لاس رسیدونکی لینک

Breaking News

په هارون بلور ځانمرګي بريد: يو بل ټپي ژوند د لاسه ورکولو سره د مړو شمېر ۲۱ ته ورسېدو


پېښور کې د نهې، سه شنبې په ماسخوتن په هارون بلور د شوي ځانمرګي بريد په ژوبلو کې نن سهار يو بل ټپي په روغتون کې ژوند د لاسه ورکړو او په ياده پېښه کې د مړه شوؤ شمېره ۲۱ ته ورسېده.

د عوامي نيشنل ګوند د خېبرپښتونخوا د اطلاعاتو سېکتر او پي کي ۷۸ حلقې په کانديد هارون بشير بلور باندې د پېښور په يکه توت سیمه کې د انتخابي جلسې په مهال ځانمرګی بريد شوی ؤ.

پاکستاني طالبانو په هارون بلور د ځانمرګي بريد زمه واري منلې ده.

د پېښور د غټ دولتي روغتون ليډي ريډنګ ویاند ذوالفقار باباخېل وي او ای ډیوه سره په خبرو کې وويل پرون د شورو په ورځ د دوی سره په روغتون کې د مړو شمېر ۲۰ او ژوبل ۶۲ وو.

خو نور زياتره ژوبل د درملنې وروستو کورونو ته لېږل شوي او يواځې اته ژوبل کسان په روغتون کې د درملنې لاندې وو نن سهار په دغو ژوبلو کې يو بل ژوند د لاسه وکړو او د مړو شمېره ۲۱ ته ورسېده.

هغه وويل په پاتې اووه ژوبلو کسانو کې د يو بل ټپي روغتيايي حالت ډېر مرګونی دی.

د هارون بلور په وژنه عوامي نيشنل ګوند د درېو ورځو د ماتم اعلان کړی او ويلي يې دي درې ورځې به هیڅ قسمه انتخابي هلې ځلې نه کوي او درې ورځې وروستو به انتخابي کمپاين بيرته روانوي.

د هارون بلور جنازه پرون مازيګر د پېښور په وزير باغ کې شوې ده.

الېکشن کمېشن د هارون بلور په حلقه پي کي ۷۸ باندې د انتخاباتو ځنډولو اعلان کړی دی.

په يکه توت کې د ځانمرګي بريد وروستو د خېبرپښتونخوا د لنډ مهاله اعلی وزير جسټس (ر) دوست محمدخان په مشرۍ د امنيت په اړوند غونډه شوې او د انتخابي کمپاين په مهال د امنیت ټينګ ساتلو دپاره د ګامونو اخستو پرېکړې پکې شوي دي.

  • 16x9 Image

    فضل عزیز

    فضل عزيز په کراچۍ کې د وي او اې ډيوه خبريال دی په سياسي، تعليمي، صحت او کلتور سره په ټولنيزو موضوعاتو وېب، رېډيو او ټيلي ويژن ته رپورټونه جوړوي او په ځانګړو موضوعاتو ليکل هم کوي. د کراچۍ د اردو پوهنتون نه يې د جرنلزم او کراچۍ پوهنتون نه يې د نړيوالو اړيکو د ماسټرۍ ډګريانې ترلاسه کړي دي.​

XS
SM
MD
LG