لاس رسیدونکی لینک

Breaking News

شاه محمود قرېشي د قطر سره د افغانستان د سولې په خبرو غږېدلی


د پاکستان د بهرنیو چارو وزير شاه محمود قرېشي د قطر يو ورځنی سفر کړی او د دغه هېواد د وزيراعظم شېخ عبدالله او مرستيال وزيراعظم سره يې ليدلي دي.

قرېشي ويلي، د قطر د سفر هدف يې دوه اړخيزه اړيکو ته وده ورکول او د افغانستان د سولې د عمل په لړ کې د پاکستان د ګامونو څخه د قطر خبرول ؤ.

د قطر د سفر نه وړاندې هغه ويلي، قطر په تېر وخت کې هم د افغانستان د سولې او روغې جوړې په لړ کې خپل رول ترسره کړی دی ځکه هغه يې په تازه پرمختګ خبرول غواړي.

روانه مياشت په متحده عرب اماراتو کې طالبانو د امریکا لخوا د افغانستان د سولې د خبرو دپاره ځانګړي استازي زلمي خليلزاد سره ليدلي وو.

په متحده عرب اماراتو کې د ليدنې وروسته قرېشي د چين او افغانستان سفرونه هم کړي وو.

د پاکستان د بهرنيو چارو وزير ویلي پاکستان د سيمې د هېوادونو سره ښې اړیکې غواړي او قطر د دې سيمې مهم هېواد دی.

په قطر کې د کال ۲۰۱۳م راهسې د طالبانو سیاسي دفتر جوړ دی.

قرېشي ويلي پاکستان پرېکړه کړې چې د سيمې مهم دوست هېوادونه د افغانستان د سولې د خبرو په لړ کې په اعتماد کې واخلي.

شاه محمود قرېشي د کابل ترڅنګ، د بيجينګ، ماسکو او تهران سفرونه هم کړي دي.

XS
SM
MD
LG