د پاکستان په قبائيلي سيمه وزيرستان کې د مشکوکه امريکايي بې بائيلټه ډرون الوتکې په بريد کې لږ تر لږه پينځه جنگيالي وژل شوي ، او درې نور ژوبل شوي دي .
د امنيتي سرچينو ترمخه د بي پائيلټه ډرون بريد د شمالي او جنوبي وزيرستان په پوله پرتې د شوال علاقې په کنډغر کې شوی دی ، او په جنگيالو ميزائيلي داغل شوي دي .
راپورونه وايي د ډرون بريد کې ازبک جنگيالي په نخښه شوي ، او په وژل شوؤ مشکوک ترهگرو کې د يو ازبک کمانډر د وژنې هم وئيل کيږي . دغه رنگ په بريد کې د څو نورو کسانو د ژوبلېدو خبرونه هم مخې ته راغلي دي .
بريد کې د رامنځته شوې مرگ ژوبلې ، او وژل شوؤ کسانو په اړه کره مالومات مخې ته نه دي راغلي ، ځکه چې په کومه سيمه کې د ډرون حملې وئيل کيږي هلته د ميډيا رسد نشتی .
پاکستان د وړاندې نه د ډرون بريدونو غندنه کوي ، او وايي چې دغه حملې يي د ملکي خودمختارۍ او جغرافيايي پولو خلاف ورزي ده .
د پاکستان دخارجه وزارت لخوا په بيانونو کې دا هم وئيل شوي ، چې حکومت يي په شمالي وزيرستان کې د ترهگرو په ضد فېصله کن عمليات کوي نو په داسې کې د ډرون حملې هيڅ جواز نه پاتې کيږي او دغه بريدونه بندېدل پکار دي .
خو امريکايي چارواکي د ترهگرو په ضد ډرون يوه موثره وسله گڼي .
د افغانستان سره په پوله د پاکستان په قبائيلي سيمه شمالي وزيرستان کې پوځ د ضرب عضب په نوم عمليات پېل کړي ، او پوځ وايي په سيمه کې يي تراوسه پورې په ترسره شوؤ عملياتو کې د ۱۱۰۰ نه زيات ترهگر وژلي ، چې پکې ازبک جنگيالي هم شامل دي .
