شمالي کوریا د جنوبي کوریا خبریالانو ته د خپلو اټومي ازموینو د ځای (سایټ) د بندېدو چارو ته د ورتګ اجازه ورکړه.
د جنوبي کوریا اته خبریالان د شورو یا چهارشنبې په ورځ نېغ په نېغه شمالی کوریا ته ورغلل.
دوی د هغو بهرنیو خبریالانو له ډلې جلا کړای شوي وو چې د امریکايي، برتانوي، چینايي او روسي ژورنالستانو څخه جوړه شوې وه او د نهې یا سې شنبې په ورځ له چین څخه شمالي کوریا ته ولاړه.
د جنوبي کوریا چارواکي وايي، د دوي خبریالان لومړی د شمالي کوریا لخوا رد شوي وو او بیا د دواړو خواوو ترمنځ د خبرو وروسته هغوی ته اجازه ورکړل شوه.
د جنوبي کوریا اته واړه ژورنالستان په یوې پوځي الوتکه کې نېغ په نېغه د شمالي کوریا وانسن ښار ته ورسېدل چېرې چې د نورو بهرنیو ژورنالستانو ډله هم ورغلې وه.
د بهرنیو ژورنالستانو دغه ډله به ۱۲ ساعته په اورګاډي، څو ساعته په بس موټر او بیا پیاده مزل کوي چې د پنجېرې په نامه د اټومي ازموینو هغې سیمې ته ورسېږي کومه چې په لیرو غرونو کې پرته ده.
شمالي کوریا په دې وروستیو کې اعلان کړی و چې دوی به د اټومي ازموینو دغه سایټ د کېم جان اون او د امریکا د ولسمشر ډانلډ ټرمپ د جون د ۱۲ نېټې د سرمشریزې لپاره د یوه ښه نیت په توګه وتړي.
خو پیانګ یانګ په ناڅاپي توګه د تېرې اونۍ د لوړې کچې خبرې د امریکا او د جنوبي کوریا د روانو پوځي تمرینونو په غبرګون کې کنسل کړې وې.
پیانګ یانګ تر هغې راوروسته داسې هم ویلي و چې کیدای شي دوی دغه سرمشریزه له دې امله رد کړي چې د امریکا لخوا په یو اړخیزه توګه د بې وسلې کېدو په برخه کې شرایطو باندې عمل نه کیږي.
