امریکا وایي د مرستو لومړۍ بېړۍ د نوي بندر له لارې غزې ته رسېدلې ده

د غزې پټۍ ته له شدیدو اړتیا وړ مرستو بار ټرکونه د جمعې په ورځ په لومړي ځل د امریکې د نوي جوړ شوي بندر له لارې په داسې حال کې غزې ته رسېدلي چې پر پوله د اسرایل خنډونو او سختې جګړې خلکو ته د خوراکي او نورو مرستو د رسولو مخه نیولې ده.

د امریکې صدر جو بایډن په مارچ کې غزې ته د مرستو رسولو لپاره د دې لنډمهاله بندر جوړولو اعلان کړی وو. پر دې باندې 320 میلینه ډالر لګېدلي دي.

دا غزې ته د دې نوي بندر له لارې د مرستو لومړۍ قافله ده چې د امريکې پوځي چارواکو د اټکل له مخې کېدای شي د ورځې پرې 150 ټرکونه غزې ته تېر شي.

خو امریکا او مرسته کوونکې ډلې دا خبرداری هم ورکوي چې د بندر منصوبه د مځکې له لارې د مرستو د لېږدولو متبادله لار نه ګڼل کیږي چې غزې ته ټول خوراکي توکي، اوبه او تېل ورسوي.

د رپوټونو له مخې تر جګړې مخکې به هره ورځ په اوسط ډول تر 500 ډېر باروړونکي ټرکونه غزې پټۍ ته تللی.

د دې لنډمهاله بندر له لارې د مرستو رسولو چاره د وسلوالو د بریدونو د خطر، د رسد د خنډونو، د ټرکونو لپاره د تېلو د زیاتېدونکي کمښت او پر غزې پټۍ د اسرایل د محاصرې له کبله کمزورې ده.

د امریکې د پوځ مرکزي کمانډ (سېنټکام) د جمعې په ورځ په یو بیان کې د بندر له لارې د مرستو رسېدل تایید کړل او وایي لومړۍ مرستې په ځایي وخت د سهار په نهو بجو غزې ته رسېدلې، خو وایي هیڅ امریکايي پوځي ساحل ته نه دی ورغلی:

"ددې سمندري راهدارۍ له لارې په غزه کې فلسطیني وګړو ته د اضافي مرستو رسولو لپاره دا یو دوامداره او نړیواله هڅه ده چې په بشپړ ډول یو بشردوستانه کار دی او په دې کې د ګڼ شمېر هېوادونو او د بشري حقونو د تنظیمونو د مرستو توکي شامل دي."

ددغه بندر د جوړولو چارې د پنجشنبې- زیارت په ورځ بشپړې شوې دي او له هغه څو ګنټې وروسته پېنټاګان وویل، د بشردوستانه مرستو لړۍ به ډېر ژر پیل شي خو وایي د وېشلو په چارو کې یې د متبادل هیڅ تمه نه شته چې د ترتیبولو چارې یې ملګري ملتونه تر سره کوي.

ملګرو ملتونو اندېښنه ښکاره کړې چې د مځکې له لارې په تېلو بار ټرکونه ټول درول شوي دي او دا به د غزې خلکو ته د مرستو رسولو چارې لا زیاتې له ستونځو سره مخ کړي.

د ملګرو ملتونو مرستیال ویاند فرحان حق وایي، "موږ تېلو ته زیاته اړتیا لرو. دا مهمه نه ده چې مرستې څنګه راځي، د سمندر له لارې او که پر مځکه ځي، خو له تېلو پرته خلکو ته د مرستو رسېدل امکان نه لري."

د پېنټاګان ویانده سبرینا سنګ وایي د تېلو رسولو مسئله له اسرایلي چارواکو سره د امریکې په ټولو خبرو کې شامله ده. هغه وایي پلان دا دی چې د سمندري راهدارۍ له لارې د مرستو لېږدول ورو پیل شي او د وخت په تېرېدو غزې ته د ټرکونو د تېرېدو بهیر پراخ کړل شي.

مرستندویه ادارې وايي د غزې په جنوبي برخه کې د دوی د خوړو زېرمې او تېل په ختمېدو دي، خو د امریکا نړیواله پرمختیایي اداره یوسېډ او د خوراک نړیواله اداره وايي د غزې په شمال کې کاختي زیاته شوې ده.

اسرایل ټینګار کوي د بشري مرستو پر ورتګ یې هیڅ بندیز نه دی لګولی او پر ملګرو ملتونو یې تورې پورې کړی چې وایي‌ غزې ته د رسېدلو توکو په وېشلو کې ځنډ راولي.

ملګري ملتونه وايي جګړې، د اسرايل ډزو او ناوړه امنیتي حالاتو د مرستو د وېشلو مخه نيولې ده.اسرایل وېره لري چې حماس به د اسرایلي پوځیانو خلاف په جګړه کې له تېلو کار واخلي.