د امریکې په سېنټ کې د صدر ډانلډ ټرمپ د مواخذې اورېدنه روانه ده او زیارت، پنجشنبه، اخېرۍ ورځ ده چې د سېنټ غړی به د صدر د دفاع ډلې او د کانگرس د ایوان نمایندگانو استازو نه پوښتنې کوي او په دې خبره به بحث کوي چې ایا د سېنټ اورېدنې ته نور گواهان راوغوښتل شي او که نا؟
د حزب اختلاف د ډیموکرېټک پارټۍ د کانگرس غړي چې په ایوان نمایندگان کې اکثریت لري او د صدر ټرمپ د نااهله کولو دپاره یې د مواخذې دوه مادې د ووټونو په لوې اکثریت منظور کړي دي او په ایوان کې یې د گواهانو بیانونه اورېدلي وو، غوښتنه کوي چې د سېنټ بحث ته دې هم نور گواهان راوبلل شي.
سېنټ ته د گواهانو د رابللو فیصله د صدر ټرمپ د واک من ریپبلېکن پارټۍ په لاس کې ده چې په سېنټ کې اکثریت لري او د صدر ټرمپ د مواخذې مخالفت کوي، وايي صدر د نااهله کېدو جوگه هیڅ کار نه دی کړی.
ډیموکرېټک پارټۍ د صدر ټرمپ خلاف د دوه مادې سېنټ ته لېږلې دی. د کانگرس د ډیموکرېټک پاټۍ غړو په صدر ټرمپ د واک اختیار د ناجایز استعمال او د کانگرس د مخه نیولو الزامات لگولي دي وايي په دې بنیاد دې ډانلډ ټرمپ د صدارت دپاره نا اهله وټاکل شي.
په سېنټ کې د مواخذې په ارونه کې دا وخت توجه د امریکې د قامي سلامتیه پخواني مشیر جان بولټن ته اوړېدلې ده. جان بولټن په خپل چاپ کېدونکي کتاب کې لیکلي دي چې صدر ټرمپ ورته ویلي وو هغه یوکرېن ته د ٣٩١ مېلین ډالرو پوځي امداد ایسار کړی دی. د بولټن ترمخه امریکايي صدر ورته ویلي وو تر څو د یوکرین صدر ولادومېر زلسنکي د جوبایډن او د هغه زوي هنټر بایډن خلاف د بدعنوانۍ د تحقیقاتو اعلان ونکړي یوکرېن ته به پوځي امداد نه ورکوي.
د ډیموکرېټک پارټۍ جوبایډن د کال ٢٠٢٠ په صدارتي انتخاباتو کې امیداوار او د صدر ټرمپ حریف دی.
د کانگرس د ډیموکرېټک گوند غړي وايي جان بولټن دې د سېنټ اورېدنې ته راوبلل شي خو د ریپلېکن گوند اکثریت غړي وايي د یوکرېن پوځي امداد په منجمد کولو کې صدر ټرمپ هیڅ غلط کار نه دی کړی او ریپلیکن غړي د نورو گواهانو او یا د نورو ثبوتونو مخې ته د راوړلو مخالفت کوي.
په ایوان نمایندگانو کې د اورېدنې په مهال وېل شوي وو چې جان بولټن یوکرېن ته د امداد په وردولو تشویش څرگند کړی و او د وایټ هاوس د چارواکو ترمخه په یوه موقع یې دغه معامله د "ډرگ ډیل" یا د نشۍ توکو د سودا په نامه یاده کړې وه او ځان یې ترې لرې ساتلی و.
په ایوان نمایندگان یا هاوس اف رېپرېزېنټېټیوز کې د استخباراتي چارو کمېټۍ مشر اېډم شېف د سېنټ په غړو غږ کړی چې په خپله دې د جان بولټن د رېښتیا والي جاج واخلي او اوریدنې ته دې هغه راوغواړي.
خو د ټرمپ یو وکیل ویلي ایوان نمایندگان په تادۍ کې د صدر ټرمپ خلاف د مواخذې "نیم پاخه" الزامات منظور کړې دي او که چېرې سېنټ ته د نورو گواهانو ته د رابللو لړۍ پېل کړی شوه نو د مواخذې دا مقدمه به څو میاشتو ته وغځېږي.
که څه هم ایوان نمایندگان د صدر ټرمپ د نااهلۍ په حق کې ووټ ورکړی دی خو په سېټن کې د ریپلیکن گوند اکثریت دی او دا امکان ډیر کم لیدل کېږي چې د مواخذې په حق کې به په دریو کې دوه ووټونه واچول شي.
