د امریکې صدر ډانلډ ټرمپ ویلي د افغان طالبانو او نورو ډلو سره مثبتې خبرې روانې دي او په دغه خبرو کې د پرمختگ وروسته به په افغانستان کې د امریکايي ځواکونو په شمېره کې کمی کولی شي.
د نهې، سه شنبې، په ماسخوتن د امریکې کانگرس یوې غونډې ته د سټېټ اف دي یونین تقریر کې صدر ټرمپ وویل په هغه سیمو کې به د امن دپاره کوښښونه کولی شي چرته چې د کلونو راهسې امریکايي ځواکونو په جنگونو کې ښکیل دي.
هغه وویل د افغانستان او عراق په جگړو کې د کال ٢٠٠١ راهسې شا او خوا ٧٠٠٠ امریکايي عسکر وژل شوې او د ٥٢٠٠٠ نه زیات نور عسکر زخمیان شوې دي.
په افغانستان کې د جنگ په اړه صدر ټرمپ وویل وخت راغلی چې د امن دپاره کوښښونه وکړی شي. هغه زیاته کړه چې طالبان هم امن غواړي.
د تېرې څه مودې راهسې په افغانستان کې د امن دپاره د امریکې خاص استازي زلمي خلیلزاد په قطر کې د طالب استازو سره د مذاکراتو څو ناستې کړې دي. بله ناسته د فېبرورۍ د میاشت په ٢٥ نېټه کېدونکې ده.
ښاغلي خلیلزاد او هم طالبانو په خبرو کې د پرمختگ څرگندونې کړې دي.
صدر ټرمپ د کانگرس ایوان بالا او د استازو ایوان مشترکه غونډې ته وویل د طالبانو سره په مثبت ډول خبرې دوام لري. "ځما حکومت د یو شمیر افغان ډلو سره مثبت مذاکرات کوي چې پکې طالبان هم شامل دي. په خبرو کې د پرمختگ وروسته به مونږ په خپلې موجودگۍ او په ترهگرۍ توجه کې د کمي جوگه شو."
صدر ټرمپ زیاته کړه چې په افغانستان کې د سیاسي حل دپاره په "مذاکراتو کې چټکتیا" راوستل شوې ده او وې ویل په امریکايي عسکر په افغانستان کې ډیر په مېړانه جنگېدلې دي. " د دوی د زړه ورتیا په سبب مونږ د دې جوگه شوي یو چې د دې خونړي جنگ سیاسي حل ولټوو."
امریکايي صدر وویل د جاني تلفاتو ترڅنگ د افغانستان او عراق په جنگونو اووه کرب ډالر مصرف شوې دي.
صدر ټرمپ د شام څخه هم د امریکايي ځواکونو د انخلا اعلان کړی دی. امریکايي ځواکونو د ٢٠١۴ راهسې په شام کې د داعش وسله والې ډلې خلاف جگړه پېل کړې وه.
صدر ټرمپ وویل په داسې حال کې چې د شام زیاتره برخه د "وینې تږې بلاگانو" یعنې داعش د منگولو نه ازاده کړې شوې ده او امریکا د خپلو ائتلافیانو سره د داعش باقیات د ختمولو په لړ کې مرسته کوي "وخت راغلی چې مونږ خپلو زړه ورو جنگیالو ته کور ته په راتگ تود هرکلی ووایو."