی.

په غونډه کې د پاکستان پيپلز پارټۍ جوړوونکي او پخواني وزیراعظم ذوالفقار علي بټو نمسي ذوالفقار علي بټو جونير هم ګډون کړی او د نرښځيانو په حق کې يې نعرې وهلي دي. په ياده غونډه کې د خېبرپښتونخوا نه راغلو نرښځيانو هم ګډون کړی دی.

د سیند مورت مارچ راجوړوونکې مشرې د نرښځيانو د حقونو فعالې شهزادي رای ویلي، "دا په پاکستان کې د نرښځيانو لومړی مارچ يا لاريون دی"، او زیاته کړې يې ده دغه مارچ يې د 20 نومبر د هغه نړيوالې احتجاجي ورځې برخه ده کوم چې په تشدد د وژل شوو نرښځيانو په ياد کې کيږي.

نرښځيانو د سيند مورت مارچ د لارې 12 غوښتنې وړاندې کړي، چې "مرکزي او صوبايي حکومتونه دې د نرښځيانو پرضد کرکه خورول جرم وګرځوي، د نرښځي د وژنې خون بها دې د قتل د مقدمې څخه جدا کړی شي، د دوی د شناخت د حق ساتنه دې وشي، په صنفي شناخت د نرښځيانو نه زیاتې کرايانې اخستل او د ميراث څخه محرومه کول دې جرم وګرځول شي".

دوی په "2018 کې د نرښځيانو دپاره د جوړ حکومتي قانون، او 2020 د قاعدو په خپل ځای ساتلو، په نوکريانو کې د 0.2فيصده کوټې نافذولو، په نصاب کې شاملولو او دوی سره د ناوړه چلند د مخنيوي او په اسمبلۍ کې د مخصوصه څوکۍ" غوښتنې کړي دي.

نرښځيانو د جماعت اسلامي ګوند په سېنېټر مشتاق احمد خان ښکاره نيوکې کړي چې د مذهب په نوم د دوی پرضد پروپېګنډا کوي او د نرښځيانو ژوند يې په خطره کې کړی دی.

نرښځيان وايي په 2018 کې چې د دوی د حقونو دپاره کوم قانون جوړ شوی په هغې پوښتنې راولاړول کيږي چې د شريعت پرضد دی خو دوی وايي په دغه قانون کې د اسلام پرضد هيڅ نشته.

خو سېنېټر مشتاق احمد خان وايي، د نرښځيانو دا قانون په 2018 کې جوړ شوی دی او دې ته د ټرانسجنډر نوم ورکړی شوی دی. وي او اې ډیوه سره په خبرو کې هغه وويل په دې قانون کې د نرښځې تشريح سمه نه ده، دا قانون په اصل کې د نرښځې دپاره نه دی.

هغه زیاته کړه، د پاکستان په ايين کې د ښځې او سړي د جنس ویل شوي دي جنس او صنف به يو وي جنس او صنف به بدل نه وي، هغه وويل په دغه قانون کې د بدلون دپاره يې په پارلیمان کې بدلون راوړی دی چې اصلاحات دې پکې وشي، او بل د خنثا په نوم يې بله قانونه مسوده راوړې ده چې په هغې کې د دوی دپاره پوره قانون دی او د دوی د حقونو تحفظ پکې جوړ شوی دی او په مرکزي شرعي عدالت کې يې هم په دغه لړ کې خواست کړی دی.

نوموړي دا هم وويل هغه د نرښځيانو ضد نه دی او د دوی سره د نرښځيانو خپله يوه ډله هم ملګرې ده او دا تور ردوي چې ګنې هغه د نرښځيانو ژوند په خطره کې اچولی دی او دعوه کوي کوم نرښځیان چې وژل کيږي هغو د ځينو جرايم پېشه ډلو سره په ملګرتيا کوي او په وروستيو کې درې څلور پېښې هم په دغه ډول پېښو کې شوي دي.

په پاکستان کې د 2017 د سرشمېرنو ترمخه په ملک کې د نرښځيانو شمېره خواوشا 10000 ده.

په پاکستان کې وخت په وخت د نرښځیانو د وژلو او په دوی د تشدد د پېښو خبرونه مخې ته راځي. په خېبرپښتونخوا کې د نرښځيانو اتحاديه وايي، د کال 2015 راهسې په صوبه کې د 75 نه زيات نرښځیان وژل شوي او د 1500 پورې نرښځيان د جنسي او جسماتي تشدد ښکار شوي دي

د بشري حقونو نړيوال تنظیم اېمنسټي انټرنيشنل په خپل يو وروستي رپورټ کې ويلي چې د کال 2021 د اکتوبر د میاشتې نه د کال 2022 د ستمبر د میاشتې پورې په پاکستان کې 18 نرښځيان وژل شوي او دا په اسيا کې په يو ملک کې د نرښځيانو د وژنو تر ټولو زياته شمېره ده.

د امریکې د بهرنيو چارو وزیر انتوني بلينکن د وژل شوو نرښځيانو په ياد کې د ورځې په اړه ټويټ کړی او ويلي يې دي، امریکا د جنس په بنياد، د جنس په شناخت يا څرګندولو، او جنسي خصوصياتو په سر د تشدد ختمولو ته ژمنه ده. هر چاته دا حق دی چې د خپلې خوښې مطابق ژوند وکړي.

  • 16x9 Image

    فضل عزیز

    فضل عزيز په کراچۍ کې د وي او اې ډيوه خبريال دی په سياسي، تعليمي، صحت او کلتور سره په ټولنيزو موضوعاتو وېب، رېډيو او ټيلي ويژن ته رپورټونه جوړوي او په ځانګړو موضوعاتو ليکل هم کوي. د کراچۍ د اردو پوهنتون نه يې د جرنلزم او کراچۍ پوهنتون نه يې د نړيوالو اړيکو د ماسټرۍ ډګريانې ترلاسه کړي دي.​

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:59 0:00

Recommended

XS
SM
MD
LG