امریکې په ايران کې ښځينه فعالانو ته سختې سزاګانې غندلي

د امریکې د بهرنيو چارو وزارت د ایران په ګيلان صوبه کې 11 ښځينه فعالانو ته سختې سزاګانې اورول په کلکه غندلي، او د بهرنيو چارو د وزارت وياند دغه سزاګانې یې "غېر منصفانه" او د دوی غږونه د خاموشه کولو هڅه بللې ده.

د بهرنيو چارو دوزارت ویاند مېتهيو ميلر نه د زيارت/ پنجشنبې په ورځ خبري کانفرنس کې د وي او اې فارسۍ څانګې لخوا په ايران کې د بشري حقونو د فعالانو په اړه پوښتنه شوې، او هغه په ځواب کې د ايران په قانوني عمل نيوکه کړې او ويلي يې دي، "د ايران رژيم د دغه فېصلو د لارې د دغو زړورو ښځو غږ غلی کول غواړي".

د شورو/ چهارشنبې په ورځ د ایران په رشت ښار کې د انقلابي عدالت لخوا 11 ښځينه فعالو ته ټوله د 60 کالو بند سزا اورول شوې، دغه فعالې د 2023م په اګست کې په ګيلان صوبه کې نيول شوې وې.

په سزاګانو کې د زهرې دارس نومې فعالې ته د نهه کالو او شپږ مياشتو بند، فوروغ ثميني، سارا جهاني، یاسمين هشدري، شيوا شاسيا، نګين رضايي، متين يزداني، ازادي چوشين او زهرا دادرس ته د شپږو، شپږو کالو بند، او دوه نورو جيلوي جواهري او هومون طاهري ته د يو، يو کال بند سزا اورول شوې ده.

د امریکې د بهرنيو چارو د وزارت ویاند ويلي، د ايران د اسلامي جمهوريت قضيې او عدالتونه هیڅ اعتبار نه لري. نوموړي په ايران کې د تشدد، په زوره د جرمونو منلو، او قانوني سلاکارانو د بنديزونو خبرې هم په ګوته کړي چې دغه عمل هم د ايران په عدالتونو باور د مينځه وړي.

د ايران فعالو ته تېر د فرورۍ په میاشت کې دغه سزاګانې اورول شوي په دوی تورونه لګول شوي چې غونډې یې راجوړې کړي او ملي امنيت ته د تاوان اړولو دپاره یې ډله جوړوله.

ميلر ویلي، د صدر جوبايډن انتظاميه د ايراني خلکو د ملاتړ ژمنه کوي، د ايران د خلکو د ملاتړ دپاره به اقدمات کوي، د خپلو همکارانو سره به رابطې کوي چې د ايران د عدالت دغه ناوړه اورېدنه وغندي.

ايراني فعالې ګوهر عشقي فعالو ښځو ته د اورول شوې فېصلې په غبرګون کې په انسټاګرام ويلي، دا سخت دريځه حکومت د ښځو د حقونو د فعالو تر ټولو غټ دښمن دی.

هغې ويلي، "دا حکومت د ښځو څخه ويريږي، په ګېلان کې زما لوڼو کوم غلط کار کړی چې د 60 کلونو بند سزا ورته اورول شوې؟ ولې غله او بډې اخستونکي نه جېل کول کيږي؟ ټولې بډي خواره وزيران او وکیلان ولې جوړيږي".

د عشقي زوی ستار بهشتي په کال 2012م کې د سايبر پوليس په بند کې مړ شوی وو، هغه د بلاګنګ، فعاليتونو په سر نيول شوی وو.

هغې زياته کړې، "د اسلامي جهوريت مشرانو په غلطه دي. اخر چې، واوره به ويلي کيږي او دا زړورې ښځې به غالبيږي".

د بشري حقونو د هينګاو تنظم ترمخه، په 2023م کال کې په ايران کې لږ تر لږه 22 ښځو ته د مرګ سزا ورکړل شوې، 325 فعالې ښځې نيول شوي او 147 فعالې ښځې نيول شوي په کوړو يا دُرو وهل شوي او د مرګ سزاګانې ورته اورول شوې وې.

د رپورټ ترمخه 139 ښځو فعالو ته د 553 کلونو بند سزا اورول شوې او په دوی کې لس په مجموعي ډول په 557 کوړو وهل شوي