وایټ هاوس "له دریابه تر سمندره” لانجمنه نعره رد کړې

وایټ هاوس وايي “له دریابه تر سمندره” يا “From the river to the sea”
نعره ډېر خلک د یهودیانو پر ضد نفرت ګڼي نو ځکه د اسرایل او حماس اوسنۍ جګړې کې د یادې کلمې کارول ردوي.

“له دریابه تر سمندره” نعره د فلسطینیانو په حق کې د مظاهرو په مهال پورته کېږي او معنا یې دا اخستل کېږي چې د دریاب نه تر سمندر پورې فلسطین به ازادېږي. د نعرې مخالفین وايي د نعرې پلویان د اسرایل وجود نه تسلیمیوی.

د وایټ هاوس ویاندې کېرین جین پیېر د زیارت، پنجشنبې، په ورځ وویل فرام د دېور ټو دی سي اصطلاح تقیسم پېدا کوی او ډیرو خلکو دپاره دردونکي ده.

جین پيېر وویل ډیر خلک دا نعره اېنټي سېمېټیمزم یا یهودیانو نه د نفرت نعره ګڼي او په واضحه توګه یې د دې نعرې استعمال ردوي.

د امریکې د اېن پي ار رېډیو "فرام د رېور ټو د سي” نعرې په اړه د جمعې په ورځ په يو رپورټ کې وویل چې د اووم اکتوبر نه پس د اسرایل او حماس جنګ د شروع کېدو وروسته ورځو کې د فلسطینیانو د حقونو پلویان دا نعره استعمالوي چې "فرام د دېور ټو د سي، پېلسټاین وېل بي فري."

“له دریابه تر سمندر” نعره څه معنا لري؟

ډېر څېړونکي او په مېډیا کې راغلي رپوټونه وایي د دې نعرې اشاره د بحیره روم او د اردن ترمنځه پرتې جغرافیايي سیمې ته ده.

په دې اړه اېن پي ار وايي د ځینو خلکو دپاره دا نعره په ټوله سیمه کې د فلسطیني ولس د ازادۍ شعار دی خو د ځینو خلکو دپاره دا نعره د تشدد او اسرایل د ختمولو دپاره غږ دی چې د حماس په شان مسلح ډلې يې کوي.

په اووم اکتوبر په اسرایل د حملې وروسته، دا نعره په خصوصي توګه لانجمنه شوې ده او په کانګرس کې د ریپبلېکن او د ډیموکرېټېک پارټۍ غړو د دې نعرې د استعمال غندنه کړې او د کانګرس یو غړي خو ویلي دا نعره د مېلینونو یهودیانو د قتل عام دپاره غږ دی.

په کانګرس او پوهنتونونو کې په نعره نیوکې

د شورو، چهارشنبې، په ورځ د کانګرس هاوس اف رېپرېزېنټېیوز د 188 په مقابل کې په 234 ووټونو د ډېموکرېټېک پارټۍ د هاوس د غړې رشېده طلیب د دې نعرې په اوچتولو غندنه وکړه. طلیب د هاوس یوازېنۍ فلسطیني نژاد غړې ده او په یوه وېډیو کې یې دغه نعره استعمال کړې وه.

فلسطین مصنف او په واشنګنټن کې د فلسطین-اسرایل پروګرام لپاره د عرب مرکز مشر یوسف منیر په 2021 کې چاپ شوي یو مضمون کې، فرام د رېور ټو د سي، په اړه لیکلي چې دا "ډیره بدنامه کړی شوې" نعره د اسرایلي "قبضې" دلاسه د فلسطیني ولس او د فلسطیني وطن د ویشل کېدو مزاحمت کوي.

منیر لیکي کله چې فلسطینیان دا اصطلاح استعمالوي نو دا بنیادي خبره په پام کې نه اخیستل کېږي چې فلسطینان څه غوښتنه کوي؟ د منیر په نظر د دې نعرې دلارې فلسطینیان د یو داسې وطن غوښتنه کوي چې دوی په کي د مساوي شهریانو په څېر ژوند کولی شي، نه دوی په چا غلبه لري او نه هم دوی د چا د غلبې دلاندې وي او کله چې دوی فرام د رېور ټو د سي نعره کوي نو د غلبې موجوده نظام ختمول غواړي.

د برطانیې د ګارډین اخبار د اکتوبر په 31 نېټه د یو رپورټ ترمخه، د لېبرپارټۍ د برطانیې د پارلېمنټ غړي اېنډي مېک ډانلډ په لندن کې یوې مظاهرې ته وویل تر څو چې یې انصاف نه وي ترلاسه کړی چې د سیند او سمندر ترمنځ ټول خلک، اسرایلیانو او فلسطینیانو، په امن او مساوات ژوند وکړي قرار به نه کښني.

درې ورځې وروسته، د رېور اېنډ د سي اصلاح په استعمال لېبر پارتۍ اېڼدي معطل کړو او د هغه خلاف یې د تحقیقاتو امر وکړو.

د اېسوسي اېټېډ پرېس یو رپورټ وایي په اووم اکتوبر په اسرایل د حماس د حملې وروسته چې په کې 1400 اسرایلیان وژل شوي او د 200 نه زیات یرغمل کړل شوي دي، د امریکا په کالجونو کې د اسرایل او د فلسطینانو حمایت کوونکو طالب علمانو ترمنځ تاو تریخوالی زیات شوی دی. په رپوټ کې د یهودي طالبعلمانو له خولې ویل شوي چې په کالجونو او پوهنتونو کې دوی ته ګواښ زیات شوی دی.

د امریکا په مشهور هاورډ پوهنتون باندې د ډېرو نیوکو وروسته، د پوهنتون مشر “له دریابه تر سمندره” نعره وغندله او زیاته یې کړه په تاریخي توګه دا نعره د ډېرو لپاره د اسرایل نه د یهوديانو د ختمولو لپاره کارول کېږي.