لاس رسیدونکی لینک

Breaking News

میانمار د م م هغه راپور رد کړ چې پوځ یې د روهینګیا په مسلمانانو ظلم او تیری کړی


میانمار د ملګروملتونو د پلټونکو د ځانګړې ډلې هغه راپور رد کړ په کوم کې چې ددغه هېواد پوځ د روهینګیا د مسلمانو لږکیو په ټول وژنې یا قتل عام او ددوی په وړاندې د بشري حقونو په تیریو باندې تورن شوی دی.

د میانمار د پوځ ویاند زا هېتې نن د شورو یا چهارشنبې په ورځ دولتي تلویزیون ته وویل، چې دوی د ملګروملتونو د بشري حقونو د شورا لخوا له شویو څرګندونو سره موافق نه دي.

بل لوري ته د امریکا د بهرنیو چارو وزارت وايي، دوی د روهینګیا له مسلمانانو څخه داسې معلومات ترلاسه کړیدي چې د میانمار یا برما پوځ او امنیتي ځواکونو له دوی سره د جنسي تیریو په ګډون ګڼ نور بشري تیري ترسره کړیدي.

د امریکا متحده ایالات وايي، دوی دغه معلومات په بنګلدیش کې د روهینګیا د کډوالو په کمپ کې له زرو څخه د زیاتو مرکو په ترڅ کې راټول کړیدي.

په ملګرو ملتونو کې د امریکا سفیري نیکې هیلې امنیت شورا ته د نهې یا سې شنبې په ورځ وویل، چې نړۍ دا څاري چې دوی د دغو حالاتو په اړه څه ډول غبرګون څرګندوي.

"د امنیت د شورا دریځ دا دی چې مونږ باید ټول هغه کسان مسول وګڼو چاچې په تاوتریخوالي کې لاس درلود او له دوی سره باید حساب وشي. "

ددې میاشتې په سر کې د ټرمپ ادارې د میانمار په پنځو پوځي مشرانو او د پوځ په دوو ټولیو باندې د کلیو د سوزولو په ګډون د ګڼو بشري تیریو له امله بندیزونه ولګول.

د ملګروملتونو ځانګړې ډلې چې په میانمار کې یې د بشري حقونو د تېریو په اړه راپور خپور کړی، د امنیت له شورا څخه غوښتي دي چې دغه دوسیه دې په هېګ کې د جرمونو نړیوالې محکمې ته وړاندې کړي.

خو داسې ښکاري چې د ویټو حق لرونکي روسیه او چین به پرې نه ږدي چې دا کار ترسره شي.

په ورته وخت کې د روهینګیا کډوال چې په نړۍ کې د کډوالو په تر ټولو ستر پنډغالي یا کمپ کې ژوند کوي له ډېرو سختو ستونزو سره مخ دي.

ملګري ملتونه وايي، د روهینګیا مسلمانو کډوالو ته په هېواد کې دننه حالات دومره نه دې جوړ شوي چې دوی بېرته خپلو کورونو ته په خپله خوښه او رضا سره وګرځي.

XS
SM
MD
LG