د افغانستان سره په پوله پرته د پاکستان قبائيلي سيمه مومند ايجنسۍ کې د سړک غاړې ښخ يو بم په چاؤدنه کې د دوه کم عمره ماشومانو په ګډون درې کسان وژل شوي دي .
د مومند ايجنسۍ پوليټيکل چارواکو د پېښې پخلی کړی او وئيلي دي دغه پېښه نن د شورو په ورځ مازيګر د تحصيل امبار په خارۍ نومې دره کې رامنځته شوې ده .
د چاوراکو په وينا د دغه سيمې يو اوسېدونکی ذاکر په خپل ګاډي (موټر) کې کور پله روان ؤ او په ګاډي کې ورسره کم عمره ماشومان سواره وو چې د سړک غاړې ښخ بم پرې وچاؤدو او په نتيجه کې دغه کس په خپله او دوه ماشومان وژل شوي دي .
د سيمې اوسېدونکو ډيوه ريډيو ته وئيلي چې د چاؤدنې په ترڅ کې د ذاکر يو زويې ژوبل شوی ، او ګاډي ته سخت زيان اوختی دی .
يو چارواکي وئيلي چې د چاؤدنې ښکار شوی تن د کوم امن لښکرغړی نه ؤ او نه يې د کومې وسله والې ډلې سره تړاؤ لرلو ، ولې خپلوان يې د امن لښکر غړي دي .
مومند ايجنسۍ کې له دې وړاندې وخت په وخت د امن لښکرو غړي او امنيتي سرتيري په بېلابيلو پېښو کې په هدف شوي دي .
د ګل په ورځ هم قبائيلي سيمه مومند ايجنسۍ کې د سړک غاړې دوه بمي چاؤدنو کې د ملېشې د يو عسکر په ګډون درې کسان وژل شوي او څلور نور سرتيري ژوبل شوي وو .
