د پاکستان پوځ نن په اووم اپرېل ويلي، په استخباراتي عملياتو کې یې "یو مهم مطلوب ترهګر" ګلزار امام عرف شمبی نيولی دی. پوځ ويلي، ګلزار امام د لاقانونه ګرځول شوي وسله وال تنظیم بلوڅ نېشنل ارمي مشر وو.
د پوځي بيان ترمخه بلوڅ نېشنل ارمي د بلوڅ ريپبلکن ارمي او یونايټډ بلوڅ ارمي وسله والو ډلو د يو ځای کېدو په نتيجه کې جوړه شوې وه.
او ويل شوي ياده ډله بلوڅ نېشنل ارمي د بلوچستان صوبې په پنجګور او نوشکي سيمو کې په امنیتي ادارو بريدونو کې ککړ او د ګڼو ترهګرو بريدونو زمه وار وو.
پوځ ويلي، ګلزار امام د کال 2018م پورې د بلوڅ ريپبلکن ارمي نومې ډلې د براهمداغ بګټي مرستیال پاتې شوی، او هغه د بلوڅ راجي اجوی سنګر په جوړولو کې مهم رول لوبولی او د عملیاتو مشر یې پاتې شوی دی.
پوځي زياته کړې، د هغه افغانستان او هند ته سفرونه هم په ريکارډ دي او د دښمنه استخباراتو سره د هغه اړيکې څېړل کيږي، ځکه دښمنه استخباراتو هم هڅه کړې چې د پاکستان د رياست او قامي ګټو پرضد کار وکړي.
ويل شوي هغه د اوږدو پلان شوو عملياتو په ترڅ کې نیول شوی دی. خو د هغه د نيولو د وخت او ځای په اړوند څه نه دي ويل شوي.
د پاکستان پوځ د ګلزار امام ګرفتاري د بلوڅ نېشنل ارمي سره سره د نورو وسله والو ډلو دپاره ضربه ياده کړې څوک چې د بلوچستان امن د خرابولو هڅه کوي.
ګلزار امام وړاندې نيول شوی
تېر کال د اکتوبر په مياشت کې داسې خبرونه مخې ته راغلي وو چې ګلزار امام د ستمبر په میاشت کې په ترکي کې نيول شوی وو هغه وخت چې هغه د ایران نه هلته ورسېدو.
د انلاين مجلې دې ډپلومېټ په يو خبر کې ویل شوي وو چې نه بلوڅ بېلتون غوښتونکو او نه پوځ يا استخباراتي ادارو په رسمي ډول د ګلزار امام نيول تاييد کړي خو په پټه دواړو د هغه د نیولو تصديق کړی وو.
د ګلزار امام په اړوند خپور شوي خبر کې ویل شوي وو چې هغه هم د تېر کال په سر کې بلوڅ نېشنل ارمي ډله جوړه کړې وروسته له هغې چې بلوڅ ريپبلکن ارمي او يونايټډ بلوڅ ارمي يو ځای شوي وو.
هاغه وخت د هغه د نيولو سره په بلوڅ بېلتون غوښتونکو د اغېزو په اړوند خپور شوي رپوټ کې ويل شوي وو چې د هغه د نيول به د بلوڅ نېشنل ارمي دپاره ضربه وي خو په نورو بلوڅ وسله والو ډلو به یې ډېر اثر نه وي.
ګلزار امام څوک دی؟
د پاکستان سرکاري خبري ادارې اې پي پي ويلي، ګلزار امام په کال 1978 کې د بلوچستان صوبې د پنجګور په پروم علاقه کې زېږېدلی، د 2009 پورې ټېکدار او رپورټر هم پاتې شوی دی.
د هغه په اړوند په نورو مطبوعاتي راپورونو کې ويل شوي چې هغه په کال 2003 کې د طلبه سیاست پېل کړی او بلوڅ سټوډنټس ارګنايزېشن کې شامل شوی وو، ويل کيږي د هغه ورور په بل بلوڅ وسله واله ډله مجيد بريګېډ کې پاتې شوی وو.
د سرکاري خبري ادارې په خبر کې دعوه شوې ګلزار امام په کال 2017 کې د ګل نوید په نوم د افغانستان په پاسپورټ د هند سفر کړی وو.
