د کابل حامد کرزي انټرنېشنل ایرپورټ خلاص دی او هلته جهازونه کښېناستلی او اوچتېدلی شي. دا خبره وایټ هاوس د نهې، سه شنبې، په ورځ په یو بیان کې وکړه.
د وایټ هاوس د بیان ترمخه د نهې، سه شنبې، په ورځ امریکايي پوځي جهازونو امریکايي شهریانو او سفارتي عملې د راوېستلو په غرض حرکت کولو.
وایټ هاوس وویل د ګل، دوشنبې، په ورځ د ۷۰۰ نه زیات کسان د کابل نه راویستل شوو چې پکې ۱۵۰ امریکايي شهریان وو.
د بیان ترمخه د کابل د هوايي ډګر د تحفظ دپاره ۳۵۰۰ عسکر پرځای شوي دي.
د کابل هوايي اډې څخه د جهازونو پروازونه د نهې، سه شنبې، په ورځ بیان شروع شوي دي.
د وي او ای د انګریزۍ څانګې د رپورټ ترمخه په افغانستان کې د نېټو غیرپوځي نماینده په ټوېټر یو تصویر شریک چې پکې د کابل په هوايي ډګر د امریکې یو شمېر پوځي الوتکې ولاړې لیدل کېږي.
د نېټو نماینده وویل یو شمېر جهازونه یې په اډه د کښېناستلو او د اوچتیېدول په مهال لیدل.
امریکايي پوځ د نهې، سه شنبې، په ورځ د کابل په هوايي اډه د دوو کسانو د وژل کېدو تصدیق وکړو. د پېنټګان ترجمان وویل په دوو بېلا بېلو پېښو کې دوو کسانو د خلکو په ګڼه ګوڼه ډزې وکړې خو دواړه کسان امریکايي ځواکونو وویشتل.