ایران او اسرایل دواړو جلا جلا د ملګرو ملتونو له امنیت شورا غوښتي دي چې یو او بل د وروستیو وژونکو بریدونو له کبله په کلکه وغندي، امنیت شورا په سیمه کې د ارامۍ غوښتنه کړې ځکه چې د جګړې د پراخېدو اندېښنه یې ښکاره کړې ده.
په ملګرو ملتونو کې د ایران دایمي استازي امیر سعید ایرواني په تهران کې د حماس د مشر اسماعیل هنیه تر وژنې وروسته د چارشنبې- شورو په ورځ د امنیت شورا یوې بیړنۍ غونډې ته وویل، امنیت شورا باید سمدستي ګامونه واخلي او له اسرایل سره "د دې تېري" حساب وکړي:
"په دې کې پر بندیزونو لګولو او نورو اقداماتو باندې غور کول شامل دي چې د [اسرایل] د نورو سرغړونو د مخنیوي لپاره ضروري دي او دا اشاره باید ورکړل شي چې نړیواله ټولنه به د اسرایل ناوړه اقدامات ونه زغمي."
ایران او حماس دواړه پر اسرایل تور پورې کوي چې د ایران د نوي صدر مسعود پزشکیان د سوګند مراسمو ته د حماس پر ورغلي مشر اسماعیل هنیه باندې یې هوایي برید کړی او وژلی یې دی.
اسرایل تر اوسه د حماس د سیاسي دفتر پر مشر باندې د برید ذمه واري نه ده منلې خو په پراخه کچه دا ګومان کیږي چې برید اسرایل کړی دی.
اسرایلي چارواکو د سه شنبې- نهې په ورځ د لبنان په پایتخت بیروت کې د هغه هوایي برید ذمه واري پر غاړه واخیسته چې پکې د حزب الله یو اعلی کمانډ فواد شکر ووژل شو.
اسرایل ویلي فواد شکر د شنبې- خالي په ورځ د اسرایل تر قبضې لاندې د ګولان په غرونو کې د هغه راکټي برید ذمه وار وو چې وایي د فوټبال په میدان کې یې 12 عرب ماشومان ووژل. حزب الله په برید کې له لاس لرلو انکار کړی دی.
په ملګرو ملتونو کې د اسرایل مرستیال سفیر جوناتن میلر د چارشنبې- شورو په ورځ له امنیت شورا وغوښتل چې پر ایران باندې د نویو بندیزونو په لګولو سره له دې هېواد سره حساب وکړي ځکه چې وایي ایران حماس او حزب الله دواړو ته فنډ او وسلې ورکوي:
"[په بېروت کې] دا عملیات یو روښانه پیغام لیږي: موږ به د خپل ځان دفاع وکړو او هغو کسانو ته به په لوی قوت سره جواب ووایو چې موږ ته زیان رسوي."
په ملګرو ملتونو کې د لبنان دایمي سفیر هادي هاشم ویلي، اسرایل هڅه کوي سیمه د یوې پراخې جګړې په لور بوځي چې وایي دا به ناوړه نتیجې ولري. ښاغلي هاشم ویلي:
"موږ مخکې هم ویلي وو او نن هم په تکرار سره وایو: لبنان، د لبنان خلک او د لبنان حکومت جګړه نه غواړي."
هاشم وویل د سه شنبې- نهې په ورځ د بېروت په یوه ګڼ مېشتې سیمه کې د اسرایلي ځواکونو په برید کې د یوې ښځې او دوو ماشومانو په ګډون اوه تنه وژل شوي او 78 تنه ټپیان شوي دي.
د ملګرو ملتونو د امنیت شورا غړو د چارشنبې- شورو په ورځ په خپله غونډه کې په جګړه کې له ښکېلو اړخونو د زغم غوښتنه وکړه او یو شمېر غړو یې د اسرایلي بریدونو د پلټنې غوښتنه وکړه.
په ملګرو ملتونو کې د مرکزي یورپ د سلوېنیا هېواد استازي سېمویل زبوګر وویل، "موږ فکر کوو چې امنیت شورا باید پر دې حالت باندې خپل دریځ ښکاره کړي او د تشدد د کموالي، د سفارتکارۍ او خبرو اترو د دوام غوښتنه وکړي."
د امریکې ځانګړي استازي رابرټ ووډ امنیت شورا ته ویلي، واشنګټن نه د حزب الله پر مشر د اسرایل په برید کې لاس لري او نه د حماس د مشر له وژنې خبره ده، وایي "د هغه د وژل کېدو په اړه له موږ سره د حماس د دعوو خپلواک تصدیق نه شته."
رابرټ ووډ وویل امریکا به په غزه کې د جګړې د ختمولو، په سیمه کې د تاوتریخوالي د کمولو او د جګړې د پراخېدو د مخنیوي لپاره خپلو سفارتي هڅو ته دوام ورکړي.
د ملګرو ملتونو عمومي مشر انتونیو ګوتېریش هم د چارشنبې- شورو په ورځ په یوه بیان کې ویلي، په بېروت او تهران کې بریدونه "د [جګړې] د خطرناک زیاتوالي استازیتوب کوي".
هغه غوښتنه وکړه چې ټولې هڅې دې پر دې ولګول شي چې په غزه کې د ډزبندۍ لپاره تړون وشي او د لبنان او اسرایل تر منځ په پوله باندې د شخړې له ختمېدو سره هلته بیرته ارامي جوړه شي.
Forum