لاس رسیدونکی لینک

Breaking News

کراچۍ: د چين په قونصلګرۍ ډزو کې دوه پولیس وژل شوي


د پاکستان په غټ اقتصادي ښار کراچۍ کې د چين د قونصلګرۍ سره نزدې په چاؤدنه او ډزو کې دوه پوليس وژل شوي او يو بل ساتونکی ژوبل شوی دی.

د کراچۍ په کلفټن سيمه کې د چين د قونصلګرۍ سره نزدې د ډزو او چاؤدنې پېښه نن د جمعې په سهار نزدې لس بجې شوې ده.

ځايي ميډيا د کراچۍ ښار د جنوبي زون د پوليس مشر ډی ايي جي جاوېد عالم اوډهو له قوله پخلی کوي چې په بريد کې دوه پوليس وژل شوي او بل ژوبل شوی دی.

د وژل شوؤ پوليس جسدونه جناح روغتون ته وړل شوي او د روغتون چارواکو يې پخلی کړی دی.

پوليس چارواکو ادعا کړې چې د پوليس نور سرتيري د قونصلګرۍ لوري ته لېږل شوي خو ويل کيږي په سيمه کې د ډزو اوازونه اورېدل کیږي.

د قونصلګرۍ نه چاپېره علاقه تړل شوې او د عامو خلکو تګ راتګ ورته بند کړی شوی دی.

پوليس ويلي يو بريد کوونکی ترهګر وژل شوی دی.

د راپورونو ترمخه د درېو نه تر څلورو پورې وسله په لاس کسانو د چين قونصلګرۍ ته د ننوتلو هڅه کوله خو د قونصلګرۍ ساتونکو پرې ډزې کړي دي.

په کراچۍ کې د چين قونصلګري د کلفټن په حساسه علاقه (بلاک څلورم) کې موقعيت لري. چرته چې نزدې د نورو هېوادونو قونصلګرۍ هم شتون لري.

د مطبوعاتي راپورونو ترمخه بلوڅ بېلتون خوښې ډلې بلوچ لبرېشن ارمي د چين په قونصلګرۍ د بريد زمه واري منلې ده.

XS
SM
MD
LG