د څارنې يوې ډلې ويلي افغانستان کې روان کال (۲۰۱۶م) کې تراوسه پورې لس خبريالان د دندې ترسره کولو په وخت وژل شوي دي ، د دغه هېواد په تاريخ کې روان کال د خبريالانو دپاره تر ټولو خونړی ګرځېدلی دی .
د افغان خبريالانو د خونديتوب کميټۍ د روان کال د شپږو مياشتو راپور جاري کړی او ويلي يې دي د تېر کال په پرتله سږ کال افغانستان کې خبريالانو باندې د تشدد پېښې ۳۸ فيصده سېوا شوي دي .
راپور ويلي چې د تشدد زياتې پېښې د حکومت په استازيتوب ترسره شوي ، په دې کې کوم لاس ککړ دی دا نه ده په ډاګه کړی شوې .
راپور دا هم ويلي چې د تېر کال په پرتله سږ کال د طالبانو لخوا هم په خبريالانو د تشدد پېښو کې زياتوالی مخې ته راغلی دی .
د راپور ترمخه خبريالانو باندې د تشدد د ۲۱ پېښو زمه وار حکومت او د ۱۶ پېښو زمه وار طالبان دي .
راپور د هېواد رسنيو ته ازادې ويلي او دې ته يې " د تېرو ۱۵ کالو لويه کاميابي وئيلې ده "، ولې د دې ترڅنګ راپور دا هم وايي هېواد کې د امنيت د بدې وضعې سره خبري ادارو کې د ښځينه کارکوؤنکو موجودګي هم کمه شوې ده .
"دا وخت په ښاري سيمو کې په رسنيو کې په پراخه توګه د ښځو شتون محدود دی، د ښځود مشرۍ او خبرونو په برخه کې رول کمزوری ساتل شوی او دا په رسنيو کې د ښځو شتون او شاته تګ په ګوته کوي" .
راپور کې د افغانستان د اطلاعاتو په وزارت غږ شوی چې د خبريالانو او حکومت ترمنځ د ماحول او همکارۍ دپاره نور کار وکړي، او زياته کړې يې ده چې د کمو معلوماتو شريکول " په هېواد کې خبريالانوته د کار په وخت لوې خنډ جوړيږي" .
