د پاکستان د ملیشې یا ایف سی ځواکونه وایي په خیبرپښتونخوا صوبه کې یې د ترهګرو داسې 18 همکاران نیولي چې ورڅخه په لویه پیمانه پیسې، سره اؤ سپین زر برامد شوي دي.
د خالي په ورځ د ایف سي ویاند پخپل یو بیان کې وئیلي د ترهګرو دغه همکاران د تورخم په پوله پاکستان ته را اوښتي وؤ چې ورسره شپږنیم کروړه پاکستانۍ اؤ بهرنۍ پیسې، 2500 ګرام سره اؤ 1500 ګرامه سپین زر هم وؤ
ویاند وایي د ترهګرو دغو همکارانو غوښتل دغه پیسې، سره اؤ سپین زر د ورانکارۍ د غرضونو دپاره ترهګرو ته ورکړي اؤ یا پرې هم د هغوئ دپاره وسلې واخلي خو د هغوئ د قبضې څخه دغه ټولې پیسې، سره اؤ سپین زر امنیتي ځواکونو ترلاسه کړي دي .
ویاند زیاته کړې په نیول شوؤ پیسو کې ډالرې، ریالونه اؤ دینار شامل دي.
هغه وایي د ترهګرو دغه همکاران د قومي ایکشن پلان په اساس ترسره شوؤ عملیاتو کې د تیرو دریوؤ ورځ په مهال نیول شوي چې د زیاترو تعلق پکې د خیبرپښتونخوا صوبې سره دی.
د ایف سي د ویاند له لوري په جاري شوي دغه بیان کې دا سپیناوی نه دی شوی چې دنیول شوؤ کسانو تعلق د کومې ترهګرې ډلې سره دی خو دومره یې ضرور وئیلي چې دغه ټول کسان د افغانستان په پوله پاکستان ته را اوښتي وؤ.
دا په داسې حال کې ده چې د پاکستان حکومتي اؤ امنیتي مشران کلکې دعوې کوي چې افغانستان سره په لګیدلې پوله یې د شکمنو خلکو په تګ راتګ جوخت نظر ساتلی.
په عین حال کې د پيښور پولیسو هم دعوه کړې چې هغوئ د ناچله ګرځول شوې تندره ډلې حزب التحریر هاغه څلور غړي نیولي چې خلک یې تندلاریتوب طرفته مائله کول.
پیښور:د ترهګرو 18 همکاران درنو پیسو اؤ سرو زرو سره نیول شوي
پیښور —