د بې پولې خبریالانو سازمان ار ایس ایف افغانستان کې د خبریالانو د وژل کیدلو اؤ زورؤل کیدو پېښو کې په زیاتوالي راتللو ژوره اندیښنه ښودلې اؤ دافغانستان په دولت یې غږ کړی چې باید د هاغو وسله والو ډلو مخه ونیسي چې خبریالان وژني یا یې زوروي.
دغه سازمان پخپله یوه تازه اعلامیه کې ویلي چې دتیر یو کال په مهال افغانستان کې دخبریالانو د وژلو اؤ زورؤلو کچه لوړه شوې اؤ د هغوئ ژوند ته بېلا بیل ګواښونه پېښ دی.
دبې پولې خبریالانو دغه سازمان ویلي په تیرو خواوشا دوه نیمو کالو کې دافغانستان په خاوره ۳۶ خبریالان د وسله والو ډلو داعش اؤ طالبانو په بریدونو کې وژل شوي.
دخبریالانو دغه سازمان پخپله اعلامیه کې ویلي په یوه ورځ دافغانستان دننه د ۱۱ؤ خبریالانو وژل کیدل ساری نه لري اؤ دغو پېښو افغانستان کې د خبریالانو ژوند ته پېښ ګواښونه نور هم په ډاګه کړي.
اعلامیه کې دا هم ویل شوي چې خبریالان یوازې وسله والو ډلو نه بلکې دافغانستان د امنیتي ځواکونو هم زورؤلي دي.
اعلامیه کې ویل شوي چې په فرااه ولایت د یو شمیر خبریالانو ژوند د خطرو سره مخ دی اؤ افغان دولت باید په ګرد هیواد کې د خبریالانو د ژغورنې اصل ته پام وګرځوي
په افغانستان کې د رسنیو د څار یوه وتلې ډله (نی) وايي، د تېرو ۱۷ کالو په موده کې نږدې ۱۰۰ خبریالان چې د کورنیو او بهرنیو خبري رسنیو سره یې کار کولو وژل شوي دي.
شمیرې ښایي چې دا مهال افغانستان کې د ژورنالستانو په وړاندې د تیري لږ تر لږه ۱۵۰۰ کیسونه راجستر شویدي.
افغان چارواکي وايي، د حکومت او رسنیو ګډې کمیټې د ژورنالستانو په وړاندې تر ۱۰۰۰ د زیاتو پېښو په اړه پلټنې کړیدي او دوسیې یې محکمې ته استول شویدي.
د افغانستان د اطلاعاتو او کلتور مرستیال وزیر سید حسین اغا سنګچارکي وايي، د ژورنالستانو د وژنې په اړه ځینې دوسیې بشپړې او مجرمین د مرګ په سزا هم محکوم شویدي.
د خبریالانو لپاره تر ټولو مرګونې ورځ د روان کال د اپریل ۳۰ وه په کومه کې چې په کابل کې د دوو خونړیو چاودنو په ترڅ کې نهه ژورنالستان ووژل شول
