لاس رسیدونکی لینک

Breaking News

ترکیې دافغانستان اؤ پاکستان اړیکو ښه کولو کې دمنځګړتوب وړاندیز کړی


اشرف غني وویل حکومت یې چمتو دی چې افغانستان سره دولت په دولت خبرې وکړي

ترکیې دافغانستان اؤ پاکستان ترمینځ داړیکو په ښه کولو کې دخپل هر رقم رول ترسره کولو وړاندیز کړی خو دافغانستان ولسمشر ښاغلي اشرف غني وایي هیواد یې پاکستان سره یوازې یوازې هیواد په هیواد خبرو کولو ته چمتو دی.
په استنبول کې دترکیې دصدر طیب اردوغان اؤ افغان ولسمشر اشرف غني ترمینځ شوې لیدنه کې دترکیې صدر ویلي چې هیواد یې دې ته چمتو دی چې د افغانستان او پاکستان ترمنځ د اړیکو د ښه کېدو په برخه کې اقدام وکړي او په دې برخه کې به هیڅ ډول هڅې ونه سپموي.
دافغانستان د ولسمشر ماڼۍ لخوا دجاري شوي بیان له مخې په دغه لیدنه کې ښاغلي اشرف غني ویلي چې دافغانستان او امریکا د نوې ستراتیژۍ موخه په افغانستان او سیمه کې د سولې او ثبات ټینګښت دی او د افغانستان حکومت به د رامنځته شوي فرصت څخه مثبته او موثره استفاده وکړي.
هغه زیاته کړې ده چې دافغانستان حکومت تل مذاکراتو ته چمتو ؤ اوس هم په دوه بُعدونو کې د پاکستان سره دولت په دولت او طالبانو سره بین الافغاني مذاکراتو چمتو دی.
دبیان له مخې په دغه ناسته کې د ترکیې جمهور رئیس د جنوبي اسیا او افغانستان لپاره د امریکا متحدو ایالتونو نوې ستراتیژۍ د اعلان هرکلی کړی او هغه یې د سیمې د وضعیت د تغیر لپاره مثبته ګڼلې ده.
دافغانستان اؤ پاکستان ترمینځ اړیکې د تیرې ډیرې مودې راهسې تاوژنې دي اؤ افغان چارواکي تور لګوي چې ددغه هیواد څخه ورانکاري د افغانستان په زمکه ترهګري کوي.
خو پاکستان مدام دافغانستان دغه تورونه رد کړي اؤ وایي افغانستان کې دسولې پلوي دي.
دپاکستان اؤ افغانستان ترمنځ داړیکو ښه کولو دپاره دامهال امریکا اؤ چین هم دمنځګړي رول ترسره کوي خو ورسره امریکا پخپله هم په پاکستان تورونه لګوي چې خپله خاوره کې یې ترهګرو ته خوندي‌ ځالې ورکړي دي

XS
SM
MD
LG