د امریکې خارجه وزیر اېنتني بلېنکن د اسرایل وزیراعظم بېنجمن نېټن یاهو، د فلسطيني انتظامې ادارې صدر محمود عباس او د ادارې وزیراعظم محمد اشتیه سره لیدلي او ویې وېل چې د اسرایل او فلسطینیانو په ورستۍ جګړه دواړه فریقېن د درانه زیانونو سره مخامخ شوي دي.
د نهې، سه شنبې، په ورځ د یروشلم د دورې په مهال بلینکن د اسرایل د خپل دفاع د حق حمایت وکړو.
د اسرایلي وزیراعظم بېنجمن نېټن یاهو سره مشترکه خبري غونډې ته وېنا کې اېنټني بلېنکن وویل په ورستۍ جګړه کې اسرایل او فلسطینیانو ته درانه نقصانونه رسېدلي دي او د "امید، احترام او اعتماد" د بحالولو دپاره مخکې نور کار پروت دی. د اسرایل او د فلسطیني حماس ډلې ترمنځ اوربند د تېرې جمعې د ورځ شروع شوی دی.
د فریقېنو ترمنځ د می د لسمې نېټې نه شروع شوي جګړه کې د اېسوسي اېټېډ پرېس خبري ادارې ترمخه ۲۵۰ کسان وژل شوي چې اکثریت پکې د فلسطینیانو دي او د جګړې دلاسه په غزه کې په پراخه کچه تباهي شوي ده.
بلېنکن وویل په جګړه کې مرګ ژوبله یوازې شمېرې نه وي بلکې د دې په شا د لور، زوی، مور، پلار، نېکه او یا نژدې ملګری وي. هغه وویل څنګه چې د یهودیانو په مقدس کتاب التلمود کې وېل شوي د یو ژوند زیان د ټولې دنیا نقصان دی، که دغه ژوند د فلسطیني وي او که د اسرایلي.
بلېنکن وویل د غزه د بیا ودانولو دپاره به امریکا د نړیوالې ټولنې مرسته ترلاسه کوي او داسې انتظامات به په ځای کوي چې حماس غزه ته د کومک نه ګټه ترلاسه نکړي. هغه وویل په غزه او وېسټ بېنک به د فلسطینیانو دپاره اقتصادي موقعې هم برابروي. بلېنکن د فلسطیني ادارې محمودعباس او د وزیراعظم محمد اشتیه سره په رام الله کې ولیدل. توقع ده چې هغه به د مرسته په اړه اعلان وروسته وکړي.
اسرایلي وزاعظم د اسرایل د ملاتړ دپاره د امریکې شکریه ادا کړه او حماس ته د سخت ځواب خبردار وکړو. "که چېرې حماس امن ماتوي او په اسرایل حمله کوي نو زمونږ ځواب به ډیر طاقتور وي."
د خارجه وزیر په حېث د منځني ختیځ خپل لومړي سفر په مهال به اېنتني بلېنکن د مصر سفر هم کوي او د مصر صدر عبدالفتح السیسي او خارجه وزیر سامع شکري. د اسرایلیانو او فلسطینیانو ترمنځ اوربند د مصر په کوښښونو شوی دی. د مصر نه پس به بلېنکن اردن شاه عبدالله ثاني او نایب وزیراعظم ایمن الصفدي سره ویني.
