د افغانستان سره په پوله پرته د پاکستان قبائيلي سيمه مومند ايجنسۍ کې نن د ګل په ورځ د سړک غاړې ښخ دوه بمي چاؤدنو کې د ملېشې د يو عسکر په ګډون درې کسان وژل شوي او څلور عسکر ژوبل شوي دي .
د مومند ايجنسۍ د پوليټيکل انتظاميي د چارواکو په وينا دغه پېښې د بره مومندو د بائيزو تحصيل په اتم نومې کلي کې رامنځته شوي دي .
د چارواکو په وينا د سړک غاړې ښخ بم يوه پېښه کې په ګاډي کې ناست د ملېشې يو عسکر او د ګاډي ډرائيور (ځايي عام کس) وژل شوي دي .
او بله پېښه چې هم په اتم کلي کې رامنځته شوې ده ، په دغه چاؤدنه کې هم د ملېشې عسکر په هدف شوي خو چارواکي وايي د چاؤدنې په نتيجه کې يو ځايي کس وژل شوی او د ملېشې څلور عسکر ژوبل شوي دي .
د دغو پېښو زمه واري چا په غاړه نه ده اخيستې .
مومند ايجنسۍ کې د سړک غاړې بمي چاؤدنو پېښې په داسې مهال رامنځته شوي چې نن سيمې ته د خېبرپښتونخوا صوبې ګورنر سردار مهتاب احمدخان عباسي هم په دوره ورغلی دی .
چارواکو وئيلي د چاؤدنو پس يې په علاقه کې د لټون عمليات پېل کړي او علاقه يې په ګېره کې اخيستې ده .
