لاس رسیدونکی لینک

Breaking News

د پوليس افسر طاهر داوړ درک تراوسه نشته، په اسلام اباد کې د احتجاج پرېکړه


د اسلام اباد څخه بې درکه شوي پوليس افسر (اېس پي) طاهر خان داوړ د مالومولو او راخوشي کولو دپاره د داوړو قامي جرګې پرېکړه کړې چې په اسلام اباد کې به احتجاج کوي.

د شمالي وزيرستان سره تعلق لرونکی طاهر داوړ د اکتوبر په ۲۶م د اسلام اباد څخه بې درکه شوی ؤ، نوموړی په پېښور کې د اېس پي رورل په چوکۍ مامور ؤ.

داوړ قامي جرګې پرون د اتوار،يکشنبې په ورځ د پېښور په باغ ناران کې په يوه غونډه کې پرېکړه کړې چې دوي به په اسلام اباد کې احتجاج کوي ځکه چې پوليس افسر د اسلام اباد څخه بې درکه شوی دی.

د باغ ناران په جرګه کې د شمالي او جنوبي وزيرستان د احمد زو او اتمانزو سره د نورو قبيلو مشرانو هم ګډون کړی دی خو دوي په سمدستي ډول د احتجاج نېټه نه ده ټاکلې.

د پېښور پوليس وايي دوي ته هم تراوسه پورې څه درک نه دی شوی چې طاهر داړو چرته دی.

د خېبرپښتونخوا د پوليس مشر (ايي جي پي) وياند ډي اېس پي وقار احمد وي او ای ډيوه سره په خبرو کې وويل، د طاهر داوړ په اړوند لوړ پوړي چارواکي اسلام اباد ته تللي او د اسلام اباد د پوليس مشرانو سره يې ليدلي دي.

هغه وويل تراوسه پورې دوي ته د پوليس افسر د درک په اړوند څه نه دي ويل شوي.

د پوليس ویاند په وېنا طاهر دواړو د بې درکه کېدو وروسته په دوېمه ورځ کور ته یو پېغام کړی او د هغې وروسته یې بيا درک نه دی مالوم.

د طاهر داوړ کورنۍ او قامي جرګې د هغه په اړوند د تېرې نهې، سه شنبې په ورځ په پېښور پرېس کلب کې يوه خبري غونډه هم کړې وه.

  • 16x9 Image

    فضل عزیز

    فضل عزيز په کراچۍ کې د وي او اې ډيوه خبريال دی په سياسي، تعليمي، صحت او کلتور سره په ټولنيزو موضوعاتو وېب، رېډيو او ټيلي ويژن ته رپورټونه جوړوي او په ځانګړو موضوعاتو ليکل هم کوي. د کراچۍ د اردو پوهنتون نه يې د جرنلزم او کراچۍ پوهنتون نه يې د نړيوالو اړيکو د ماسټرۍ ډګريانې ترلاسه کړي دي.​

XS
SM
MD
LG