دامريکا دبهرنو چارو وزير جان کيري وئيلي دي چې روس اؤ يوکرين دې دواړه په گډه ختيز يوکرين کې دروان تاؤتريخوالي ختمولو اؤ اوربند دموثره جوړولو لپاره کار وکړي.
جان کيري دزيارت په ورځ دسربيا پلازمينه بلغراد کې دسلامتۍ اؤ مرستې اروپائي تنظيم( او ايس سي اي) دکليزې وزارتي غونډې په مهال وينا کوله، دغه دوه ورځني غونډه کې دگڼو اروپائي هيوادونو خارجه وزيران شريک دي.
خپله وينا کې دامريکا دبهرنو چارو وزير وويل چې روس ته ختيز يوکرين څخه دخپلو پوځيانو دويستلو لپاره کردار ادا کول اؤ داو ايس سي اي مبصرينو ته دختيز يوکرين جنگ ځپلې سيمې ډنباس پورې ازادانه رسد ورکول پکار دي.
هغه وويل يوکرين ته به هم دخانه جنگ بندۍ ښکار خپلې ختيزې سيمې کې داوربند اؤ سيمې دبيارغونې لپاره خپل کردار ادا کول وي.
جان کيري وويل او ايس سي اي دخپل جوړيدو څخه وروستو تيرو څلويښتو کلونو کې لويې پرمختگ کړى خو اوس هم ډير څه کول پاتې دي.
هغه وويل دتنظيم غړو هيوادونو ته دخپلو وسله والو پوځونو ترمينځ دمعلوماتو راکړې ورکړې ته وده ورکول پکار دي اؤ ددې ترڅنگ دبشري حقونو دتحفظ اؤ تعصب دخاتمې لپاره هم هلې ځلې تُندول پکار دي.
