د البانیه د حکومت په انټرنېټ نظام د ایران د سایبر حملې په سر د امریکې خارجه وزیر اېنټني بلېنکن د جمعې په ورځ د ایران د استخباراتو او امنېت وزارت، اېم او اېس، په ضد پابندۍ اعلان کړې.
بلېنکن په یو بیان کې وویل د سږ کال د جولای په میاشت کې د البانیه د حکومت په انټرنېټ نظام حمله د ایران حکومت او د اېم او اېس په مرسته شوي وه چې له امله يې د البانیه د حکومت انټرنېټ نظام او ولس ته خدمات وځنډېدل.
د امریکې د خزانې وزارت په یو جدا بیان کې وویل د البانیه د حکومت په وېب پاڼو د سایبر حملې ترڅنګ د ایران د استخباراتو وزیر اسماعیل خطیب په مشرۍ کې اېم او اېس سایبر جاسوسي کړې او د ایران د سیاسي اهدافو دپاره یې د البانیه په انټرنېټ نظام حملې کړې دي.
د امریکې د خزانې وزارت وویل ایران د البانیه د حکومت دستاوېزاتو په افشا کېدو او د البانیه د شهریانو شخصي معلوماتو څرګندېدو کې هم لاس لري.
د امریکايي بندیزونو دلاندې به د خطیب او د اېم او اېس اثاثې منجمد وي او امریکایان به ورسره باروکاري لېن دېن نشي کولی.
بلېنکن په خپل بیان کې وویل د 2007 راهسې د ایران اېم او ايي اېس حکومتي او غیر حکومتي ادارو په ضد سایبر عملیات کوي.
بلېنکن وویل د امریکې او د امریکې د اتحادیانو په ضد د ایران د سایبر حملو مخه به نیول کېږي.
د وي او ای د رپورټ نه دا نه معلومېده چې ایا ایران د امریکې تازه اعلان ته څه ځواب وېلی؟
د رویټرز خبري ادارې ترمخه، په نیویارک کې په ملګرو ملتونو کې د ایران استازې دفتر په سمدستي ډول دریځ معلومولو دپاره د رابطې ځواب ونه وېلو.
ایران د دې نه وړاندې دا خبره رد کړې چې په البانیه په سایبر حمله کې تهران لاس لري.
د شورو، په ورځ، البانیه د ایران سره سفارتي تعلقات ختم کړل او په تېرانه کې ایراني سفارتکارانو ته يې په 24 ګنټو کې د ملک پرېښودو امر وکړو.
ایران د حکومتي ټېلې وژن ترمخه ایران البانیه نه د خپلو سفارتکارانو د وېستل کېدو غندنه کړې.
د ایران خارجه وزارت په یو بیان کې دا خبره رد کړه چې ایران د البانیه د حکومت په وېب پاڼو سایبر حمله کړې ده او ویې وېل چې دا ایران دی چې په اهمو بنیادي اسانتیاو یې سایبر حملې کېږي.
د اېسوسي اېټېډپرېس خبري ادارې ترمخه د ایران او البانیه تعلقات د 2014 راهسې د تاوتریخوالي ښکار دي چې البانیه د ایران د حکومت قریباً 3000 مخالفینو ته پناه ورکړې وه. دغه ایرانیان د مجاهدین خلق غړي وو چې عراق نه البانیه ته تللي وو.
د جولای په میاشت کې مجاهدین خلق په البانیه کې د فري ایران سمټ یا د ازاد ایران په عنوان د غونډې اراده لرله چې د امریکې د کانګرس غړو ته پکې هم د ګډون بلنه ورکړی شوې وه.
دغه غونډه د امنیت په اړه د تشویش، د ترهګرۍ د خطر او ګنګوسو له امله وځنډول شوه.
په کال 2018 او په کال 2020 کې البانیه د ایران څلور سفارتکاران قومي سلامتیا ته د خطر په سبب د ملک نه وېستلي وو.
البانيه په یورپ کې د مسلمانانو د اکثریت ملک دی. د وکي پيډیا وېب پاڼې د معلوماتو ترمخه اسلام البانیه ته د خلافت عثمانیه په دور کې رسېدلی و.
یادونه: د دې خبر معلومات د وي او ای، رویټرز او د ای پي خبري نه اخیستل شوي دي
