لاس رسیدونکی لینک

Breaking News

جرګه: که پښتون ژغورنې غورځنګ یا حکومت سرغړونه وکړه خبرې به ونه شي


د پینډۍ له اډیاله زندانه د پښتون ژغورنې غورځنګ د ۳۷ غړیو تر را خوشي کېدو وروسته نن بیا د دې تحریک او سرکاري جرګې تر منځ په پېښور کې غونډه شوې، چې د دواړو غاړو مشرانو پکې ګډون کړی او د رسمي مذاکراتو د پیل کولو لپاره یې هیلې څرګندې کړې دي.

تر غونډې وروسته خبري غونډې ته په وینا کې د دواړو غاړو استازیو وویل، چې که دا ځل کوم فریق د جرګې د پرېکړې په خلاف د یو بل په ضد کوم ګام پورته کړ، نو دا به د جرګې باور ته زیان و رسوي او بیا به ممکنه نه وي چې د پښتون ژغورنې غورځنګ او سرکاري جرګې مذاکرات پر مخ دوام وکړي.

په غونډه کې د پښتون ژغورنې غورځنګ په استازیتوب د نورو کسانو تر څنګ وکیل او سیاستوال لطیف اپریدي هم ګډون کړی وو. هغه له غونډې وروسته وي.او.اې ډیوه ته وویل، چې د سرکاري جرګې له کسانو یې خبرې په ښه ماحول کې وشوې:

"د فریقینو نیتونه بالکل د خیر او روغې جوړې طرف ته وو، موږ کوشش کوو چې په راتلونکې ناسته کې د دوی تر منځ مسئلې حل شي او یوه روغه جوړه وشي".

لطیف اپریدی دا مني چې سرکاري جرګه له پښتون ژغورنې غورځنګ سره د مذاکراتو واک لري، خو وایي پکار ده چې په رسمي او باضابطه توګه واک ورسره وي او دوی به هم د خبرو لپاره د خپل واک لیکلی ډاډ ورکړي.

د سرکاري جرګې یو غړی شاه جي ګل اپریدي- چې په کور کې یې دغه غونډه شوې- له وي.او.اې ډیوه سره په خبرو کې وویل، دوی په دې متفق شول چې په راتلونکې غونډه کې خپله تګلاره جوړه کړي:

"جرګه نن په دې متفق شوه چې تر یکم جولای به حکومت او حکومتي ادارې د آیین او قانون نه بهر یو داسې کار نه کوي او پي ټي ایم به هم تر آیین، قانون او جمهوریت لاندې خپله خبره کوي".

په غونډه کې د پښتون ژغورنې غورځنګ مشرانو علي وزیر، ډاکټر سیدعام مسید، ، عبدالله ننګیال، محسن داوړ، لطیف اپریدي او ځینو نورو کسانو ګډون کړی وو، همدارنګه د شاه جي ګل اپریدي په شمول ملک خان مرجان وزیر، اجمل وزیر او نورو کسان د سرکاري جرګې له خوا په غونډه کې شریک وو.

د پښتون ژغورنې غورځنګ په استازیتوب په غونډه کې شریکو کسانو په نننۍ غونډه کې خپلې غوښتنې او د واڼه په وروستۍ پېښه کې د وژل شویو او ټپیانو موضوع د سرکاري جرګې استازو ته وړاندې کړې ده. ټاکل شوې چې د جولای په لومړۍ نېټه کېدونکې بله غونډه کې به ورباندې رسمي خبرې پیل کړي.

XS
SM
MD
LG