په یمن کې امریکايي ځواکونو په کال ٢٠٠٠ کې د امریکې د سمندري پوځ په جهاز بم حمله کې د مشکوک وسله وال په پناه ځای هوايي بمباري کړې ده. د امریکې په سمندري جهاز حمله کې ١٧ عسکر وژل شوې دي.
د امریکې د پوځ مرکزي کمانډ ترجمان کېپټن بل اربن وویل چې یمن کې هوايي بمباري تېره هفته په مارب صوبه کې وشوه چې هدف یې جمال البدواي و. البداوي د القاعده په هغو شپږو وسله والو کې شمال دی چې د امریکې په یو ايس ایس کول سمندري جهاز د حملې په لړ کې مجرم ټاکل شوی دی او د ایف بي ايي د مطلوبو ترهگرو په فهرست کې یې نوم شامل دی.
کېپټن اربن وویل امریکايي ځواکونه د البداوي د مرگ د تصدیق دپاره پلټنې کوي.
د دفاع وزارت یا پېنټگان یو چارواکي وي او ای ته وویل د ډي این ای نتجې ورسته د دې خبرې تصدیق کولی شي چې ایا البدوايي په هوايي بمبارۍ کې وژل شوی دی او که نا؟
د کال ٢٠٠٠ د اکتوبر په میاشت کې د امریکې په یو ایس ایس کول نومې سمندري جهاز د یمن په عدن بندر کې ځانمرگي حمله وشوه چې پکې ١٧ امریکايي عسکر ووژل شو او گڼ شمېر نور زخمیان شول. القاعده د حملې ذمه واري واخیسته.
په یو ایس ایس کول د حملې په لړ کې یمني مامورینو البداوي په کال ٢٠٠٠ کې ونیولو، په کال ٢٠٠٣ کې هغه د زندان نه وتښتېدو، په کال ٢٠٠۴ کې بیا ونیول شو خو په کال ٢٠٠٦ کې البداوي بیا د زندان نه په وتلو کې کامیاب شو او وه نه نیول شو.
امریکې په البداوي په پنځوسو جرمونو کې د ککړتیا تورونه ولگول چې پکې د ترهگرۍ، د امریکايي شهریانو او پوځي مامورینو د وژلو الزمات هم شامل وو. په یو ایس ایس کول د حملې سره سره په البداوي دا الزام هم وو چې د کال ٢٠٠٠ د جنورۍ په میاشت کې یې په یو بل امریکايي سمندرۍ جنگې جهاز د حملې کوښښ کړی و.
په عین حال کې یو امریکايي چارواکي وویل امریکايي ځواکونو د جمعې په ورځ د یمن ېه الدیمان سیمه کې د القاعده وسله والو خلاف هوايي بمباري وکړه. په کال ٢٠١٨ کې امریکايي ځواکونو په یمن کې د القاعده او داعش خلاف په مجموعي توگه شپږ دیرش هوايي حملې کړې دي.
